ХЫНЧАТХАН ТОҒЫС ЫРЫС АҒЫЛЗЫН
11.11.2016
Хабарлар
Хакасияның школаларына хакас тілі паза литература ӱгретчілерін Ағбандағы Н.Ф.Катановтың адынаң Хакас хазна университедіндегі филология паза культура палғалыстары институдының хакас филология кафедразы тимнепче. ХГУ-да хайдағ ла алызығлар полбинча, институттар, факультеттер алысчалар, че хакас кафедразы «чуртапча». Пу тусха теере ол нинҷе-нинҷе чиит кізее чол асхан. Хаҷан-да чиит специалист полған ӱгретчілер, амды школаларда маңнаныстығ істеніп, турыстығ оолғыҷах-хызыҷахтарны ӧскір парчалар. Хакас филология кафедразын тоосхан оол-хыстар специальность хоостыра тоғыс таап алчатханнарынаңар чоохтапча кафедраның устағҷызы, филология наукаларының кандидады Инга КЫЗЛАСОВА.
- Филология паза культура палғалыстары институдындағы хакас кафедразы бакалаврларны, магистрлерні тимнепче. Ирткен чылда магистратураны 4 кізі тоосхан, аның алнында бакалавриатты паза специалитетті ікі группа тоосхан. Ортымахти алза, пip чылда кафедра 20-ҷе чиит специалист сығарча. 2016-2017 ӱгредіг чылында 18 кізі бакалавриатты тоозар, 10 кізі, тізең, магистратураны. Таныхтирға кирек, пістің студенттерібіс ХГУ-ның стенелерінең сых парыбыссалар, піс олар хайда тоғыс таап істенчеткеннерін тӧреміл хайығда тутчабыс.
Халғанҷы алты чылға тоғыс таап алчатханнары хоостыра кӧзідім хомай ла нимес. iди амғы тусха профиль хоостыра ӱгредиин тоосханнарның 63 проценті специальность хоостыра тоғынча. Олар хакас тілін школаларда алай ба олған садтарында апарчалар. Ідӧк кафедраны тоосхан оол-хыстар тархын ӱгретчізі полып істенчелер, ол чииттернің ікінҷі профильі полча. Хай піреезі магистратурада алай аспирантурада аннаң андар ӱгредиин узаратча, хакас театрында алай музейде тоғынча. Школаларда педагог-организатор полып істенчелер, науканаң айғасчалар.
Таныхтирға сағынчам, хакас кафедразынаң пасха, хакас тілі паза литература ӱгретчілерін тӧреміл педагогика ӱгредиинің институды (ИНПО) тимнепче. Пӱӱл анда 58 студент ӱгренче, - чоохтапча Инга Людовиковна.
Инга Кызласованаң чоохтазып алған соонаң, мағаа позымның группам сағысха кірген. Пістің группа Сойан-Алтай тюркология институдын 2009 чылда тоосхан. Специальность «Орыс тілі паза литература, хоза специальность хакас тілі паза литература» полған. Пісті ідӧк амды хакас кафедразында істенчеткен ӱгретчілер ӱгреткеннер. Олар - Инга Людовиковна Кызласова, Марина Алексеевна Медведева, Лариса Ильинична Чебодаева, Владислав Александрович Боргояков паза даа пасхазы. Пістің ӧӧн специальность орыс тілі паза литература полған полза даа, хакас тілі дисциплиналарына піс тың хынҷаңмыс.
Хайди амды студент чылларын сағысха кирчем, ӱгренчеткенде, піс специальность хоостыра тоғынмаспыс тіп удаа чоохтасчаңмыс. Кӧбізі, университетте аннаң андар ӱгреніп, пасха специальностьтаңар сағынған, кем-де пос киреен азарға пӧгін тутхан, ооллар ӧӧнінде армияа парарға сағыс тутчаңнар.
«Школада тоғынарға сидік, ағаа кӧп кӱс парыбысча, пос киректеріне паза сӧбірее кӱс, тус халбинча» тіп хоптанысчаңмыс удур-тӧдір. Ол сағыстарнаң піс пис чыл ӱгренгебіс. Чылдаң чылға, кӱннең кӱнге занятиелерге чӧрҷеңміс, семинарларға тимненҷеңміс, сессияны чахсы паалағларға тудыбызарға кӱстенҷеңміс. Іди полза, чахсы стипендия аларға оңдай пар нооза!
Амды, чыллар ирт парғанда, сағысха тӱсчем: группадағы хакас тілі пӧлиинде ӱгренген арғыстарым прайзы даа ӱгредіг алай ба филология киреенде істенчебіс нооза! Пістің группада Таштып аймаанаң кӧп кізі полған. Амды, оларнаң тоғазарға алай ба телефоннаң чоохтазарға киліссе, сизінчезің, чииттер прайзы даа, аймахтарынзар айланып, школаларда, олған садтарында орыс тілі паза литература алай ба хакас тілі паза литература ӱгретчізі полып істенчелер. Ідӧк хай піреезі методист, логопед полча. Таныхтирға кирек, школада істенчеткен ӧӧрелерім, чиит специалист полып, хазна полызығларынаң тузаланчалар. Іди олар ӧӧн чал ахчазына хоза тӧлег алчалар, чурт ниик паанаң алып алғаннар паза даа пасхазы. Ідӧк сизінгенде, хада тоосхан арғыстарым ӧӧнінде хакас тілі ӱгретчізі полыбысханнар.
Хаӌан-да ӱгредіг киреенде істенерге хынмаан оол-хыстар амды специальность хоостыра тоғынчатханнарын иссең, оларның ӱчӱн уғаа ӧріністіг. Уламох поғдархастығ, хаӌан ӱгретчілер алай ба оларның ӱгренҷілері марығларда, олимпиадаларда пӧзік салтарлар кӧзітчелер. Ӧӧні - тоғысха чӱрек чатханы.
Ӱр ниместе университетте хада ӱгренген пір ӧӧремнең тоғасхам. Ол Таштып аймаанда хакас тілі паза литература ӱгретчізі полып тоғынча. Студент чылларын сағысха киріп, амғы чуртас хайди парчатханынаңар чоох-чаахнаң одырғабыс. Тоғызы кӧңніне кірче, ӱгренҷілер ағаа хынчалар, хада тоғынчатхан арғыстары, тізең, паарсапчалар. Ол чоохтапча: «Иртен тоғысха чахсы кӧңніліг парчам, нинҷе кӱзім пар ағаа пир салчам, иирде, тізең, майых парған даа ползам, чахсы кӧңніліг ибзер айланчам. Хайди чахсы кӧңніліг полбас, хаӌан тоғызым мағаа даа, ӱгренҷілеріме дее ӧрініс ағылча», - теен ол. Ол сӧстер соонаң сағысха тӱсчезің, чуртаста полған на кізі хынчатхан тоғыста істенерге кӱстенерге кирек. Іди полза, ол тоғыс ырыс ағылча нооза.
Автор :
Оксана СУНЧУГАШЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 31 | 1 | 2 | 3 | 4 |
Кӱн таңмазы
Хакасияда
Россияда
Тилекейде