Айланыстарҷа тоғынарға маңнанчалар
26.12.2020
Хабарлар
Хакасияда коронавирус ағырығны тараттырбазынҷа оперативнай штабтың пӱӱнгi чыылиинда имнег учреждениелернiң устағҷыларынаң пасха республиканың iстенiс паза социальнай арачыланыс, ӱгредiг паза наука министрлерi араласханнар. Хакасия пазы Валентин Коновалов орынҷызы Юрий Курлаевтi ирткен сутканың кӧзiдiглерiнең таныстырарға сурынған.
Хакасияда наа чуғынҷах ағырығны 177 кiзi хаптырып алған, 196 кiзi хазыхтанып алған. Тиксi алза, пӱӱнгi кӱнде 3406 кiзi коронавирустаң имненче. 6 кiзi ӱреен, республикада тымо пасталғаннаң наа ағырығдаң 203 кiзi ӱредi.
Че айланыстар саны хызырылчатханнаңар искiрген Хакасияның хазых хайраллаҷаң министр Олег Ананьевский. Имнег тураларында даа пос орыннар ӧзе халған. Хакасия пазы Валентин Коновалов республиканың устағ кiнi чыыпчатхан айланыстарҷа чапчаң тоғынарға хығырған. Полған на штаб чыылиинда наа айланыстар читiрiлче.
Айланыстар саны хызырыл халғанда, имнег туралары полғанынҷа ла тоғынарға маңнанчалар.
Республиканың iстенiс паза социальнай арачыланыс министрi Ирина Ахметова социальнай учреждениелерде чуғынҷах ағырығдаң тоғыр апарылчатхан тоғыстардаңар искiрген. Андағох искiрiгнең чоох тутхан ӱгредiг паза наука министрi Лариса Гимазутина. Боградтағы ӧнетiн ӱгредiг учреждениезiнде пiр кiзi чуғынҷах ағырығны хаптырып алғаны мыннаң мындархы тоғысха сидiксiнiстер ағыларына хорғыс пар. Олох туста социальнай учреждениелерде тоғынҷылар тымо тузында тоғынчатхан ӱчӱн хоза тӧлеглер алчатсалар, пу интернаттығ ӱгредiг учреждениезiнде андағ тӧлеглер кӧрiлбеен.
Таңда, позырах кӱнде, штаб чыылыспас. Олег Ананьевский Хакасия пазы Валентин Коноваловха ағырығ тарапчатханынаң киректерҷе сан пирiс тудар.
Автор :
Наталья Субракова
| Пн | Вт | Ср | Чт | Пт | Сб | Вс |
| 29 | 30 | 1 | 2 | 3 | 4 | 5 |
| 6 | 7 | 8 | 9 | 10 | 11 | 12 |
| 13 | 14 | 15 | 16 | 17 | 18 | 19 |
| 20 | 21 | 22 | 23 | 24 | 25 | 26 |
| 27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде
