Амғы туста, хайда ниме полғанын піліп-кӧріп алар ӱчӱн, газеталар паза телевидение искіріглерінең пасха, Интернет пастыра піліп аларға чарир. Ағбанда ирткен «Хакасияның кічіг короназы» паза «Хакасияның пастағы короназы» марығларның чиңісчілері ідӧк иң пурнада социальнай сетьтерде сығарыл парғаннар. 7 частығ София Макаренко кічіглернің аразында Гран-прині холға кирген, 17 частығ Алина Аскаракова «Хакасияның пастағы короназы» атха турысхан.

Че амды абахайлар пайрамын пос хараанаң кӧрген кізілернің пірсіне газета пастыра сағыстарынаң ӱлезерге чарадыңар.

Мындағ марығлар Хакасияда пастағызын на иртірілді. Ӧӧн пӧгін - республикада чурттығ аймах чоннарның сілиин, культуразын паза нацияларның ынархазын кӧзіт пирері. «Хакасияның кічіг короназы» паза «Хакасияның пастағы короназы» марығларның тӧстегҷілері республикадағы абахайларның паза чайаачыларның академиязы паза «Асхыр» хакас чииттернің пірігізі полчалар. Олар Хакасияның национальнай политика министерствозы паза чииттер киреенҷе_комитет полызиинаң иртірілгеннер. Ӧӧн хабазығны, тізең, Хакасия правительствозының кнезі Виктор Михайлович Зимин иткен. Аның адынаң чиңісчілерге алғыстастығ пічіктер паза асхынах нимес синніг ахчалығ сертификаттар читірілгеннер. Устағҷы кізее позына, тоғыс хоостыра, пу пайрамнарда поларға киліспеен, че ол азынада пазылған видео пастыра прай араласчыларны алғыстаан.

Амды кічіглернің мариинаңар. Анда 23 хызыҷах араласхан. 4 - 6 частығларның аразында пастағы орынны Дарья Семёнова утхан. Таныхтирға кирек, ағаа іҷезі, сіліг кӧгенектер тимнирінең пасха, сценада ойын турғызарға полысхан. олар ікӧлең, цирктегі чіли, хаски адайны, конфеттер пиріп, аймах нимелерге ӱгрет салтырлар. Сӧбіренің тӧрт азахтығ нанҷызы хызыҷахты машинаҷахта даа тарт чӧрген.

7 - 9 частығ араласчылар аразында «Хакасияның пастағы короназы» атха Алина АСКАРАКОВА турысхан

пастағы орынны Есения Брем холға кирген. Ағбанда чурттығ хызыҷахтың хорыхпас хылиин таныхтирға кирек. Чох, мында сценазар сығар хорғыстаңар чоох парбинча... 6 частығ Есения теелбегін сӱлейкелерде кӧзіткен! «Мин позымнын хорғыстарымны хайхастарға айландырчам», - чарытхан ол прайзына.

9 - 12 частығларның аразында, тізең, чарғыҷылар пастағы орынны Анастасия Майнагашеваа пирерге чаратханнар.

Паза пу марығның пір араласчызын алынҷа таныхтабызар сағыс пар. Эркелей Тюньдешева хакас чонның кип-чооғын хызыл диалектінең чоохтап пирген. Анын иптіг тілінең сах андох пілдірче - хызыҷах пос тілін пілче, аннаң чоохтасча! Ағаа «Этно-Стиль» садығ туразының устағҷызы Юлия Чаркова ӧнетін сыйых читірген.

Драма театрынзар чыылысхан чонның кӧңніне 4 частығ Мирослава Аткнина кірген. Кічіг частығ хызыҷахха сыйыхха 10 муң салковай паза Ырғах тағларзар чорыхха пар килер оңдай пирілген.

«Хакасияның кічіг короназы» марығның араласчыларының іҷе-пабаларын махтирға кирек. Олар иркеҷектеріне костюмнар тимнирге нинҷе кӱс паза нинҷе ахча салғаннар! Кӧзідімге «Авангардный костюм» номинацияны алып аларбыс. Іҷе-пабаларға хызыҷахтарына райдағы сад хустарын тимнирге киректелген. Павлиннер, ӧрбекейлер... Пірсі пірсінең сіліг полған. Марығны кӧрген кізілер полғанына ла тың чӧпсінген поларлар. иирні апарған чайаачылар нинҷе ис, нинҷе чӱг хорадылғанын прай чоохтап турғаннар.

Че национальнай кип-азахтығ сценаа сыхханда, кічіглернің дее, улуғларның даа мариинда араласчыларның ады-солазы паза чазы ла чоохтал турған. Кем хайдағ чонның кӧгенеен кискенін чарытхан ползалар, уламох чахсы поларҷых! Піс хакастарның кип-азаан чахсы пілчебіс, оларны сах андох таныпчабыс. Пасха чоннарның кӧгенектерін, тізең, чахсы пілбинчебіс, ӧнетін істеспеенде. Аннаңар мындағ сизіндіріг пазағы чылларда иртер марығларда хайди даа санға алылар тіп ізенчебіс.