КИНЕКТЕРГЕ ПӦЗІК ТЕХНОЛОГИЯЛЫҒ ПРОТЕЗТЕР
26.02.2020
Хабарлар
Презентация. Ӱр ниместе Харатаста «Хакасияның протез-ортопедия предприятиезі» АО-да «Моторика» компания тоғынҷызынаң тоғазығ ирткен
Республикада «Хазии уйан кізілернің чуртастарының наа качествозы» стратегия пастаанаң «Моторика» социальнай проект чуртасха кирілче. Аның тоғызынаңар «Моторика» компанияның директоры Руслан Садыков чарытхан:
- «Моторика» - олаңай протезтер итчеткен компания нимес. Ол улуғ социальнай проект, хайзы иң пастап холларға протезтер турғысчаң прай индустрияны тилідер кӧстегліг.
Руслан Садыков Хакасия чуртағҷыларына протезтер хайдағ полчалар тіп чоохтаан. Кӧзідімге, ол хол протезін кӧзіткен, аның тоғынчатхан оңдайын чарытхан. Протезті холның узы тоғынчатхан чардығында турғызары кӧрілче. Ол хызыҷахха тимнелген протез полған, анзын хызыл паза хызамдых ӧңнер таныхтааннар. Руслан Садыковтың таниинаң, полған на протез кізее килістіре ӧнетін тимнелче. Оларны тимниріне SD-технологияларнаң тузаланчалар. Ідӧк хынған ӧңні таллап аларға паза кӧңніне чатчатхан хоос алай пічік ит саларға чарир. Пілдістіг, кічіг палаларны протез кизерге ӱгредерге кирек. Оларның кӧрімін ӧкер ит салза, андада олғаннар кизерге ынапчалар. Че оларға ідӧк ол протезтерге кӧнігерге кирек, аннаңар палалар реабилитация иртчелер. Анда олғаннарны протезнең ниме-нооларны тударға ӱгретчелер.
- Пу протезтер хазых хол чіли тоғын полбастар, че чардыхти хол тоғызын толдырчалар. Аар пасчатхан нимелерні хаап полбастар, че садығ туразынаң килчетсе, ниик сӱӱмектерні хаап чӧрерге чарир. Чей ізерге чірчені тударға чарир. Сизінген поларзар, ниме-нооны хаапчатса, чылғайахтан парбазыннар тіп, салаа пастары селиконнаң иділгенін. Чарым чыл пазынаң кізілер оох-теек тоғыстар ит сыхчалар. Ипчілер тырғах сырлапчалар, іңезер чіп кизіртіп алчалар, - чарытхан Руслан Садыков.
Презентацияда механика оңдайнаң тоғынчатхан протез кӧзіділген. Ол кічіг олғаннарға кӧрілче. Оларнаң палалар 16 - 18 часха теере тузаланчалар. Улуғларға, тізең, ӧӧнінде бионическай протезтер тимнелчелер. Олар кізі сиирі полызиинаң тоғынчалар.
Хакасияда пӧзік технологиялығ протезнең тузаланчатхан пала пар. Аның іҷезі Анна Боровская андағ протезке хайди чидінгенінеңер чарытхан:
- «Пастағы каналда» Елена Малышева «Хазых» передачада «Моторика» компанияның ӧӧн директорынаң тоғазығ иртірген. Анда пӧзік технологиялығ протезтердеңер чарыда искірілген. Ирткен чыл часхызын кӧзідігні кӧріп, компаниянаң палғалысхам. Олар палаа протезті тикке ал пирӌең ікі оңдайдаңар чоохтааннар: ол социальнай страхование фонды (ФСС) паза полызығ фонды хоостыра. Піс полызығ фондынаң палғалысхабыс. Киректелчеткен пічіктер прай тимнеп, сентябрьда протез тимде полған. Аның соонӌа Москвазар оолғымнаң пос ахчазына парғабыс. Протезті тимнирін чахаанда, паламның холын позым синеп, саннарны компаниязар ысхам. Хайди орта синирін мин пілбеен полғам, аннаңар протез палама чарабаан Оолғым реабилитация Москвада ирт полбаан. Компанияның специалисттері, паламның холын орта синеп, протезті тӱзеткеннер. Наа чыл тынағ кӱннерінде протез тимде полған. Тынағ кӱннері соонда пӧзік технологиялығ протезті алып алғабыс. Че ол хатабох палаа киліспинче, улуғ нимес тӱзедіг киректелче. Амды Руслан Садыков аны хатабох компаниязар апарар. Компанияның инженерлері, тӱзедіглер идіп, піске айландырарлар. Ізенчем, пу тӱзедіг соонаң прай чахсы полар, палам протезті кис полар.
Анна Боровская республикада реабилитация иртчең оңдай чоғылына хомзынған. Пастағызын на протез тимнел парғанда, Богдан оолғы аны хынып кискен, че протез холын ағырта пасчатханда, хынминыбысхан. Амды іҷезі паланы хайди чӧптирге пілбинче. Аннаң опыттығ специалисттер айғасса, уламох чахсы поларҷых тіпче іҷе.
«Моторика» компанияның тоғынҷызы Руслан Садыков презентация соонаң пӧзік технологиялығ протезтерні хазна полызиинаң хайди тикке алып аларға чарирын чарытхан.
Ол пічіктерні чахсы сизініп паза орта тимнирге чӧп пирген.
Автор :
Наталья ТЮКПЕЕВА
| Пн | Вт | Ср | Чт | Пт | Сб | Вс |
| 30 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 31 | 1 | 2 | 3 |
Кӱн таңмазы
Хакасияда
Россияда
Тилекейде
