СІЛІГ ЫРЛАРНАҢ КӦРІГӋІЛЕР ЧӰРЕЕН КӦӦРЕТКЕН
28.05.2019
Хабарлар
Концерт. С.П.Кадышевтің адынаң культура кінінде чиит хайҷы Дмитрий Сафьяновтың чалахай иирі ирткен
Пӱӱлгі часхы чиит устарның концерттеріне пай. Мартта хакас кӧглеріне хынчатхан улусты чайаачызынаң 17 частығ Регина Тоскоракова ӧріндірген. Таланттығ хыс ХГУ-ның музыка колледжінде ӱгренче. Апрельде абахай Сабрина Толмачёва, ыр-сарыннар толдырып, кӧрігҷілернің чӱреен кӧӧреткен. Ол концерт «Хакасияның чиит ӱннері» филармонияның проекті хоостыра иртірілген. 25 майда, тізең, хайынаң «Кӱн чахайағы» ансамбльның хоос устағҷызы Дмитрий Сафьянов хайхатхан.
Таштып чирінең сыххан хайңы - тыс пілбес кізі. Ол саблығ ӧменең устирға, хакас чонның кӧг тиріглері оркестрінде ойнирға, сарыннар пазарға паза фестиваль-марығларда аралазарға маңнанча. Кӧзідімге, 2018 чылда ла Дмитрий Сафьяновтың устаанынан «Кӱн чахайағы» ӧме тӧрт фестиваль-марығда узын сынаан. Ол санда артисттер Францияда ирткен Искусстволар фестивальында, аралазып, махтаға сыхханнар.
Концертті чир-суғҷыбыс «Чарыс» адап салтыр. Анда аралазарға ол арғыстарын, «Кӱн чахайағы» ансамбльын хығырған. Чалахай иирні национальнай оркестрнің музыканттары асханнар. Искусство институдының студенттері хакас кӧг тиріглерінең хайди морсымнығ ойнапчалар. Оларны истіп, залдағы чон тынминыбысхан чіли пілдірген. Ідӧк морсымнығ Аржан Туденев кӧрінген. Алтай чонның оолғы «Ыр сағаа» композициянаң кӧрігҷілернiң чӱрее-паарын хайылдырған.
«Кӱн чахайағы» ансамбльның солизі Иван Шулбаевті кізілер ізіг айа сабызынаң удурлааннар. Аның улуғ чидиинеңер прайзы даа искен полар. Пу наада Монт Дор городта (Франция) «Сансибири чылтыстары» чоннар аразындағы марығ ирткен. Иван, анда аралазып, «Хыллығ кӧг тиріглер» номинацияда пастағы орынға сыххан. Аны марыға ХГУ-ның ӱгретчізі Людмила Кирбижекова тимнептір. Концерт тузында чайаачы ус Дмитрий Сафьяновтын «Чайғы чолда» сарынын пӧзік синде толдырыбысхан.
Аарлығ аалҷыларның санында Россияның саблығ артизі Евгений Улугбашев, Хакасияның чон артизі Нина Идимешева паза «Хан Сын» ӧме полғаннар. Чоохтирға кирек, Дмитрий Сафьянов - саблығ хайҷының ӱгренҷізі. Евгений Александровичтің устаанынаң чиит кізі чатхан сабарға паза хайлирға ӱгренген. Е.А.Улугбашев, ӱгренҷізінің концертіне киліп, ағаа мыннаң мындар узын таптирға, пӧзік чидіглерге чидерге алғаан. Нина Идимешева, тізең, Дмитрийнің тай пабазын, саблығ поэт Василий Барашковты, сағысха кирген. Аның адын хумартхылап, артисттер «Чоллар» сарынны толдырғаннар.
Концерттің ікінҷі чардығында ӧӧнінде Дмитрий Сафьянов сарнаан. Чиит кізінің ӱні хайдағдыр! Аймах оңдайнаң хайлаанда, кӧрігҷілернің ӧрінізі пу чир полбаан. Итсе-де, хакас оол морсымнығ сарнапчатханын паза пӧзік устығ музыкант полчатханын прайзы даа пілче. Че чалахай иир тузында Дмитрий композитор узынаң хайхатхан. Іҷезі Илиана Сафьянованаң хада ол илееде кӧг-сарын чайап салтыр. «Чуртас оды», «Ада чир-суум», «Чарыс», «Матырлар тузы» ырлар залдағы чонның кӧңнін кӧдіргеннер.
«Салбых кӱргеніндегі хараа» чир-суғҷыбыстың композициязы минің кӧңніме кірген. Аны музыкант абахай Алина Аскаракованаң хада хобырахтарнаң толдырғаннар. Ол кӧгні истіп, кізі чиит тузын, ізіг чайғыны сағысха кирче, чуртаста прай ниме оңдайлан парар тіп киртінче. «Чарыс» ырны чайап, Дмитрий Сафьянов, рок кӧглеріне тӧстенген полар. «Кӱн чахайағы» ӧме аны толдырғанда, харах алнында хакас чазыларынҷа ойлат париған аттар хоосталчалар.
Чиит хайҷының «Чарыс» концерті чахсы ирткен. Ол кӧрігҷілерге чиит устарның чайаачызынаң танызып аларға оңдай пирген. Чалахай иир ӧӧнінде Дмитрий Сафьяновтың кӧглерінен пӱткені махтағлығ. Пістің чонға наа сарыннар кирек. Мыннан мындар чиит хайҷы, узын тилідіп, аннаңох кӧп кӧг-сарын пазар тіп ізенчебіс.
Автор :
Майя КИЛЬЧИЧАКОВА
| Пн | Вт | Ср | Чт | Пт | Сб | Вс |
| 1 | 2 | 3 | 4 | 5 | 6 | 7 |
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | 31 | 1 | 2 | 3 | 4 |
Кӱн таңмазы
Хакасияда
Россияда
Тилекейде
