Худай Инезiнең сурынып...
25.10.2024
Хабарлар
Хазандағы Худай Инезінің обыразы
Танығлығ кӱн. 23 чарыста Хакасиязар Хазандағы Худай Инезiнiң обыразын ағылғаннар. Ол Орыс православ тигiрибiнiң иң аарластығ обыразына саналча
Иртен Хазандағы Худай Инезiнiң обыразын Ағбандағы аэропортта Хакасия пазы Валентин Коновалов удурлаан, анаң аны Ағбандағы Преображенскай тигiрибзер читiргеннер. Анда Хакасияның аймах пулуңнарынаң килген чуртағҷылар обырасты ағыларын сахтап турғаннар. Полиция паза имнег полызиин табырах пирҷең служба тоғынҷылары дежурство апарғаннар. Худай литургиязынаң Ағбанның паза Хакасияның архиепискобы Ионафан устаан.
Худай Инезi пiстiң чонға аарлығ обырас полча. Пiстiң хазнада аннаң палғалыстығ полған иң хорылыстығ киректер. Хазандағы Худай Инезiнiң обыразы хазнаны, чонны ыырҷылардаң арачылапча, чобағларны оортах итче, аар туста чонны пiрiктiрче паза тыытча тiп чонда саналча. Ам даа обырастың кирексiнiзi улуғ. Европадағы хазналар Россиядаң тоғыр кӱрезерге кӱстенчеткенде, Худай Инезi пiстiң чааҷыларыбысты арачылазын паза чиңiстi чағыннатсын. Мына мындағ сағыснаң килчелер аймах субъекттернiң чуртағҷылары Хазандағы Худай Инезiнiң обыразынзар.
Полған на кiзi Худай кӱзiне киртiнминче полар, че пiрее чобағ алай кiзi тың ағырыбысса, кӧбiзi аннаң сурынча, пазырча. Худай Инезiн Хакасиязар ағылғаннарында, Ағбандағы Преображенскай тигiрибзер киртiнiстiглер, киртiнiстiг ниместер, улуғлар паза кiчiглер чыылысханнар, ӧнетiн чаа операциязында араласчатхан матырларны арачылирға сурынғаннар.
Хазандағы Худай Инезiнiң обыразын хазнаның регионнарынҷа ал чӧрер чӧрiм пӱӱл часхызын пасталған. Хакасиязар читкенҷе, ол Россияның 50 азыра субъектiнде пол килген. Улуғ чорых кiчiг хырлас айының 4-ҷi кӱнiнде тоозылар. Хакасияда ол пiр кӱн полған. Анаң аны Сибирьнiң пасха регионнарынзар апарыбысханнар.
Сом Дмитрий Сунчугашевти
Автор :
Оксана Котюбеева
| Пн | Вт | Ср | Чт | Пт | Сб | Вс |
| 27 | 28 | 29 | 30 | 31 | 1 | 2 |
| 3 | 4 | 5 | 6 | 7 | 8 | 9 |
| 10 | 11 | 12 | 13 | 14 | 15 | 16 |
| 17 | 18 | 19 | 20 | 21 | 22 | 23 |
| 24 | 25 | 26 | 27 | 28 | 29 | 30 |
| 31 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
