Ӱгретчiлерге – чурт клӱстерi
25.10.2024
Хабарлар
Сергей Сандыков тай іҷезі Хыспира Егоровна Карамчакованаң хада
Республика программазы. Пу кӱннерде Алтай аймааның школаларында iстенчеткен чиит ӱгретчiлерге чурт клӱстерiн пайрамни читiргеннер
Ирткен чылдаң Хакасия пазы Валентин Коноваловтың чахиинҷа «Хакасияда ӱгредiг киреенiң тилiзi» республика программазынҷа аалларзар паза тоғысчы посёлоктарзар тоғынарға парған специалисттерге чурт алылча. Ирткен чылда регион бюджедiнең Алтай аймаана пу кӧстеглерге 50 миллион салковай пирiлген, ол ахчаа 14 тимде чурт алылған, алты чурт пӱдiрiлче.
Пӱӱл чурт алар пастағы чиит специалисттер Хубачар, Аршаннар, Чайлағ аалларда тоғынчалар. Оларға клӱстернi читiрерге паза мындағ ӧрiнiстiг кирекнең алғыстирға улуғ аалҷылар кил парғаннар. Оларның санында Хакасия Ӧӧркi Чӧбiнiң депутады Денис Филатов, Алтай аймааның пазы Ирина Войнова, аймахтың депутаттар чӧбiнiң кнезi Александр Марачков, ӱгредiг устанызы паза пасхазы даа.
Александра Еркибаева пасталығ класстар ӱгретчiзi полча. Ол Харатастағы отрасльлар технологияларының техникумын тоосхан. Аршаннардағы школада ӱртӱн айының пастағы кӱнiнең тоғынча. Александра Дмитриевна, ӱзiнҷi курста ӱгренчеткенде, «Мобильнай ӱгретчi» программада араласхан – ол Сартых аалдағы школада уроктар апарған. Ӱгредiгнi тоосхан соонаң аны Аршаннарзар хығырғаннар, чурт суриин пӧгерге хабас пирерге молҷааннар. Аннаңар чиит специалист iкiнҷiлебин пеер кӧзiбiзерге чаратхан. Мындағ чарадығ алғаныма пiр дее хомзынминчам тiп ӱлесче сағыстарынаң ол. Аалда чиит сӧбiрее чуртирға прай оңдайлар пар нооза. Алты частығ хызыҷаа олған садының школаа тимненер группазынзар парар. Хада хонғанына iдӧк тоғыс таап пиргеннер, ол Аршаннардағы аал чӧбiнде iстенче.
Александра Еркибаеваа ағастаң пӱдiрiлген тура пирiлген, аның улии 87 квадраттығ метрге тиңнелче. Чир участогы iдӧк улуғ – 15 сотка. Алтай аймааның устағ-пастаа чииттерге тыхтағ тоғыстарын апарарға полыс пирген, хай пiрее техника паза мебель сыйлап пирген, хара тас тикке ағыл пирген. Пастап пу тураны пӧзiк ӱгредiглiг пасха хан тiллерi ӱгретчiзiне пирерге пӧгiнтiрлер. Че ӱгретчi Хубачарзар кӧзiбiскен. Хакасия пазы иртiрген чыылығда республиканың ӱгредiг паза наука министрi Анатолий Бутенко чуртты пӧзiк ӱгредiглiг ле нимес, че iдӧк колледж-техникумнарны тоосхан, аалзар тоғынарға парчатхан специалисттерге пирерге кирек тiп пастағнаң сыххан. Аның сӧстерi санға алылып, республика бюджедiнең ахча позыдар оңдайларға килiстiре алызығлар кирiл парған. Андағ чарадығ алылған сылтаанда тураны Александра Дмитриевнаа пирер оңдай табыл парған.
Iдӧк, «Мобильнай ӱгретчi» программада аралазып, Алтай аймаанзар тоғынарға килген чииттер санына Сергей Сандыков кiрче. Ол Чайлағ аалдағы школада пасха хан тiллерi ӱгретчiзi полып iстенче. Оол анда 2022 чылдаң, Хакас хазна университедiнде ӱгренчедiп, тоғын сыххан, пӱӱл ол ӱгредиин тоозыбысхан. Сергей Павловичке iкi квартиралығ турада чурт пирiлген. Кухнялығ паза ӱс пӧлiктiг квартирада истiг чуртирына прай ниме пар: iзiг-соох суғ, септик. Аймах хара тас аларға полыс пирген.
Сергей Сандыков, англия уроктарынаң пасха, iдӧк уроктағы нимес спорт занятиелерiн апарча. Ол олғаннарнаң ойыннар ойнапча. Ӱгренҷiлер футболнаң, волейболнаң, баскетболнаң хынып айғасчалар. Таныхтирға кирек, чиит оол ӱгретчiлер сӧбiрезiнең. Аның пабазы Павел Сергеевич Сандыков Ӧӧк пилтiрiндегi школада география уроктарын апарча, iҷезi Людмила Анатольевна пасталығ класстар ӱгретчiзi полча. Тай iҷезi Хыспира Егоровна Карамчакова кӧп чыл Пии аймаандағы Хызыл хара суғдағы школада хакас тiлi паза литература ӱгретчiзi полып тоғын салған. Танығлығ кӱнде ол пархазынаң хада улуғ аалҷыларны удурлаан.
Хубачарда iкi пӧлiктiг квартира чиит сӧбiрее читiрiлген. Влада Румянцева ХГУ-да пасталығ класстар ӱгретчiзiне ӱгренiп алған, соонаң, магистратураны тоозып, дефектолог-ӱгретчi специальность алған. Уроктардаң пасха, ол чирлидинг секциязын апарча, пӱӱнгi кӱнде андар 50-ҷе оолағас паза хызыҷах чӧрче. Хада хонғаны Никита Бахтин ХТИ-ны тоосхан, промышленнай паза гражданскай пӱдiрiг кӧстегҷе ӱгренген. Амғы туста оол Алтай аймааның ӱгредiг устанызында инженер-сметчик полча.
Чурт клӱстерiн алған чииттерге аймахтың, школаларның устағ-пастаа сыйыхтар читiргенӧк
Таныхтирға кирек, Алтай аймаа республика программазында iкiнҷi чылы араласча. Пӱӱл аны хоостыра ағаа республика бюджедiнең 25 миллион салковай позыдылған, пу ахчаа тиксi 10 чурт алылар. Муниципальнай пӱдiс позының ахчазын iдӧк хосча, iкi чыл аразына пу кӧстеглерге 700 муң салковайға чағын ахча хорадылған. Iдӧк ол, «Аалларның тиксi тилiзi» федеральнай программада аралазып, Аршаннарда тура пӱдiр салған. Ол география ӱгретчiзiне пирiлген.
Сомнар Равиль Дзязькони
Автор :
Татьяна Кыштымова
| Пн | Вт | Ср | Чт | Пт | Сб | Вс |
| 27 | 28 | 29 | 30 | 1 | 2 | 3 |
| 4 | 5 | 6 | 7 | 8 | 9 | 10 |
| 11 | 12 | 13 | 14 | 15 | 16 | 17 |
| 18 | 19 | 20 | 21 | 22 | 23 | 24 |
| 25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде
