ЧАРЫХ ЧЫЛТЫС ЧІЛИ ТӦРЕЕН ХАКАСИЯ
08.07.2019
Хабарлар
Республика кӱні. Хакасияның ӧӧн городы Ағбанда «Аллығ чирім» ӱлӱкӱн ойынынаң Республика кӱні таныхталды
Пӱӱл Хакасия республика чіли Россияның субьекті полыбысханынаң 28 чыл толча. 1991 чылда Хакас автоном облазы Хакас Республикаа айлан парған. Чалахай иирде Ағбанның чуртағҷылары паза аалҷылары Пастағы май ачығынзар «Аллығ чирім» концертті кӧріп аларға килгеннер.
Чон алнынзар Россияның паза Хакасияның саблығ артизі Евгений Улугбашев В.Г.Чаптыковтың адынаң Хакас филармониязының симфоническай оркестрінең хада сыххан. Саблығ кӧгҷі чатхан кӧӧ паза хойығ хайы пастыра кӧрігдіні пурунғы Хакас чирінзер «апар килгенге» тӧӧй полған. Ӱлӱкӱн концерті, кибірліг кӧглернең пасталып, аннаң андар хомыс ойынынаң узарадылған. Россиядағы Дельфийскай ойыннарның алтын медаль чиңісчізі Юрий Шалгынов, симфоническай оркестрнің солизі полып, хомысха пазылған ойынны толдырған. Таныхтирға кирек, хомысха ӧнетін пазылған ойыннаң Хакас филармониязы пастағызын на чон алнынзар сыхты. Сценадаң чайылчатхан кӧглер хоостыра правительство туразы ӱстӱндегі Россия паза Хакасия флагтары чайхалыс турчатханнар. Хомыс ойыны пірде амыр, пірде тыыда пар сыхча. Ол туста сағынчазың - хайдағ-да кічиҷек хомыс симфоническай оркестрні позының соонда апарчатханы уғаа морсымнығ! Че пістің дее кічіг республикабыс хазнабысты тилітчеткен регионнарның санында нимес пе.
Концерт программазын «Джинсылығ симфония: тилекей кӧглері» проект узаратхан. Чыылған чонны тохтағ чох сарыннарынаң филармония солисттері Хакасияның паза Алтайның саблығ артизі Артур Марлужоков, Хакасияның саблығ артизі Ольга Васильева, Мария Сиротиненко, Олег Гриценко ӧріндіргеннер. Олар «Кино», «Машина времени», «Пинк Флойд», «Куин» саблығ ансамбльларның ырларын толдырғаннар. Олғаннар паза
чииттер, улуғлар даа, кӧг-сарыннар хоостыра теелбек салып, матап кӧглескеннер.
Хакасияның пазы Валентин Коновалов чыылған чонны ӱлӱкӱннең алғыстаан:
- Изеннер, Хакасияның аарлығ чуртағҷылары! Алғыстапчам прайзын Республика кӱнінең! Ол Хакасияа хынчатханнарның, аның тилізіне кӱзін паза чайаачызын пирчеткеннернің ӱлӱкӱні полча. Хакасияның чуртағҷылары хазнаның культура паза наука тилізіне улуғ хозым итчелер! Пӱӱн піске республиканың кибірлерін, пай культуразын хайраллап халарға киректелче.
Республика правительствозы саринаң чон чуртазын чахсыландырар тоғыс апарылча. Хакасияның ӧңненізі полған на чуртағҷының кирее ползын. Хада-пірге тудынзабыс, сидіксіністерні хаҷан даа иртербіс. Пос кӱзіне киртінелер! Полған на кізі чемпион ползын, пӧзік салтарларға чит турзын! Хыныс, хазых прайзына, толдыра чуртас сӧбірелеріңе!
Пу сӧстер соонаң площадьха толдыра чыылған чон «Хакасия! Хакасия!» пір ӱннең хысхырған. Филармонияның солисттері «Каданс» хорның ырҷыларынаң «Хакасия» ырны толдырғаннар.
Автор :
Елена САГАТАЕВА
| Пн | Вт | Ср | Чт | Пт | Сб | Вс |
| 31 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 31 | 1 | 2 | 3 |
Кӱн таңмазы
Хакасияда
Россияда
Тилекейде
