2020 чылның тоғызынӌа сан пирістер иділді
28.04.2021
Хабарлар
Хакасияның Ööркі Чöбінің 27-ӌi сессиязының кӱн суриина ікі сан пиріс сығарылған: Хакасияның Ööркі Чöп кнезі Владимир Штыгашев республика парламентінің 2020 чылдағы тоғызын чарыт пирген, Хакасия пазы Валентин Коновалов - 2020 чылда республика правительствозының тоғыс салтарларынаңар.
Депутаттарға республика пазының правительствоның 2020 чылдағы тоғызынаңар сан пирізі хынығ полған. Ирткен чыл хазнада наа чуғынчах ағырығны тараттырбазына паза аннаң кұрезіге улуғ хайығ киректелгенінең прайзына сидік ирткен. Тиксі Россияда, ол санда прай регионнарда, хазых хайраллирына паза имнег киреене өөн кұс салылған. Хакасияда имнег учреждениелернің тураларын паза ниме-нооларын наачылирына, сыныхтағ тиріглерін, ИВЛ аппараттарын садызарына 2 миллиардча салковай позыдылған.
Ибде одырар режим кирілгенде, иң аар чұк пос киреенең айғасчатханнарға артылған. Предприятиелер тоғызы тохтадылғанда, идінчектерге чал ахчазын төлирге киректелген. Хазнадаң пасха республиканың толдырығлығ ұлгұзі ідөк хабазиин пирген.
Че иң не сидік ахча сурии турған, парыстар тұсчеткенде, хайдаң хорадығларға, оларның өөн чардығы социальнай сурығлар, ахча аларға? Республика правительствозы прай сидіксіністерні пөкчең оңдай тапхан. Хакасиязар прай чуртас-экономика көстеглерінче чуртас синін чахсылардырарына федеральнай кіннең национальнай проекттерче, хазна программаларынча ахча 2019 чылдағызынаң даа көп тартылған.
- 2020 чылның бюджеді чуртасха кирілерге сидік тее полза, піс прай социальнай кирексіністерні толдырғабыс: чал ахчазы, льготалар төлелген, муниципальнай пұдістерге дотациялар позыдылған, - чарытхан Валентин Олегович.
Ағаа хоза прай город-аймахтарның республика бюджедінең алған кредиттері чабылған.
Валентин Коновалов позының сан пирізінде правительствоның тиксі тоғыс көстеглерін паза сидік сурығларны пөкчеткенін чарыт пирген.
Сан пирістердеңер чарыда искіріг пирілер хосхар айының 30-ӌы кӱніндегі сығарыста.
Автор :
Наталья Субракова
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде