Хакас Республиканың
онлайн газетазы

ХАРА ТАС ПААЗЫ ПАСХАЛАЛБАЗЫН

24.01.2020
Хабарлар
Чыылығ. Хакасия пазы Валентин Коновалов республиканың чурт-коммунальнай хонии хысхы тусты хайди иртчеткен сурығӌа теестегі чыылиин иртірген

Видеоселектор пастыра теестегі чыылығда араласханнар Хакасия пазының пастағы орынҷызы Николай Миронов, орынҷызы Юрий Курлаев, республиканың министерство-ведомстволарының устағҷылары, федеральнай органнарның, прокуратураның, МЧС-тың кізілері паза муниципальнай пӱдістернің пастары, нандырығлығ тоғынҷылары.

Хайди искірген Хакасияның пӱдіріг паза ЖКХ министрі Сергей Новиков, республикада прай коммунальнай предприятиелер олаңай режимде тоғынчалар. Регионның котельнайларында 78 муң тонна хара тас пилетелген. Асхыс аймаанда хара тас 7 кӱнге чидер, че Тӧӧ пазындағы котельнайда - 3 ле кӱнге, аннаңар анда сағыбаан саайлар режимі кирілген. Чағынғы туста пу сурығ пӧгіл парар. Сорығдағы Геологтар посёлогында хара тас 4 кӱнге чидер, Боград аймаандағы Бородино аалда - 8 кӱнге. Пасха муниципалитеттерде топливо читкіҷе тартылған.

Ирткен неделяда министерствозар чуртағҷылардаң 17 айланыс кірген (Ағбаннаң - 9, Харатастаң - 8). Оларның кӧбізінде квартираларда чылығ нормативке читпинчеткеннеңер искірілче. Ідӧк хоптар полған сӧп-сапты тузында апарбинчатханына паза ЖКХ полызығлары ӱчӱн тӧлег сині кӧдіре саналғанына. Прай кірген айланыстарҷа кирек тоғыс апарылған. Шира аймаандағы котельнайларға хара тасты пӧзік пааҷа тартчалар. Пу сурығҷа топливо тартчатхан организацияларнаң чоохтазығлар апарылар.

Ідӧк ікі саай полған Харатаста паза Саяногорскта. Пу городтарда чылығ пирчен сетьтер сайбалған орыннар ікі час аразына тыхталғаннар.

ЖКХ полызығлары ӱчӱн тӧлеглерҷе алымнарны чыырға чарғы приставтарынаң хада муниципалитеттер тоғынҷылары рейдтер иртірчелер. Чал ахчазын тузында тӧлирінҷе киректер алыспаан.

Муниципальнай пӱдістер пастары паза нандырығлығ тоғынҷылары постарының чирлерінде таныхталған читпестерҷе хайдағ тоғыс апарылчатханнаңар сан пиріс тутханнар.

Юрий Курлаев муниципалитеттер пастарынзар алынҷа сурығларҷа айланған. Іди Харатасха кізілерні изелчеткен туралардаң кӧзірерге правительство 15 миллион салковай позыттыр. Анда кӧп палалығ сӧбірені чағынғы туста хайди даа кӧзір саларға кирек. Боградта орамаларны чарыдар сурығ Россия президентінің приемнайында сыныхтағда тудылча.

Ідӧк чуртағҷылар тураларынзар суғ кірчеткеннеңер айланчалар, аны сыныхтағда тударға, кирек тоғыстар апарарға муниципалитеттер искіріг пирбинчелер. Ааллардаң суғлар тозапчатханнаңар айланчалар. Техника пар, республика полызарға тимде. Ағбандағы дамбаа хорғыс полар, аны тыхтирына паза тыыдарына правительствоның резерв фондынаң ахча позыдылар.

Валентин Коновалов пӱӱл республикада хар кӧп чаап парғанына хайығ айландырған.

- Суғлар чайыларына тимненіс планнары тимде ползын. Республиканьщ прай коммунальнай хонии сыныхталған. Регионда топливаа паалар пасхалалбасха кирек. Хара тастын качествозын кӧріп, ниик пааҷа таллап турыңар. Ідӧк аның кӧдірімін сыныхтағда тудыңар. Топливаа паалар пасхалалбас система ит саларға кирек, - теен Хакасия пазы.


Автор : Николай СУЛТРЕКОВ
←
  
  
→
Пн Вт Ср Чт Пт Сб Вс
27 28 29 30 31 1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30

Кӱн таңмазы
Хакасияда
Россияда
Тилекейде
Кӱн сомы