ТОҒЫС - ПАСТАҒЫ ОРЫНДА
02.08.2019
Хабарлар
4 августта - Тимірчолҷы кӱні. Сергей Чистогашев Хызылчар тимір чолының Ағбандағы Локомотив депозының электровоз машинизі полча
ЧЫЛ САЙ АВГУСТТЫҢ ПАСТАҒЫ ПОЗЫРАХ КӰНІНДЕ ТИМІР ЧОЛҶЫЛАР ӰЛӰКӰНІН ТАНЫХТАПЧАЛАР. ТИМІР ЧОЛДА МОНТЁРЛАР, МАШИНИСТТЕР, ОЛАРНЫҢ ПОЛЫСЧЫЛАРЫ, ПРОВОДНИКТЕР, СИГНАЛИЗАЦИЯ ЭЛЕКТРОМЕХАНИКТЕРІ, ВАГОННИКТЕР, ДИСПЕТЧЕРЛЕР ПАЗА ПАСХАЗЫ ДАА ТОҒЫНЧАЛАР. ЧЕ МАШИНИСТТІҢ ТОҒЫЗЫ ИҢ АРТЫХТАРНЫҢ ПАЗА НАНДЫРЫҒЛАРНЫҢ САНЫНА КІРЧЕ ТІЗЕ, САБА ПОЛБАС. МАҒАА ЭЛЕКТРОВОЗТЫҢ МАШИНИЗІ СЕРГЕЙ ЧИСТОГАШЕВНЕҢ ТАНЫЗЫП АЛАРҒА ӰЛӰС ТӰСКЕН.
ТОҒЫС - ПАСТАҒЫ ОРЫНДА
- Асхыс аймаандағы Таштып пилтірі аалда тӧреем, ӧскем. Андағыох школада ӱгренгем. 2001 чылда 9 класс тоозыбызып, Асхыстағы училищеде «Мастер сельскохозяйственного производства» специальностьха ӱгренгем. Паба-іҷем - Иван Михайлович паза Клавдия Степановна Чистогашевтер. Олар ікізінең тынағдалар, Таштып пилтірінде чуртапчалар. 2004 чылда, училище тоозыбысханда, армияа хығыртылғам. Службаны Железногорск городта ирткем. Армия соонаң Ағбанда аймах тоғыстарда істенгем. Арғызым Виталий Глебов, машинистке ӱгреніп, тоғыс таап алған. Анаң мині Хызылчардагы тимір-чолҷыларның ӱгредіг кінінде ідӧк машинисттің специальнозын аларга чӧптеен. 2007 чылның сентябрьында ӱгреніп пастаам. 2008 чылда машинисттің полыcчызы полыбысхам, - чоохтаан Сергей Чистогашев.
Электровозтың машинизі поларын ол андада пілбеен, че чуртазы тимір чолнаң палғалыс парған.
Сергей Чистогашев тимір чолда 11 чыл тоғын салған, оларның 8 чылын машинисттің полыcчызы полып. Амды 3-чі класстыг электровоз машинизі полча, Ағбаннаң Саянскка читіре поездті апарча. Чолның узуны - 400 км. Машинистке полысчызынаң хада пір ле саринзар 12 час парарға кирек. Аннаңар олар чолға сығар алнында чахсы тынанып алчалар. Саянсксар читкенҷе, пір сын азыра паза 8 тоннель ӧтіре иртібісчелер. Поездті сынҷа 40 азыра километр тартарға кирек. Аны ікі электровознаң тартар ӱчӱн, Кошурниковтың станциязында электровозты поезд соонзар турғызарга кирек. Саянсксар читсе, Сергей полыcчызынаң хада тынағ туразында тохтапчалар, анаң нандыра килчелер. Электровоз машинисттерінің чорыхтар графигі чоғыл. Машинист паза полысчызы чорыхха тимде ползалар сыхчалар. Чорыхха пар килген соонда 2-2,5 кӱн тынанарға пирілче. Анаң пазох парарга кирек.
- Тимір чолда тоғынарга кӧңніме кірче. Хада тоғынчатханнарнаң удур-тӧдір полызысчабыс. Улуғ опыттығ машинисттер чӧптернең полыс пирерге хаҷан даа тимделер. Кӧбізі пис чылдаң кӧп істен салған. Машинисттiң уғаа маң чох тоғыс. Ӱлӱкӱннерде дее ибде полбинчабыс. Наа чылны чолда удурлирға удаа киліс парча. Полыcчымңаң хада, ізіг чей ізіп, Наа чылны удурлапчабыс. Минің тоғызым - пастағы орында, - теен Сергей.
Ипчізі Нурияның тоғызы ідӧк тимір чолнаң палғалыстығ. Ол Ағбандағы локомотив депозындағы тынағ туразының дежурнайы полча, чолдаң тынанчатхан бригадаларны чорыхтарға ысча. Чистогашев ирепчі ікі оолагас ӧскірче. 2017 чылда сӧбіре тимірчолҷылар ипотеказына ӱс пӧліктіг квартира садызып алған. Пу ипотека чылда 9 азыра процентке пирілче, че аны алған кізі чылда 4,5 процентін тӧлепче. Мындағ оңдайнаң тимір чол тоғынҷылары чуртха чидінчелер алай чурт оңдайларын чахсыландырып алчалар.
Сергей Чистогашев, пӧзік ӱгредіг алып паза узын кӧдіріп, 2-ҷі класс, соонаң 1-ғы класс квалификациязына чидерге пӧгінче. Паза иреннің ӧӧн кӧстее - палаларын ӧскір саларға, чон аразына турыстыра кир саларға.
Автор :
Оксана ЧЕЛТЫГМАШЕВА
| Пн | Вт | Ср | Чт | Пт | Сб | Вс |
| 29 | 30 | 31 | 1 | 2 | 3 | 4 |
| 5 | 6 | 7 | 8 | 9 | 10 | 11 |
| 12 | 13 | 14 | 15 | 16 | 17 | 18 |
| 19 | 20 | 21 | 22 | 23 | 24 | 25 |
| 26 | 27 | 28 | 29 | 30 | 31 | 1 |
Кӱн таңмазы
Хакасияда
Россияда
Тилекейде
