ХАКАС КАФЕДРАЗЫ ПОС ТІЛІН ӰГРЕНЕРГЕ ХЫҒЫРЧА
08.04.2016
Хабарлар
Ӱр ниместе «Хабар» газетада «Пістің чииттерібіс Хакас хазна университедінде ӱгрензіннер» материал сыххан. Анда ХГУ-ның ректоры Татьяна Краснова университеттің чуртазынаңар, тилізінеңер чоохтаан. Тоғазығда ол ідӧк ХГУ-да хакас тіліне паза культуразына улуғ хайығ салылча тіп таныхтаан.
Тоғазығ тоозылғанда, ол хайызығлардаңар паза хайдағ тоғыстар иділчеткеннеңер университеттің хакас филология кафедразының устағҷызы, филология наукаларының кандидады, доцент Инга Кызласованаң чоохтазып алғабыс.
ХАКАС КУЛЬТУРА ПАЗА НАУКА КӰННЕРІ
- Татьяна Григорьевнаның чооғында сизінерге чарир полған, хайди ол Хакас хазна университедінің национальнай сарин кӧзідерге кӱстенчеткенін. Ол хакас культуразының пайын, хакас тілінің сілиин сабландырарға сағынча. Аны кӧдірерге паза тилідерге полызарға тимдезін таныхтаан. Тиктең нимес 15 апрельде Хакас хазна университедінде Хакас культуразының паза науказының кӱннері таныхталча, - чоохтапча Инга Людовиковна.
Аны Хакас хазна университеді хакас чонның Улуғлар чӧбінең хада иртірчелер. Аның ӧӧн пӧгіні - хакас культуразын паза науказын студенттернің аразында сабландырары паза уламох тирең таныстырары.
- Пу кӱнде ХГУ-да аймах кӧзідіглер тоғынар. Олар - хакас кӧг тиріглері, кип-азахтары, тудынҷаң-хабынҷаң ниме-ноолары. Оларны ӧӧнінде студенттер паза преподавательлер пос кӧңнінең тимнепчелер. Ідӧк ол кӱн наука книгаларын кӧріп аларға чарир. Университеттің искусство институдының студенттері, тізең, актовай залда улуғ концерт кӧзідерлер. Ол ідӧк хакас культуразына чарыдылча, - чооғында таныхтаан хакас кафедразының устағҷызы Инга Людовиковна Кызласова.
ХАКАС ТІЛІН ӰГРЕНЕРГЕ ОНДАЙ ПАР
Ідӧк Н.Ф.Катановтың адынаң Хакас хазна университедінде хакас тілін ӱгренерге сағынчатханнарға 21 марттаң «Хакас тілін ӱгренҷең курс» проект тоғынып пастады. Пӱунгі кӱнде андар 15-че кізі чӧрче.
- Проекттің ӧӧн пӧгіні - хакас тілін ӱгренерге сағынчатхан, аны кирексіпчеткен кізілерге тілні ӱгренерге оңдай пирері. Амды курстарға студенттер, аймах сфераларда істенчеткеннер, хайзыларына тілні тоғыс хоостыра пілерге кирек, ортын частығ кізілер паза тынағдағылар чӧрчелер. Ӱгренчеткеннер аразында хакастар даа, орыстар даа пар. Тынағдағы пір ипчі пос тілін пілбинчеткеніне чуртас тооза хомзынтыр. Хайди ол тіпче, кічігде орыстар аразында ӧстір, іҷе-пабазы аны хакас тіліне ӱгретпиндір. Аннаңар, ХГУ-да мындағ курстар азылғанын піліп алып, улуғ частығ ипчі анда аралазарға сағыныбыстыр. Курстарға полған на кізі позының сағызынаң килче, - тіпче Инга Кызласова.
Хакас тілін ӱгренҷең курстарны хакас кафедразының преподавательлері Инга Людовиковна Кызласова паза филология наукаларының кандидады Марина Алексеевна Медведева неделяда ікі хати ХГУ-да иртірчелер. Пір курсха 40 час кӧріл парған.
- Хакас тілін ӱгренҷең курс тоозылза, аның араласчылары постарынаңар, нанҷыларынаңар, сӧбірелерінеңер, хада тоғынчатханнарынаңар паза даа пасха нимелерні чоохтап пілерге киректер. Ідӧк олар хығырарға паза орта пазарға пілзіннер, - таныхтаан курстың преподавательі Инга Людовиковна.
Хакас тілін ӱгренҷең курстар ХГУ-да тӧреміл иртіріл турарлар. Пӱӱнгі кӱнде университетте хакас тілін ӱгренерге сағынчатханнарның ікінҷі группазы тӧстелче. Хайди чоохтаан Инга Кызласова, 10 кізі чыыл парза, ӱгредігні пастирға чарир.
ХАКАС ТІЛІ СПЕЦИАЛЫНОЗЫН АЛЫҢАР
Пӱӱл филология паза культуралар аразындағы палғалыс институдындағы хакас кафедразы ідӧк бакалаврларны, магистрлерні тимнир. Бакалавриат «Хакас тілі паза литература. История» специальностьча,магистратура - «Хакас тілі паза литература. Культура».
- 2016-2017 ӱгредіг чылында бакалавриатха тикке ӱгренҷең 24 орын пирілче, магистратураа, тізең, 8. Ідӧк хакас тілі специальнозын ИНПО-да алып аларға чарир. «Пасталығ ӱгредіг. Хакас тілі паза литературазы» специальностьха тикке ӱгренҷең 23 орын полар, -
чоохтапча Инга Кызласова.
Таныхтирға кирек, хакас кафедразы ідӧк университетте хакас тіліне паза культуразына чарыдылған аймах мероприятиелер иртірче. Іди чыл сай «Чылтызахтар» республика марии иртче, Тӧреен тілнің кӱні, Чыл пазы, Хакас филология неделязы таныхталча.
Автор :
Оксана СУНЧУГАШЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде