ХАЙДИ ТӦЛЕЛЧЕЛЕР ЧАЛ АХЧАЗЫНҶА АЛЫМНАР?
11.03.2020
Хабарлар
Кӱн сурии. Хакасиядағы организацияларда чал ахчазынҷа алымнарын тӧлирдеңер сурығ ӱлгӱдегілернің хайиинда тудылча
Республиканың чуртас-істеніс хайызығларын оңдайлирынҷа ӱс сарилығ комиссия чыылиинда чал ахчазынҷа алымнарны тӧлирдеңер сурығлар ӱзӱрілгеннер. Чыылығнаң устаан Хакасия пазының орынҷызы Татьяна Курбатова. Анда істезіг комитеді, прокуратура тоғынҷылары, чарғы приставтары араласханнар.
Алымнығ организацияларның устағҷылары чал ахчазынҷа ӧдістерні хайдағ оңдайнаң тӧлирге пӧгінчеткеннеңер искіріглер тимнееннер. Алымнығ предприятиелер санындалар: МАВР, Ағбандағы ит комбинады, «Форпост-Агро», «Мельница», Харатастағы 2 № котельнай.
Кӧзідімге, МАВР паза Ағбандағы ит комбинады чал ахчазы алымнарын (8,8 миллион паза 7,5 миллион салковай) апрельнің халғанҷызынзар тиксі тӧлеп саларлар тіп искірілген чыылығда. Анда аны тӧлирінҷе график чарадыл парған. Харатастағы 2 № котельнайда андағ ӧдістерні (238 муң салковай) тӧлеп салар оңдай ідӧк пар осхас.
Че банкрот предприятиелерге пу сурығны пӧгерге сидік. Марығ пастыра турғызылған устағҷыларға, аны чарадар ӱчӱн, Арбитражнай чарғызар айланарға чӧп пирілген.
Чыылығда ідӧк социальнай партнёрство, электроннай істеніс книжказынаң тузаланар сурығлар хайығда полғаннар, «Профессияҷа иң чахсызы» марығның республика синіндегі чардығын иртірерін ӱзӱргеннер.
Автор :
Ольга КАРТИНА
| Пн | Вт | Ср | Чт | Пт | Сб | Вс |
| 25 | 26 | 27 | 28 | 29 | 30 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 29 |
| 30 | 31 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде
