Казановта Чыл пазы хайди ирткеннеңер искірбин, тыстанмадым. Пӱӱл аны Казановтағы ортымах школа, аалдағы клуб паза Казановтағы музей-заповедник хада-пірге иртіргеннер. Аалҷыларны Казановтағы музей-заповедниктің устағҷызы Виктория Кулемеева алғыс сӧстерінең удурлаан. Анаң кибір хоостыра От инені азырааннар. Отта ағырығларны паза чобағларны таныхтапчатхан хара ӧңніг чаламаларны ӧртееннер. Соонаң ах, кӧк паза хызыл чаламаларны хазыңа палғап, амыр хоных сурынғаннар.

Уғаа хынығ ойыннар турғысханнар паза сарыннар сарнааннар. Ипчі чон хакас кип-азахтығ уғаа сіліг кӧрінген. Хакас сарыннар кізілерні аптааннар. Ойыннарны аалдағы клуб тоғынҷылары Любовь Иптышева паза Оксана Сербигешева тимнееннер. Школа ӱгретчілері кізілерге пала кирчеткен кибірні кӧзіт пиргеннер. Ӱгренҷілер аразында «Ӧткіннер» марығ иртіргеннер. Олғаннар хакас литературазынҷа, культураҷа паза тархынҷа пілістерін кӧзіткеннер. Іди пастағы орында Вячеслав Саражаков, ікінҷізінде Кира Килижекова, ӱзінҷізінде Дамир Майнагашев пол парғаннар.

Ідӧк спорт марығлары полған. Ооллар урух тастааннар, охчаадаң атханнар, арғамҷы тартысханнар. Пастағы орынны «Ах пуға» чииттер ӧмезі, ікінҷі орынны школадағылар, ӱзінҷі орынны аалдағылар алып алғаннар.

Ӱлӱкӱн прайзының даа кӧңнін кӧдірген полар. Амды пасха даа пайрамнарны хынығ таныхтирға тимдебіс.