Танығлығ кӱнде Ағбан город пазы Николай Булакин чиит специалисттерге ахчалығ сертификаттар паза дипломнар читірген. Лауреаттар 10 номинацияда араласханнар: хазых хайраллиры, чииттер политиказы, ӱгредіг, искусство паза даа пасхазы.

«Спорт» номинацияда, тізең, иң артых Дмитрий Казыгашев пол парған. Ол Ағбанда олғаннарның спорт школазында тренер-преподаватель полча. Хаҷан-да ол позы пу школазар чӧрген полған, соонаң, тізең, Хакас хазна университедінің физическай культура факультедінзер ӱгренерге кірген. Дмитрий, тренер полып, 2013 чылдаң істенче. Тоғынчатхан туста ол, аймах спорт марығларында аралазып, узын кӧдірче. Чиит ӱгретчі каратэҷа тилекей чемпионы (Япония, 2013 чыл), хол-азахнаң хабысханынҷа Россия чемпионы (Орел г., 2016 чыл) паза хол-азахнаң хабысханынҷа тилекей чемпионы полча (Москва г., 2017 чыл).

Палаларын Дмитрий Казыгашевтің холына пирер ӱчӱн, іҷе-пабалар ӱр сахтапчалар. Кӧп пала аның секциязына чӧрерге сағынча. Іҷе-пабалар паза Дмитрийнең хада тоғынчатхан арғыстары аны тоғысха кӱс паза амыр хылыхтығ тренер тіп таныхтапчалар.

«Имнег кирее» номинацияда чиит терапевт Анна Колмакова артых полыбысхан. Анна ӱр ниместе университет тоосхан. Хайди чоохтапчалар аның хада тоғынчатхан арғыстары, имҷінің участогында ағырчатханнарның саны иң асхынах. Чиит специалист улуғларнаң иптіг чоохтазарға пілче. Ідӧк Анна аймах имнег-наука журналларында статьяларын сығарча паза профессиональнай марығларда аралазарға кӱстенче.