СПОРТ ТИЛІЗІНЕ УЛУҒ ХАЙЫҒ
16.12.2016
Хабарлар
Хакасияның пазы Виктор Зимин пу наада Алтай аймаандағы Кӧк хайа аалда пол килген. Анда ол республикадағы «Саяны» спорт клубының пӧлии хайди тоғынчатханын паза Хакасияда велосипед спортын хати тилідеріне тимненіс хайди парчатханын сыныхтаан, тренерлернең тоғасхан, чоохтасхан.
Виктор Михайловича республиканың спорт министрі Валерий Денщиков, Алтай аймааның пазы Владимир Пономаренко паза даа пасхазы удурлааннар. Валерий Васильевич губернаторға Алтай аймаанда, ол санда Кӧк хайа аалда спорт хайди тиліпчеткенінеңер чоохтаан. Анаң кічіг частығ хоккеисттер хайди теестегі тренировканы иртірчеткеннерін кӧргеннер. Кӱнӧрте оолағастар айғы ээлері ползалар, иирде чииттер чыылысчатхан осхас. Конькиліг чылары - тикке.
Анаң хаӌан-да тиксі сабланған хус фабриказы соонда халған пик пӱдістіг иргі тураларның пірсінде тыхтағ тоғыстары хайди парчатханын сыныхтааннар. Хакасияның спорт министерствозының пӧгіні хоостыра Кӧк хайа аалда велосипедтіг чарысчаң спорт кӧрімін нааҷыли пастирға сағынчалар. Хаҷан мындағы хус фабриказының директоры Василий Витвицкий полғанда, культура паза спорт тилізіне улуғ хайығ салылҷаң. Амды республиканың спорт министрі полчатхан Валерий Денщиков андада тренер тоғызын толдырып пастаан, Хакасияны тиксі сабландыр турған. Ол позы СССР-ның спорт узы полча.
- 1984 - 1986 чылларда пістің команда хазнабыста даа махтаға сыхчаң, чоннар аразындағы марығларда араласчаң, чиңістер тутчаң, - улесче позының сағыстарынаң Валерий Денщиков.
- Хайдағ чылларда чуртирға киліскен піске. Струков харындастар, Олег Козлитин паза даа пасхалары саблан турғаннар. Мағаа Виктор Струковнаң хада ӱгренерге киліскен, - ідӧк ирткен тусты сағысха кирче Виктор Михайлович.
Таныхтирға кирек, Кӧк хайа аалда велосипедтіг чарызар спорт кӧрімінең кӧп кізі айғасхан. Сергей Бяков, Олег Козлитин паза Александр Шпаковский чоннар аразындағы класстығ спорт устары полыбысханнар. Спорт узы атха турысхан 43 кізі саналған. Оларның пірсі пу тоғазығда араласханох.
- Сергей Николаевич, мин сині ундутпаам. Хайди табырах ойлат чӧрңең полдар, я? Пістің мындағы «Сойан хурчаа» марығда аралазарға командалар кӧп чыылысчаңнар, - айланча Виктор Михайлович чоннар аразындағы класстығ спорт узы Бяковсар.
Анзы пазын на икіп салған. Анаң, ирткен чиит тусты сағысха кирерге сурынғаннарында, мындағы «Сойан хурчаа» уғаа сидік чолға саналӌаң, ооллар, чиңіске парчан кӱстерін пиріп, велосипедтең дее тӱс полбаҷаңнар теен.
Анзына киртінерге дее сидік, че андағ киректер полғанына мин дее киречібін, пip ле хати кӧрерге киліспеен. Азах меетке читсе, саңай майых парып, велосипедтең тӱс полбин, аннаң хада чирзер аңдарыл парӌаңнар.
Иргі тураның пip комнатазында ол 1980 чыллардағы велосипедтер чыыл партырлар. Че олар кӧзідіге сығарылбааннар, амғы чииттер теестегі тренировкалар иртірчелер. Иргілен парған сылтаанда, удаа тыхтирға килісче, че ам даа тузаланарға чарир. Арса, амғы чииттер санынаң андағох саблығ спортсменнер сығып, тӧреен чирібісті сабландыр турарлар. Ол тоғыснаң айғасчаң кізі Хызылчардаң килген. Дмитрий Лукьянов - Россияның спорт узы, позы ам даа марығларда араласча. Амды ол тренер чииттернең тоғынып пастабысты.
- Тыхтағ тоғыстарына ахча табарға харазарбыс. Хакасияда спорт тилізіне сыбыра улуғ хайығ салылча. Че сірер дее, спортсменнер, ол тоғыстаң хыйа турбаңар, - Хакасияда велосипед спорты тилиріне ізендір салған Виктор Михайлович Зимин Кӧк хайа аалда ирткен сыныхтағлығ чорых тузында.
Автор :
Анатолий СУЛТРЕКОВ
| Пн | Вт | Ср | Чт | Пт | Сб | Вс |
| 28 | 29 | 30 | 1 | 2 | 3 | 4 |
| 5 | 6 | 7 | 8 | 9 | 10 | 11 |
| 12 | 13 | 14 | 15 | 16 | 17 | 18 |
| 19 | 20 | 21 | 22 | 23 | 24 | 25 |
| 26 | 27 | 28 | 29 | 30 | 31 | 1 |
Кӱн таңмазы
Хакасияда
Россияда
Тилекейде
