ЧОНҒА ИМНЕГ ПОЛЫЗИИН ПИРЕРІНДЕ ЧИҢІСЧІЛЕР
25.12.2019
Хабарлар
Наталья КОГАН
Имнег кирее. Пӱӱл республикадағы чуғынӌах ағырығлар имнег туразы, «Россияның иң чахсы 100 ниме-ноозы» марығда аралазып, чонға полызығ пирер номинацияда чиңісчілер санында полыбысхан
Пӱӱнгі кӱнде республикадағы чуғынӌах ағырығлар имнег туразының ӧӧн имӌізі Наталья Коган полча. Ол андар устағӌаа турғызылғаннаң имнег туразы тиліс чолынӌа парча. Пӱӱл имнег туразының ӧмезі, «Россияның иң чахсы 100 ниме-ноозы» тиксі Россия марииның региондағы чардығында аралазып, «Чонға полызығ пирері» номинацияда чиңісчі полыбысхан. Оӧн имӌі хабарӌыларға марыға тимненістеңер паза салтарлардаңар искірген:
- Республикадағы чуғынңах ағырығлар имнег туразының ӧмезі «Россияның иң чахсы 100 ниме-ноозы» марығның «Хакасияның иң чахсы ниме-ноолары паза чонға полызығ пирері» регион синіндегі чардығында араласхан. Піс киректелчеткен пічіктерні, чыып, комиссияа ысхабыс. Марығ пис номинацияңа чарлалған: «Чоннарның хоос узанызы», «Ас-тамах», «Ниме-ноо сығарызында киректелчеткен техническаq товарлар», «Промышленность товарлары»паза «Чонға полызығ пирері». Марығ 30 июльдаң 6 августха теере ирткен.
Халғаны чылларда чонға имнег полызиин пирер кӧстегзер алызығлар кирілчелер. Пістің имҷілер, тиліс чолына турып, постарының пілістерін кӧдірчелер. Амғы туста имнег киреензер наа технологиялар кирілчелер. Пӱӱнгі кӱннің кирексіністерін толдырып, піс оларға тӧстенерге кирекпіс. Халғанҷы туста имнег оборудованиезін арығлир системаны, сағын таап, чуртасха киргебіс. Пістің имнег туразында хазыхха хорғыс ағылчатхан чуғынҷахтар кӧп нооза. Нинҷе оңдай пар, ол син наа технологиянаң тоғынарға кӱстенчебіс.
Айланған чонға имнег пирер чахсы оңдайлар тӧстепчебіс. 90 процент артиинаң кізі пирілген имнеге чӧпсінче. Халғанҷы туста олғаннар пӧлиинде тиксі тыхтағ тоғыстары иртірілген. Диагностика лабораториязы пӧлии нааҷылалған. Материально-техническай тӧстее чахсыландырылчатса даа, піс наука паза істезіг тоғызын апарчабыс. Чонға имнег полызиин пӧзік синде пирерге кӱстенчебіс.
Прай пу нимелер иділгені паза наа технологиялар кирілчеткені сылтаанда чиңіске килгебіс. Хайдағ даа марығ тоғысты паалир оңдай пирче. Ідӧк ӧменің пілізі паалалча, чонға имнег полызиин пирер тоғыс чахсыландырылча. Марығда пастағызын на араласхабыс. Че мыннаң мындар федеральнай синдегі марығда аралазарға сағынчабыс.
Марығда аралазып, имнег учреждениезінің тоғызын Наталья Коган арачылаан. Чиңіс сыйиин 22 ноябрьда алғаннар.
Автор :
Елена САГАТАЕВА
| Пн | Вт | Ср | Чт | Пт | Сб | Вс |
| 26 | 27 | 28 | 29 | 30 | 31 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 29 |
| 30 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
