ЫР-КӦГ ӰЛӰКӰНІ
26.06.2018
Хабарлар
Культура. В.Г.Чаптыковтың адынаң Хакас филармониязы 29-хы чайаачы сезонның халғанңы концертін иртірді.
**************************************************************************************
Чоохтирға кирек, пазағы сезон филармонияда пайрамнығ полар. Ідӧк 30 чылын филармонияның хойнында тӧреен «Ӱлгер» ансамбль таныхтир. 2019 чылда артисттер кӧрігҷілерні улуғ ойыннаң хайхадарға пӧгінчелер. Гала-концерт тузында, тізең, тилекейге саблан парған ӧменің араласчылары «Хобың, хобың», «Чорых ыры», «Чахайахтар» сарыннарны толдырғаннар. Полған на номерні «Кӱн сузы» ӧменің теелбектері чазааннар.
Пастағы пӧліктің халғанҷызында сценаа «Иренек хан» ӧме сыххан. Юлия Тиникованаң Аржан Туденев, хакас чонның ырларын наа оңдайнаң толдырып, кӧрігҷілернін чӱреен кӧӧреткеннер. Итсе-де, гала-концертке килгеннернің кӧбізі классика музыказын исчеттір, аннаңар мындағ ӧме парын пілбиндір. Іди дее полза, чир-суғҷыбыстың чайаачызы оларның кӧңніне кірген.
Чалахай иирнің ікінҷі пӧлии операа чарыдылған. Мында П.И.Чайковскийнің, Дж. Вердинің, Ж.Оффенбахтың операларының ӱзіктерін истерге чарир полған. Зинаида Аршанова Эльвираның ариязын («Эрнани» опера) морсымнығ толдырыбысхан. Саблығ ус Владимир Терешков Томскийнің сарынын («Пиковая дама» опера) таллап алтыр. «Каданс» хор чахсы кӧрінген. Хордағы хызыҷахтар кӧрігҷілерні «Евгений Онегин» операдаң алылған «Девицы-красавицы» ӱзікнең ӧріндіргеннер. Екатерина Кыштымованаң Валерия Кыржинакованы алынҷа таныхтирға кирек. Екатерина Ильинична ӱгренҷізінең хада Ж.Оффенбахтың «Гофманның нымахтары» операның ариязын чӱрекке теерте толдырғаннар.
Хакас филармонияның ойыннары чайаачы сыйых чох иртпинчелер. Пӱӱл сезонның халғанҷы концертіне ӧмедегілер Томсктағы баянист Сергей Сойменовты хығырып алтырлар. Ол оркестрнең хада композитор Р.Гальяноның «Ора-le Concerto» чайаачы тоғызын толдырған. Критиктер скрипкадаңар «ылғаан, хатхырған» пазарға хынадырлар. Музыкант Сергей Сойменовтың баяны андағох оңдайлығ полтыр. Кӧг тирии пастыра чайаачы ус кізінің сағыс-кӧрізін, чуртас чолын «чоохтап пирген» тиирге чарир. Чалахай иирні Артур Марлужоковнаң Юлия Белогурова апарғаннар. Олар филармониянаң хада тоғынчатхан спонсорларны паза СМИ-ларны адааннар. «Хабар» газетаны алынча таныхтааны уғаа чахсы.
Хакас филармонияның 30-ҷы сезоны хынығ ойыннарға пай полар. Аны 11 сентябрьда Чоннар аразындағы классика музыказының II фестивальы азар. Анда Европаның, Россияның, Хакасияның чиит музыканттары аралазарлар. Фестивальның хоос устағҷызы скрипач Анастасия Субракова полча. Филармониядағылар кӧрігҷілерні, чайғыда чахсы тынанып алып, хатап музыка пайрамнарына хығырғаннар.
Автор :
Майя КИЛЬЧИЧАКОБА
| Пн | Вт | Ср | Чт | Пт | Сб | Вс |
| 1 | 2 | 3 | 4 | 5 | 6 | 7 |
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде
