АБАЗАНАҢ СОРЫҒНЫҢ ИҢ ТАНЫҒЛЫҒ ПАЙРАМЫ
23.07.2019
Хабарлар
Металлург кӱні. Ирткен неделяда Абаза паза Сорығ городтар Металлург кӱнін алғым таныхтааннар. 19 июльда Абазадағы тимір тас аныпчатхан рудниктің иң чахсы тоғынӌыларын чеестееннер
ТІСПЕН ІСТЕНІСТЕРІ ТУРЫСТЫРА ПААЛАЛДЫ
Пайрамнығ мероприятиеде Хакасияның пазы Валентин Коновалов паза Ӧӧркі Чӧп кнезінің пастағы орынҷызы Юрий Шпигальских араласханнар.
Валентин Коновалов Абаза город пазы Валентина Филимонованаң паза Абазадағы рудниктің директоры Виталий Михеевнең хада, саайлан парған тағҷыларға чарыдылған мемориал комплексінде пол киліп, монументке чахайахтар салған.
Металлург паза город кӱннеріне чарыдылған пайрамнығ мероприятие Абазаның Культура туразында ирткен. Залға кӧп чон чыылыс парған. Килгеннернің кӧбізі - Абазадағы тимір тас аныпчатхан рудниктің тоғынҷылары.
- Абазаға чир-чайаан ис-пайына паза чуртағҷыларына поғдархирға чарир. Тимір тастығ чирлері табылғаны город тӧстирінде улуғ туза полча. Пір предприятие ибіре тӧстелген город пір профильліг тіп адалча. Рудникте тоғынҷылар рекордтар турғысханнар паза пӧзік тоғыс чидіглеріне читкеннер. Предприятиенің таңдағы кӱні город чуртағҷыларына паза республикаа уғаа танығлығ полча. Абазаның тилізі рудникнең пик палғалыс парған. Городтың тиліҷең оңдайларын хайраллап халар, предприятие ӧңненізіне оңдайлар тӧстир ӱчӱн, піске кӧп хайығ саларға кирек.
Абазаның прай чуртағҷыларына городха хынчатханнары, тоғыстары ӱчӱн алғызым читірчем! Прайзына хазых, часка, пастағларда оң ползын тіп алғапчам! - алғыстаан чуртағҷыларны Валентин Коновалов.
Абазадағы тимір тас аныпчатхан рудниктің тоғынҷыларына, металлургия промышленнозында тӱзімніг тоғынчатханнары паза алынҷа туза итчеткеннері ӱчӱн, Хакасияның Аарластығ пічіктері читірілгеннер. Сыйых алғаннарның санында Анатолий Скулов паза Владимир Петров полғаннар. Александр Шиферовха, Вячеслав Егоровха паза Владимир Юрьевке Хакасия пазының алғыстастары читірілген. Предприятиеде кӧп чыл тоғын салған пасха даа тоғынҷылар Аарластығ пічіктерге, алғыстастарға турысханнар.
Хакасияның Ӧӧркі Чӧп кнезінің пастағы орынҷызы Юрий Шпигальских пайрамға килген чонны Ӧӧркі Чӧптің адынаң Город кӱнінең паза Металлург кӱнінең алғыстаан.
- Абаза город - ол, металлургтар городынаң пасха, ідӧк ынағ тоғысчы ӧмелер городы. Мында халых организациялары уғаа чахсы тиліпчелер. Кӧзідімге, кинектер, ветераннар пірігістері, ТОС-тар. Абазада сидік тее оңдайлар полза, халых пірігістері ӧткін тоғынчалар паза тиліпчелер, - теен Юрий Шпигальских.
Абазадағы тимір тас аныпчатхан рудник 70 азыра чыл тоғын салған. Амды аның сидік тус. Че город чуртағҷылары, Хакасия правительствозының хабазиина ізеніп, рудник толдыра кӱзінең тоғын сығарына паза анда анылчатхан тимір тас хазнаның металлургия предприятиелерінде кирексіністе поларына ізенчелер.
Пайрамнығ иирде Абазаның чайаачы ӧмелері, артисттері концерт турғысханнар. Ырҷыларның сарыннары Абаза городха чарыдылғаннар. Ырларда чонның городха хынызы, поғдархазы истілген.
СОРЫҒДАҒЫЛАР КОМБИНАТТЫҢ ПАЙРАМЫН ТАНЫХТАДЫЛАР
Пу ирткен субботада, 20 июльда, Сорығ город пір саңай ӱс пайрам таныхтады: Город кӱнін, Металлургтар кӱнін паза Сорығдағы молибден комбинадының (ГОК) пайрамнығ 70 чылын.
Сорығның ӧӧн площадьында город чуртағҷыларына «Минің городым - минің ӱлӱзім!» пайрамнығ концерт ирткен. Анда орындағы артисттер, чайаачы ӧмелер сарыннар толдырғаннар паза теелбектенгеннер.
Пайрамнығ кӱнде ооғас наңмырағас пірее туста кинетін чаап килӌең, тӱрчедең, тохтап, кӱн чарып сыхчаң. Че ол чуртағӌыларның кӧңнін тӱзірбеен. Ӱлӱкӱн пасталар алнында городтың ӧӧн площадьынзар чон илееде чыыл парған. Чиит іӌе-пабалар кӧп полған. Олар, кічіг палаӌахтарын коляскаа одыртып алып, пайрамға килгеннер. Кибірли Сорығдағы ГОК-тың тоғынӌылары паза ветераннары істеніс колонназынаң культура паркына теере пастырғаннар. Анда оларға концерт кӧзіділген паза иң артыхтарын таныхтааннар.
Сорығдағы молибден комбинады 70 чыл пір кӱнге дее тохтабин тоғынча. Ол хазнаның металлургия помышленнозының ӧӧн кӧстее полча. Комбинат Сорығ город чуртағӌыларына хоза тоғыс орнын пирче. Анда полған на 3 паза 4-ӌі чуртағӌы істенче. Аннаңар Металлургтар кӱні полған на кізее улуғ пайрам полча.
Хакасия пазы Валентин Коновалов, Металлургтар кӱніне паза Сорығдағы молибден комбинадының пайрамнығ 70 чылына чарыдылған мероприятиеде аралазып, аның тоғынӌыларын чылығ алғыстаан паза иң чахсы тоғынчатханнарына Правительствоның Аарластығ пічіктерін читірген.
- 70 чыл мының алнында молибден комбинады тоғын сыхханда, мында улуғ нимес поселок тӧстелген. Ол чыллардаң «ӧскен» паза тилеен. Соонаң ағаа «город» статузы пирілген. Ол кӧп чонға тӧреен чирі пол парған. Амды комбинатта илееде кізі істенче. Пу кӱнде алынӌа алғыс сӧстері комбинаттың ветераннарына. Сірернің кӱстенізіңер сылтаанда амды городта тоғыс орыннары, сӧбірелерге палаларын ӧскірер чахсы оңдай пар, - таныхтаан Валентин Олегович.
Город чуртағӌылары Александр Михайловичнең Валентина Владимировна Ерохиннер ГОК-тың істеніс ветераннары полчалар. Оларның істеніс стажын хозыбысса, 80 чыл пол парча. Александр Михайлович Сорығзар істенерге Хызылчардаң килген.
- 1972 чылда Сорығзар улуғ суғ килген. Туралар прай суғ алтында пол парғаннар, илееде кізінің тыны ӱзілген. Аның соонаң городты хатап пӱдіргеннер. Комбинатта тоғынӌылар чидіспинчеткен. Тоғысха кірерге килгенімде, мині сах андох алғаннар. Чарым чыл пазынаң пір пӧліктіг квартира пиргеннер. Чурт парда, сӧбіремні Хызылчардаң кӧзір килгем, - сағысха кирче істеніс ветераны.
Александр Михайлович 43 чыл тыхтағ цеғында энергетик полып тоғын салған. Ол аймах техниканың электродвигательлерін тыхтаӌаң. Аның хада хонғаны Валентина Владимировна пастап комбинаттың столовайында істенген, анаң аны резиналардаң ниме-ноолар итчең цехсар алып алғаннар.
- Чуртирға кирек анда, хайда тоғыс пар. Сорығда пістің 2-ҷі паза 3-ӌі палабыс тӧреен. Полған на пала тӧрізе, комбинат улуғдаң улуғ квартира пирӌең. Ӱзінӌі палабыс тӧреенде, комбинат піске 3 пӧліктіг квартира пирген, - чоохтапча Валентина Владимировна.
Амды Ерохиннернің улуғ оолғы, іӌе-пабазының чолынӌа парып, пуох комбинатта істенче. Ерохиннер осхас сӧбірелер Сорығда илееде. Комбинатта олар тӧлдең тӧлге істенчелер. Аннаңар Металлургтар кӱні полған на чуртағӌаа чағын паза улуғ пайрам полча.
Ол кӱн ӱлӱкӱн орай иирге теере ирткен. Анда Ағбанның паза Саяногорсктың чайаачы ӧмелері концерт кӧзіткеннер. Пайрамнығ иир улуғ фейерверкнең тоозылған.
Автор :
Оксана ЧЕЛТЫГМАШЕВА, Оксана СУНЧУГАШЕВА
| Пн | Вт | Ср | Чт | Пт | Сб | Вс |
| 29 | 30 | 31 | 1 | 2 | 3 | 4 |
| 5 | 6 | 7 | 8 | 9 | 10 | 11 |
| 12 | 13 | 14 | 15 | 16 | 17 | 18 |
| 19 | 20 | 21 | 22 | 23 | 24 | 25 |
| 26 | 27 | 28 | 29 | 30 | 31 | 1 |
Кӱн таңмазы
Хакасияда
Россияда
Тилекейде
