Хайди таныхтаан Хакасияның пӱдіріг паза ЖКХ министрінің тоғызын толдырчатхан Анатолий Безлепкин, анда пӧкчең сурығлар кӧп, оларны чарадарға кирек. Экология саринаң даа сурығлар сығысча, Хубачар аалда наа котельнай пӱдірер план тудылча, аны аал тастынзар сығарарға кирек полар...

Олох кӱн Хакасия пазы Валентин Коновалов Асхыстағы 3 № котельнайның тоғызын сыныхтаан. Аны Асхыс аал пазы Марина Анжиганова паза аймахтың сағыбаан саайларҷа комиссия кнезі Николай Асочаков удурлааннар.

Таныхтирға кирек, Асхыстағы 3 № котельнай банкрот поларына тоғыс апарылча, ідӧк анда тыхтағ тоғыстарын идерге киректелче. Ирткен неделяда котельнайда саай пол парғанда, Хакасия ӱлгӱлері аалда сағыбаан саай режимін кирібіскеннер. Хайди таныхтаан «Аскизтеплоснаб» предприятиенің пастығы Алексей Идимешев, аны хоостыра тураларзар чылығ суғ хомай пиріл сыххан.

- Хазаннардағы суғ хайнап сыхханда, піс оларның тоғызын тохтатхабыс. Октябрьда аал чӧбі котельнайға наа насос ал пирген. Хазаннар шлакка тун парғанда, піс оларны арығлап пастаабыс. Ам тураларзар чылығ тудығ чох пирілче. Че ізіг суғнаң ам даа сидіксіністер пар. Прай хазаннарны арығлабысса ла, пу сурығ пӧгілер. Амды чылығ пиреріне ӱс хазан тоғынча, пірсі - ізіг суғ пиреріне. Ідӧк пір - резервте, - чоохтаан Алексей Идимешев.

Аннаң пасха, пір хазанны алыстырыбызарға пӧгін турғызылған, ағаа тимнегліг тоғыстар апарылча. Прай толдырылчатхан тоғыстарға ахча республика бюджедінең позыдылған.

Пазағы чылда чарытхынаң тоғынчатхан котельнайларны чабарынҷа сурығ пӧгілер. Республика ӱлгӱлері пу тоғыста хабас пирерлер. Амды пір котельнайның тоғызын пасхазына пирібізеріне, паза хоза алынҷа котельнай пӱдіреріне пічіктер тимнебізерге киректелче. Пу проектке ахча кӧріл парған. Ӧӧні - предприятиелер чабылбазына тоғынары. Чуртағҷыларның чылығнаң паза ізіт суғнаң сидіксіністер полбазын сыныхтағда тударға сурынчам, - таныхтаан республика пазы Валентин Коновалов.

Хакасия ӱлгӱлері чурт-коммунальнай комплексте реформа иртіреріне тоғынчалар. Аны хоостыра правительствода тоғысчы ӧме тӧстелген, хайзынаң республика пазының пастағы орынҷызы Николай Миронов устапча. Аның ӧӧн пӧгіні - ЖКХ системазынзар кірчеткен прай организацияларның тоғызын сыныхтағда тудары. Онетін тӧстелген ӧменің тоғызының салтарларынҷа республиканың чурт-коммунальнай хонииның реформа планы тимнелер.

Хайдағ даа реформа чонның чуртазын чахсыландырарға кӧстелче. Полған на кізі позының тоғызын чахсы толдырза, тиксі тоғыс чахсы парар, андағ-мындағ сайбағлар даа, саайлар даа полбас.