- Пис айға піс хайди даа школа пӱдірібізерге кирекпіс. Мин ай сай Ӱӱс аалда штаб чыылиин иртірербін, сірер, тізең, айда ікі хати. Тоғыс 3-4 смена парза, маңнанарбыс, - хатығ чоохтанған Виктор Михайлович.

Хакасия пазы хатығланғаны пілдістіг. Виктор Зимин федеральнай синде килчеткен чылға Ағбанда наа школа пӱдірердеңер Хакасияа пір миллиард салковай позыдардаңар чоохтас салған Че иң пастап, республикаа Ӱӱс паза Таштып аймаандағы Ӧлең чазы ааллардағы школаларны пӱдірібізерге кирек полча.

- Хайди даа сидік полза, пӱӱл піс ікі школаны пӱдірібізербіс. Іди полбаза, федеральнай син паза піске ізенмес, ӱгредіг паза имнег учреждениелерін пӱдірерге ахчанаң полыспас, - чооғын узаратхан Виктор Зимин.

Таныхтирға кирек, Орджоникидзе аймаандағы Ӱӱс аалдағы школа 2013 чылдаң пӱдірілбин сыххан. Анда 250 орыннығ школа поларға кирек полған. Аймах пазы Алексей Попковтың искіриинең, «Июсский» совхоз изел парғанда, орындағы хай пірее чуртағҷылар, тоғыс чохтаңар, кӧс парыбысханнар. Аалда чиит сӧбірелер саны хызырылған, аннаңар амды улуғ школа пӱдірерге кирек чоғыл. Іди ӱлгӱдегілер Ӱӱс аалда 150 орыннығ школа пӱдірерге чарадығ алғаннар. Пӱдіріг тоғыстарынаң Хызылчардағы «Панорама» компания айғазар.

Пу ирткен чыылығда республика пазы Виктор Зимин читіре пӱдірілбеен школа туразынаңар чоох апарған. Аны сайабас ӱчӱн, республика пазы анда социальнай объекттер ит саларға чарадығ алған. Кӧзідімге, спорт залы. Ол школада орныхпаза, анда ӱӱстегілерге спортнаң айғазарға чарир полар. Хакасияның пазы Виктор Зимин, чыылығда араласхан министерство-ведомстволарның устағҷыларына пу сурығны хысхаҷах тусха пӧгібізерге чахаан.

Пу чыылығда ідӧк кӧрілбеен сурығ кӧдірілген. Хайди таныхтаан Виктор Михайлович, республика пазынзар социальнай сеть пастыра Ағбан пилтірі аймаандағы Чапаев аалның чуртағҷызы айлантыр. Чиит іҷенің чооғынаң, аалдағы олған садында палаларны иирде азырабинчалар. Городта тоғынчатхан іҷе-пабалар тоғыс соонаң палаларына орай ла парчалар. Аның сылтаанда палаҷахтар иирге теере астап парчалар. Ідӧк олған садында пала ӱчӱн тӧлег паазы аарлығ одыр. Мындағ кирек республика пазының кӧңніне кірбеен. Пу сурығны пӧгерге Виктор Зимин позының орынҷызы Ирина Смолинаа паза Хакасияның ӱгредіг паза наука министрі Лариса Гимазутинаа чахығ пир салған. Хайди ол таныхтаан, ӱгредіг учреждениелерінде ле нимес, ідӧк имнег учреждениелерінде палаларны хайди азырапчатханын сыныхтирға кирек, паланың чиизі иң хорғыс чох ползын.

Чыылығда ідӧк Чапаев аалдағы чоллардаңар чоох парған. Пу аалда чуртағҷылар хас-хаҷаннаң чахсы чол чох ирееленчелер. Андағы чолларны паза тротуарларны иптеп саларға ідӧк чарадығ алған Виктор Зимин. Пу посёлок чыл сай алғыдылып одырча, чиит сӧбірелер анда, чир алып, чурт пӱдірінчелер. Чиит іҷелерге палаларынаң пас чӧрер истіг орын полар ӱчӱн, хайди даа тротуар кирек.