ЧӰРЕКТЕҢ СЫХХАН АЛТЫН ЧОНЫБЫСХА КӰС ХОССЫН
13.03.2019
Хабарлар
Хакасияның писательлер ӱлӱкӱнiнде
Тилекейдегі писатель кӱні. «Хрусталь перозы» Хакасияда 2011 чылдаң таныхталча. Анда пасчатхан улусты чеестепчелер.
КӦРІК АЙНЫҢ ПАСТАҒЫ КӰННЕРӀ ӰЛӰКӰННЕРГЕ ПАЙ ПОЛТЫР. 1986 ЧЫЛДАҢ СЫҒАРА 3 МАРТТА ТИЛЕКЕЙДЕ ПИСАТЕЛЬ КӰНІН ТАНЫХТИРЫ КИБІРГЕ КІР ПАРҒАН. АЙМАХ ПРОФЕССИЯЛАР КОП, ОЛАРНЫ ТАНЫХТАПЧАТХАН ӰЛӰКӰННЕР ПАР. ЧЕ ПИСАТЕЛЬ - ОЛ ПРОФЕССИЯ АЛАЙ БА АНЫ ХАЙДАҒ КӦРІМГЕ КИРЕРГЕ? ПАСЧАТХАН КІЗІЛЕРНІ ЧАЙААЧЫЛАР, КӰЛӰКТЕР, ХЫЙҒАЛАР, ТИРЕҢ САҒЫСТЫҒЛАР ПАЗА ДАА ПАСХА СӦСТЕРНЕҢ АДИРҒА ЧАРИР. ПИСАТЕЛЬЛЕР ЧУРТАСХА УЛУҒ ХОЗЫМ ИТЧЕЛЕР, ОЛАРНЫ ЧОН УЛУҒЛАПЧА.
ХАКАСИЯДА, РОССИЯНЫҢ ПАСХА РЕГИОННАРЫНДАҒОХ ЧІЛИ, ПИСАТЕЛЬЛЕР ПІРІГІЗІ ТОҒЫНЧА. АНЫҢ ТАРХЫН ЧОЛЫ 1920 - 1930 ЧЫЛЛАРДА ПАСТАЛҒАН. «ХЫЗЫЛ ААЛ» ГАЗЕТАДА ПАСТАҒЫ КИБЕЛІСТЕР, ОЧЕРКТЕР ЧАРЫХ КОРГЕННЕР. ПИСАТЕЛЬЛЕР ПІРІГІЗІНІҢ ПАСТАҒЫ КІЗІЛЕРІ НИКОЛАЙ ДОМОЖАКОВ ПАЗА ИВАН КОТЮШЕВ ПОЛҒАННАР. НАНДЫРЫҒЛЫҒ ХАЧЫ Н.Г.ДОМОЖАКОВ 28 МАРТТА ХАКАСИЯНЫҢ ПИСАТЕЛЬЛЕР ПІРІГІЗІНІҢ ТӦРЕЕН КӰНӀН ТАНЫХТИРДАҢАР ЧАРАДЫҒ АЛЫБЫСХАН.
2019 чыл Хакасияның писательлеріне уғаа танығлығ: орындағы писательлер пірігізіне - 70 чыл, М.Е.Кильчичаковха 100 час толча, ідӧк республикада Писательлер чылы тіп чарлалған.
Хакасияның культура министрі Леонид Ерёмин, чайаачы улусты алғыстап, чоох тутхан:
- Писательлер кӱні прайзына танығлығ. Пічік культуразы полған на хазнаа кирек. Піс хыйға сӧсті халых чуртассар кирерге, писательлернің тоғыстарын чонға читірерге кӱстенчебіс. Хакасия правительствозы пасчатхан улусха литература сыйыхтарын чарлаан. Кибелістерні чайапчатханнарға Моисей Баиновтың адынаң прозанаң айғасчатханнарға Николай Доможаковтың адынаң сыйыхтар пирілче.
Писательлер Александр УРАНОВ, Анатолий СУЛТРЕКОВ, Юрий ЧЕРЧИНСКИЙ
Пайрамнығ туста писательлерібіске пілдірте полызығ пирілче. Ідӧк кинделер пасчатханы чуртаста уғаа кирек полчатханын чонға читірерлер. Ағырсымнығ сурығларның пірсі авторларға гонорар тӧлирі полча. Че пу паза пасха даа сурығларны пӧгербіс. Прайзына пик хазых паза чайаачы чидіглер!
Леонид Валентинович писательлер пірігізіне 100 муң салковайға ахчалығ сертификат читірген. Хакасияның писательлер пірігізінің кнезі Алевтина Васильевна Курбижекова сӧс кӱзінеңер чоохтаан. Писательлер пу киректе устар полчалар нооза.
- Аарлығ пістің писательлерібіс, сірерге тоозылбас-парбас чайаачы чидіглер алғапчам. Пероңар чітіг ползын, чалтырама тоғыстар сыхсыннар. Узах частығ полыңар, наа тоғыстар чайаңар, чолыңарны чииттер пассыннар! - искірген А.В.Курбижекова.
Н.Г.Доможаковтың адынаң национальнай библиотеканың директоры Юлия Костякова писательлер книгалары сибер хайраллалчалар паза чонға читчелер тіп чоохтаан. Библиотека писательні хығырығҷынаң «тоғастырҷаң» орын полча нооза. Че книга чарыхха сыхпаанда, хығырығҷы холына ол кірбес. Аның ӱчӱн книга издательстволары тоғынчалар. Писательлернің паза издательствоның аразында ӱзілбес палғалыс пар тиирге чарир. Хакас книга издательствозының устағҷызы Вячеслав Тутатчиков пу наада чарыхха сыххан М.Е.Кильчичаковтың олғаннарға 80 страницалығ киндезін сыйыхха ағылтыр. Анда Михаил Еремеевичтің чарыхха сыхпаан тӧрт строкалығ кибелістері пирілче. «Олғаннарға хакас тілінең кинделер асхынах сығарылчалар. Кічіглерге кӧп арах пазарға кирек», - искірген Вячеслав Михайлович.
Асхыс аймааның Чоғархы Тӧӧ аалындағы М.Е.Кильчичаковтың адынаң литература музейінің устағҷызы Надежда Боргоякова писательнің 100 чазына чарыдылған мероприятиелер пӱӱл кӧп поларын таныхтаан. Наа пасчатхан чииттер чалахай иирде алғыстастарын читіргеннер.
Хакасияның писательлер пірігізіне паза литераторлар туразына сыйыхтар пирілген. С.П.Кадышевтің адынаң культура кінінің артисттері сіліг кӧг-теелбектерінең чыылған чонны ӧріндіргеннер.
Хрусталь - ол сӱлейке, аны ӧтіре ибіркіні кӧрерге чарир. Писатель кізі ибіркіні пос кӧрізінең паалапча. Анаң сағыс-кӧрізін хоос сӧснең чонға читірче. Пасчатхан чайаачыларыбысха пероларын холда пик тударға алғапчабыс. Пӧзік учуғыс сірерге паза наа тоғыстар.
Автор :
Елена САГАТАЕВА
| Пн | Вт | Ср | Чт | Пт | Сб | Вс |
| 27 | 28 | 29 | 30 | 31 | 1 | 2 |
| 3 | 4 | 5 | 6 | 7 | 8 | 9 |
| 10 | 11 | 12 | 13 | 14 | 15 | 16 |
| 17 | 18 | 19 | 20 | 21 | 22 | 23 |
| 24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде
