Аэропорттың ӧӧн директорының орынҷызы Виталий Нестеренконың чооғынаң, мероприятиені Авиация кӱніне чарыдып паза пассажирлернің кӧңнін кӧдірер сылтағнаң иртірерге пӧгін турғысханнар.

- Ізенчем, мероприятие прайзының кӧңніне кірер, - чоохтаан Виталий Викторович. - Аэропорт администрациязы адынаң Хакасия чуртағҷыларын, аалҷыларын паза авиация тоғынҷыларын ӱлӱкӱннең алғыстапчам.

Иртен 9.00 часта Ағбанның аэропортында Москвадаң учуххан самолёт нымзах одырыбысхан. Самолёттаң тӱзіп, пассажирлер вокзалда багаж алчатхан туста пір ирен баяннаң ойнап сыххан. Аэропорт вокзалында «Потому что мы пилоты» сарынның кӧӧ чайылған. Ол ирен пу сарынның пастағы сӧстерін толдыр сыхханда, нинҷе-де кізі ағаа хозылған. оларның ибіре чон илееде чыылыс парған, прайзы ачых-чарых кӧңніліг кӧгҷілернең хада сарнап сыххан. Ыр-кӧгні толдырарға пастаан ӧме «Ивушка» ансамбль полча. Баяннаң ойнапчатхан ирен, тізең, пу ансамбльның кӧг устағҷызы Евгений Ветров. Іди ансамбль, флешмобты иртіріп, ӱс сарын толдырған: «Потому что мы пилоты», «Мы будем петь» паза «Судьба». Москвадаң килген пассажирлернің ӧрінгені уламох харахха тасталған.

- Мин сағынғам, іди пісті удурлапчалар, - кӧңнінең ӱлескен Москва чуртағҷызы Ксения Павлова. - Мероприятие кӧңнілерібісті кӧдірібіскен. Иртен кӧңнімні кӧдір пиргеннерінде, кӱн тооза ӧрчіліг чӧрербін.

«Ивушка» ансамбльның хоос устағҷызы Людмила Зайцеваның чооғынаң, ансамбль араласчылары лётчиктердеңер пір дее сарын пілбеен полғаннар. Флешмобха тимненченкенде, «Потому что мы пилоты» ырны толдырарға сағыныбысханнар.

- Ікі кӱнге піс пу сарынны ӱгрен салғабыс. Мағаа Интернетте флешмобтар хайди иртірчеткеннерінеңер кӧп материал кӧрерге киліскен. Ізенчем, пӱӱнгі флешмоб прайзының кӧңніне кірген, - таныхтаан Людмила Фёдоровна.

Іди «Ивушка» ансамбль авиапассажирлерге иртен мындағ чапсых сыйых читірген.