Тилекей первенствозының кӱмӱс призеры
25.10.2024
Хабарлар
Поғдархас. Наталья Пудова наа чидігнең ӧріндірді. Хакас кӱресчі тилекей первенствозында кӱмӱс медаль утхан
Улуғ турнир Тиранада (Албания) 23 – 25 чарыста ирткен. Анда 23 часха читкелек спортсменнер кӱстерін сынааннар. Наталья Пудова 50 килограмм кӧдірімде араласхан. Пу кӧдірімде кибіске 20 кізі cыхтыр. Чоннар аразындағы марығларда Россияның паза Белоруссияның спортсменнері нейтральнай атлеттер чіли араласчалар.
Наталья финалның cигізінҷі чардығында Юснейри Наджай Вестнең (Панама) тоғасхан. Хакас хыс, «ыырҷыны» учаландырабызып, аны 12:0 саннаң утып алған. Азах мееттің тӧртінҷі чардығында чиңіс пазох пісти. Оң полбаан Наталья Кливчуцкаяа (Украина). Чарым финалда Пудова белорус кӱресчі Наталья Варакинанаң харбасхан. Наа чидіг чир-суғҷыбысха азах меетке чол асхан. Финалда Тӧӧ чирінең сыххан хыс США-дағы кӱресчі Сейдж Рейн Мортимернең тоғасхан. Наташаа чиңіске кӧмес ле читпиндір. Ол, 5:7 саннаң утыр салып, кӱмӱс медальны холға кирген.
Чир-суғҷыбыс Асхыс аймаандағы Лырсы пилтірі аалдаң. Хакас абахай Эдуард Степанович паза Светлана Александровна Пудовтарның кӧп палалығ сӧбірезінде тӧреен. Ипчілер кӱрезінең 6-ҷы класстаң айғас парир. Пастағы тренері – Евгения Карамчакова. Амғы туста Марат Кичеевтің паза Виталий Канзычаковтың устаанынаң харбасча. Пӱӱл Наташаның чидіглерге пай чыл. Спортсмен кӱрген айында Ярыгин турнирінде хола призер полыбысхан, анаң Россия чемпионадында хола медаль утхан. Ӱртӱн айында наа чидіг. Пудова 23 часха читкелек кӱресчілерге кӧрілген Россия первенствозында чиңіс тутхан. Амды аның кӱмӱc медаль. Хакас кӱресчіні танығлығ чидігнең алғыстапчабыс. Аннаң андар чиңістер тударға алғапчабыс.
Таныхтирға кирек, халғанҷызын хакас кӱресчілер тилекей первенствозында 2021 чылда медальлар утханнар. Ол чыл Артур Чебодаев ікінҷізі полыбысхан, Мария Тюмерекова ӱзінҷі орынға сыххан.
Автор :
Тимнеен Майя Кильчичакова
| Пн | Вт | Ср | Чт | Пт | Сб | Вс |
| 31 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 1 | 2 | 3 | 4 |
Кӱн таңмазы
Хакасияда
Россияда
Тилекейде
