ПОСХА ИМНЕНМЕСКЕ ЧӦП ПИРЧЕЛЕР
20.03.2020
Хабарлар
Пресс-конференция. «Хакасия» газета редакциязының конференц-залында республиканың министерство-ведомстволары специалисттері коронавирус (COVID-19) чуғынҷах ағырығдаңар чарытханнар
Тиксі чир ӱстӱн хорғыста тутчатхан наа чуғынҷах ағырығ Ағбанның чуртағҷызында табылғаны республика чуртағӌыларын чочындырча. Аннаңар министерство-ведомстволар кізілері Хакасияда ағырығнаң палғалыстығ киректеңер хабарҷыларға искіргеннер. Регион пазының орынҷызы Татьяна Курбатова чоох тутхан:
- Хакас правительствозының чарадии хоостыра коронавирус чуғынӌах ағырығдаң тоғыр паза профилактика тоғыстарынаңар пӧгіннер турғызылған. Амды ол тоғыстар прай толдырылчалар. Пӱӱнгі кӱнде оларны оперативнай штабтың устағӌызы, республика пазы Валентин Коновалов хайығда тутча.
- Хакасияда коронавирус чуғынӌах ағырығ тарирына піс тимде полғабыс, - хозылған чоохха Роспотребнадзорның Хакасияҷа управление усгағҷызының тоғызын толдырчатхан Татьяна Викторова. - Анзы пасха хан чирінзер путевкалар уғаа ниик паанаң садылчатханы кізілернің хайиин тартчатханынаң палғалыстығ. Кӧбізі ағырығдаң чочынмин даа чорыхха сығыбысча. Амды коронавирус чуғынӌах ағырығ тарапчатхан хазналарда пол пар килген кізілер 14 кӱн карантинде одырчалар. Оларзар имӌілер постары иблеп чӧрчелер.
Пу кӱннерде Таиландта тынанған чир-суғҷыларыбыс самолетнаң чидерлер. Оларны удурлап, ОРВИ ағырығ осхас симптомнығ кізілерні Харатастағы обсерваторияда чатырарлар. Пасхаларына 14 кӱн карантинде одырарға чӧп пирілер.
Хайди искірген Хакасияның хазых хайраллаҷаң министрі Владимир Костюш, имнег учреждениелері пӧзік синде тимделер. Наа чуғынҷах ағырығны имнирге киректелчеткен имнер паза аппараттар республикада читкіҷе. Коронавирус ағырығны кӧзітчеткен тест-системалар парлар. Кізее арачыланҷаң имнег маскалар ла чоғыл, че ол сурығ пӧгілче. Пу чағында олар садығда поларлар.
Специалисттер республика чуртағҷыларына иртіре сағыссырабасха чӧп пиргеннер. Чуғынҷах ағырығлардаң арачыланҷаң оңдайларға тудынарға. Посха ибде имненмеске чӧп пиргеннер.
Автор :
Наталья ТЮКПЕЕВА
| Пн | Вт | Ср | Чт | Пт | Сб | Вс |
| 27 | 28 | 29 | 30 | 31 | 1 | 2 |
| 3 | 4 | 5 | 6 | 7 | 8 | 9 |
| 10 | 11 | 12 | 13 | 14 | 15 | 16 |
| 17 | 18 | 19 | 20 | 21 | 22 | 23 |
| 24 | 25 | 26 | 27 | 28 | 29 | 30 |
| 31 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
