ӦӦН СУРЫҒ - СӦП-САП ТАРИФТЕРІ
01.02.2019
Хабарлар
Хакасияның Халыхтар палатазының кнезі Ольга ЛЕВЧЕНКО, депутаттар Александр ЖУКОВ паза Василий ШУЛБАЕВ сессия пасталар алнында ниме-де ӱзӱрчелер. Тариф суриин, арса?
Ӧӧркі Чӧп сессиязы. Хакасия депутаттары 30 январьда пу чылның пастағы сессиязына чыылысханнар. Ӧӧн сурығларның пірсі сӧп-сап реформазынаң палғалыстығ полған - депутаттар «правительство чазында» республика правительствозы пу сурығӌа хайдағ тоғыс апарчатханын истіп алғаннар.
СЕССИЯНЫ ХАКАСИЯНЫҢ ӦӦРКІ ЧӦП КНЕЗІ ВЛАДИМИР ШТЫГАШЕВ АСХАН. АНЫҢ ТОҒЫЗЫНДА РЕГИОН УСТАҒӋЫЗЫ ВАЛЕНТИН КОНОВАЛОВ ПАЗА ПРАВИТЕЛЬСТВО КІЗІЛЕРІ АРАЛАСХАННАР. АНЗЫ ТИКТЕҢ НИМЕС, ПУ СЕССИЯНЫҢ КӰН СУРИИНА «ПРАВИТЕЛЬСТВО ЧАЗЫ» КИРІЛГЕН. ДЕПУТАТТАРНЫҢ СӦП-САП РЕФОРМАЗЫНӋА АС НИМЕС СУРЫҒ ЧЫЫЛ ПАРТЫР. СӦП-САП ТАРИФТЕРІ - ЧУРТАҒӋЫЛАРНЫҢ ӦӦН САҒЫССЫРАЗЫ.
Че пастап Ӧӧркі Чӧп депутаттары республика законнарынзар алызығлар кирчеткен закон проекттерін ӱзӱргеннер. Тиксі алза, сурығлар саны кӧп полбаан. Кӱн суриинда пастап 15 сурығ турған, че ікі сурығ, оларны тимнееннернің сурынызы хоостыра, ӱзӱрігдең суурылған. Республика законнарынзар алызығлар ӧӧнінде пістің законнарны федеральнайларға килістіре тӱптестірер пӧгіннең кирілче. Оларҷа тоғыс комитеттерде паза комиссияларда азынадох апарылған, аннаңар пу тоғыс тохтағ чох паза чапчаң апарылған.
Хайығлығ сурығлар санында «70 паза 80 часха чит парған чуртағҷыларға кӧп квартиралығ турадағы тиксі тыхтағ ӱчӱн тӧлеглерін айландырарына компенсация пирҷең кӧрімніг хабазығдаңар» законзар алызығлар кирчеткен закон проекті. Республиканың социальнай арачыланыс министрінің тоғызын толдырчатхан Наталья Дьяченко, пу сурығҷа чоох тудып, кирілчеткен алызығларҷа социальнай хабазығ алчатханнарның саны алғыдылчатханын таныхтаан. Льготалығлар санынзар хоза I паза II группа кинектері кирілчелер тіп чарытхан ол. Закон пастағы паза ікінҷі хығырығда алыл парғанда, Ӧӧркі Чӧп кнезі Владимир Штыгашев депутаттарға паза закон проектін тимнеен министерстволарға алғызын читірген.
- Пу закон улуғ частығларның паза кинектернің чуртазын кӧмес тее полза нииктир, - таныхтаан Владимир Николаевич.
Паза депутаттар республиканың хазна ис-пайын приватизацияа пирҷең 2019 чылға прогнозтығ планын (программазын) чарадыға аларын ӱзӱргеннер. Республиканың хайдағ хазна ис-пайы объекттерін пӱӱл садыға сығарарға итчеткеннерінең Хакасияның ис-пай паза чир хайызығлары министрінің тоғызын толдырчатхан Дмитрий Панарин таныстырған.
Аның искіриинең, планзар 4 пӱдіріг кирілген, прайзы хазых хайраллиры объекттері - тузаланылбинчатхан фельдшер-акушер пункттары (ФАП-тар). Ол Асхыс аймаандағы Пирікчулдағы, Паза пилтіріндегі, Шира аймаандағы Чирімдегі паза Боград аймаандағы Абакано-Перевозтағы ФАП-тар. Азынада сананыстардаң, ол тузаланылбинчатхан объекттерні аукцион пастыра сатханы республика бюджедіне 1 миллион салковай парыс пирер.
Че Ӧӧркі Чӧптің экономика политиказынңа, промышленностьча, пӱдірігҷе паза транспортча комитедінің кнезі Василий Шулбаев, пу сурығҷа хоза чоох тудып, Паза пилтіріндегі ФАП туразын ол планнаң сығарарға чӧпнең айланған.
- Тузаланылбинчатхан хазна ис-пайы объекттерін приватизацияа пирерге кирек, - таныхтаан экономика политиказынча комитет кнезі. - Че мында ідӧк сурығның социальнай сарина хайығ саларға кирек.
Пу сурығны істескені чуртағҷыларға пастағы имнег полызиин пирерінде пістің улуғ сидіксіністер парын кӧзіткен. Паза пилтіріндегі ФАП, хайзын пӱдіреріне 5 миллион салковай бюджет ахчазы хорадылған, иргі пӱдіріг нимес - 2012 чылда пӱдірілген. Аннаң кӧні кӧстег хоостыра тузаланарға чарир. Аннаңар комитет аны планнаң сығарарға чӧп пирче.
Депутаттар комитеттің кӧрізінең чарас салғаннар, Паза пилтіріндегі ФАП туразы приватизация планынаң сығарылған. Олох туста ааллардағы имнег учреждениелерінің кадрлар суриина хайығ айландырылған.
- Хакасия правительствозына хазна ис-пайынаң тӱзімніг тузаланарын хатығ сыныхтаға аларға кирек, - сизіндіріг иткен Владимир Штыгашев. - Мындағ нимелер, хаҷан фельдшер-акушер пункты анда тоғынҷаң специалист табылбинчатхан сылтаанда ла садыға сығарылча, паза полбасха кирек.
Хакасияның пазы Валентин Коновалов правительство ол читпестерні тӱзедер тіп ізендірген.
- Хазых хайраллаҷаң министерстваа, мындағ ниме пол парғаны ӱчӱн, сизіндіріг иділер (объект пу министерствоның чӧбінҷе планзар кирілтір), - таныхтаан республика устағҷызы.
Сессияның ӧӧн сурии сӧп-сап реформазына чарыдылған. Республика правительствозы «правительство чазы» тузында депутаттарны тиксі Россияда пасталыбысхан реформа пістің республикада хайди чуртасха кирілчеткенінең таныстырған. Таныхтирға кирек, Хакасия правительствозы сӧп-сап реформазының салтарларын нииктирінҷе пір ай чарымҷа тоғын парир. Ӧӧн пӧгін - региондағы операторға сӧп-сап тарифтерін тың ӧскірерге пирбеске.
Ол тоғыс хайди апарылчатханынаңар Хакасияның чир-чайаан ис-пайы паза экология министрі Сергей Арехов чоох тутхан. Хайди ол таныхтаан, пу реформа наа полчатханынаңар правительство аны хатығ сыныхтағда тутча. Ӧӧн хайығ тариф хайди тӧстелчеткеніне паза сӧп-сап тузында тартылчатханына салылчаттыр. Чонға, пілдістіг, иң сағыссырастығ сурығ тариф полча. Нинҷе тӧлирге килізер пістің чуртағҷыларға амды сӧп-сап ӱчӱн?
Министрнің искіриинең, региондағы оператор полыбысхан «Аэросити-2000» ООО пирчеткен полызығларға тарифтернің паалары (Хакасияда сӧп-сап чыырынҷа 5 орын тӧстелген, оларның полғанында ла постың тарифі - 55 салковайдаң 138 салковайға теере) 2018 чылның ноябрьында, Хакасия пазы Валентин Коноваловтың инаугурациязы иртчеткен кӱнде, чарадыға алылған. Амды республика ӱлгӱлері пу киректі оңдайлир пӧгіннең региондағы операторнаң тоғынчалар, тарифтер ахча хорадығлары саринаң сылтағлығ полары ӱчӱн.
Региондағы оператор, пілдістіг, республикада сӧп-сап тартарына хорадығлар улуғ полча тіп, тарифтерін пӧзік арах идерге кӱстенче. Аннаңар республика правительствозы, ол киректі сыныхтағда тудып, позы саринаң істезігліг тоғыс апарчаттыр.
- Сыныхтағ тузында піс читіре таарлалбаан мусоровозтарны ілезіне сығарғабыс, - искірген депутаттарға Сергей Арехов. - Ӏди республикада сӧп-сап кӧп полчатханын кӧзіт пирерге кӱстеністер иділче. Прайзы пілче, ол «кии» ӱчӱн чуртағҷыларға тӧлирге килізер. Піс андағ ниме идерге пирбеске кирекпіс. Аннаңар мында пістің сағыс-кӧрізібіс хатығ: региондағы оператор чуртағҷылар тӧлеен полған на салковай ӱчӱн нандырығ тударға кирек.
Сӧп-сап ӱчӱн пастағы тӧлеглер чуртағҷыларға февраль пасталчатса килер тіп чоохтаан министр. Андада региондағы оператор хайдағ паалар турғыс салғаны кӧрін парар. Республика правительствозы, тізең, позы саринаң пӧзік тарифтерні тӱзіртіреріне прай кӱзін салар тіп ізендірген.
Депутаттар «правительство чазында» аймах сурығлар пиргеннер. Чӧптер полғанох, ол санда «Аэросити-2000» ООО-наң чӧптезігні тохтадар оңдай тілирдеңер. Ареховтың искіриинең, пу сурығҷа правительство, пасха регионнарнын опыдын ӱгреніп, тоғыс апарча. Че мында аның орнына пасхазы килерін санға аларға кирек, аннаңар региондағы операторның тоғызын хатығ сыныхтағда тутчаң оңдайны тимнирге кирек ле тіп таныхтаан Хакасияның чир-чайаан ис-пайы паза экология министрі.
Владимир Штыгашев правительстваа пу сурығҷа чарыдығлығ тоғысты ӧткін арах апарарға чӧп пирген.
- СМИ-ларда пу сурығны удаа паза тохтағ чох чарыдарға кирек, - таныхтаан Ӧӧркі Чӧп кнезі. - Ол сӧп-сап чыырынҷа пис орыннаңар чарыда чоохтап пирiңер. Оларда хайдағ паалар? Андағох чарыдығлығ тоғысты Хакасияның город-аймахтарында апарарға кирек. Депутаттар даа узы-пазына сых полбинчатханда, чон хайдаң оңарар?
Салтарында Ӧӧркі Чӧп Хакасия правительствозының сӧп-сап суриинҷа искірии иділгенін чарадыға алыбысхан, ол чарадығзар ідӧк депутаттарның чӧптері кирілген.
Автор :
Альберт ТОЛМАШОВ
| Пн | Вт | Ср | Чт | Пт | Сб | Вс |
| 31 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
