ТУЗЫНДАҒЫ ПОЛЫЗЫҒ ЧУРТАС АЛ ХАЛАРҒА ПОЛЫСЧА
30.04.2021
Хабарлар
Сыйыхтас. 28 апрельде «Нымах» кӧклӧ театрында тиксі хазнада Табырах имнег полызиин пирҷең служба тоғынӌызының кӱні таныхталған
Хакасия пазы Валентин Коновалов, республиканың табырах имнег полызиин пирҷең службазының тоғынҷыларын ӱлӱкӱннең алғыстап, Аарластығ пічіктерні паза алғыстастарны читірген. Таныхтатханнарның аразында республиканың аймах-городтарының турыстығ имҷілері, фельдшерлері, медсестралары, диспетчерлері паза водительлері полған. Амғы туста Хакасияның табырах полызығ службазында тиксі 39 имҷі, 400 азыра кічіг паза ортын имнег тоғынҷызы істенче. Олар прайзы даа пандемия тузында постарын профессия саринаң чахсы специалисттер чіли кӧзіткеннер. Ирткен чыл республика чуртағҷыларына табырах имнег полызиин 46 бригада пирген. Олар тиксі 170 муң азыра хығыртыға чӧргеннер.
- Алғыстапчам сірерні Табырах имнег полызии тоғынҷызы кӱнінең. Пу ӱлӱкӱн ӱр ниместе таныхтал сыххан, ирткен чылда аны официальнай пайрамнар санына кир салғаннар Пӱӱнгі кӱнде сірернің тоғызыңар тың кирек полчатханын чахсы сизінчебіс. Хаҷан наа чуғынҷах ағырығнаң ағырчатханнарға имнег полызии тузында паза табырах киректелче. Пандемия тузында сірернің иңніңерге улуғ тоғыс паза нандырығ артылған. Сірернің нандырығлығ хайииңар кізілернің чуртастарын ал халарға полысча, - таныхтаан Хакасия пазы Валентин Коновалов.
Ідӧк Хакасияның хазых хайраллаҷаң министрі Олег Ананьевский паза Ӧӧркі Чӧп кнезінің орынҷызы Евгений Молостов, табырах имнег полызиин пирҷең служба тоғынҷыларын алғыстап, танығлығ сыйыхтарны читіргеннер.
Табырах имнег полызии пирҷең служба тоғынҷылары сидік туста хараа-кӱнӧрте чон чуртазы паза хазии ӱчӱн кӱресчелер. Олар хазых хайраллирында паза, кізілернең иптіг тоғынып, коронавирус чуғынҷах ағырығнаң кӱрезерінде улуғ хозым иткеннеңер, Хакасияның Аарластығ пічиин паза республика пазының алғыстазын 42 имҷі паза фельдшер алғаннар. Оларның санында Ағбандағы фельдшер Татьяна Топоева, Пии аймаандағы фельдшер Дмитрий Сагояков паза Таштып аймаандағы фельдшер Вениамин Шулбаев полғаннар. Ідӧк имнег тоғынҷыларына «Нымах» кӧклӧ театрында культура тоғынҷылары улуғ нимес концерт кӧзіткеннер.
Автор :
Наталья ТЮКПЕЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде