«ПАЛЫҒЛЫҒ» ЧИРЛЕР ЧОХ ПОЛЗЫН
30.04.2021
Хабарлар
2021 чыл - Наука паза технологиялар чылы. Хакасиядағы аал хонии сурығларынаң айғасчатхан наука-істезігліг институттың наа істезіглері чон хайиина сығарылды
Ученайларның республикадағы ис-пай аныл парған чирлерні нааҷылир технологияларының презентациязы Н.Г.Доможаковтың адынаң национальнай библиотекада ирткен. Анда Хакасия правительствозының кізілері, институттың ученайлары паза хара тас аныпчатхан предприятиелернің устағҷылары араласханнар.
Институт тоғынҷыларының искіриинең, пӱӱнгі кӱнге олар хазылған чирлерні пастағы кӧрімге нандыра айландырарынха, оларда ӧзім-ағастар хатап ӧскірерінҷе читі наа технология сағын таап алғаннар паза оларны чуртасха кирер ікі техника тимнел парған. Прайзының Россия синіндегі патенттері пар.
- Пістің республикада чир-чайаанны хайраллиры ӧӧн сурығларның пірсі полча. Пӱӱнгі кӱнде хайди ол пӧгілчеткені прайзына пілдістіг. Минің кӧрізімнең, Хакасиядағы аал хонии сурығларынаң айғасчатхан наука-істезігліг институт ол киректе улуғ тоғыс итче. Аннаңар мин чир ис-пайын аныпчатхан предприятие-учреждениелерге наука тоғынҷыларының технологияларынаң хайди даа тузаланарға чӧп пирерҷікпін. Прай нимее хоза, оларның паалары аарлығ нимес нооза. Пілдістіг, пу институтнаң хаҷаннаң пірге тоғыс апарчатхан предприятиелер пар. Анзы чахсы. Андағларның саны хозылча. Аннаңар олар ученайларның чирні нааҷылир технологияларынаң ідӧк ӧткін тузаланзыннар, - теен Хакасия пазының - Хакасия Правительствозы кнезінің орынҷызы Ольга Пономарёва.
Пу тоғазығда ол республика пазының адынаң Хакасиядағы аал хонии сурығларынаң айғасчатхан наука-істезігліг институттың устағҷызы Олег Ивановха профессиональнай узы паза наука тилізіне улуғ хозым итчеткен ӱчӱн Хакасия правительствозының алғыстас пічиин читірген.
Хакасия Ӧӧркі Чӧбінің адынаң, тізең, чоох тутхан парламенттің культураҷа, ӱгредігҷе паза наукаҷа комитедінің кнезі Оксана Разварина.
- Наукадағыларға паза бизнестегілерге пір чӧптіг тоғынары иң ӧӧні полча. Институттың чидіглерінең сынап ӧткін тузаланарға кирек. Ис-пайны аныпчатханнар чирде хайдағ «палығлар» артыс салчатханы кӧріндіре нооза. Аның ӱчӱн ӧсчеткен тӧлге Хакасияның пайын толдыразынаң артыс пирерге кӱстенерге кирекпіс, - таныхтаан ол.
Чоох тутхан соонаң депутат республикадағы аал хонии сурығларынаң айғасчатхан наука-істезігліг институттың кічіг наука тоғынҷызы Ольга Сафроноваа Хакасия Ӧӧркі Чӧбінің алғыстас пічиин читірген.
Паза презентация тузында хаҷаннаң пір чӧптіг тоғынчатхан пірігістер Хакасиядағы аал хонии сурығларынаң айғасчатхан наука-істезігліг институттың устағ-пастааның алғыстас пічиин алғаннар, ол санда «СУЭК-Хакасия» пірігіс.
2021 чылны Россияның президенті Владимир Путин Наука паза технологиялар чылы тіп чарлабысхан. Хакасиядағы аал хонии сурығларынаң айғасчатхан наука-істезігліг институттың наа істезіглерінің презентациязы ағаа чарыдылып иртірілген.
Наа технологияларнаң танызып аларға кемге дее чарир паза ученайлар оларзар айланған кізілернең улуғ ӧрініснең тоғынарлар тіп сағынчабыс.
Автор :
Александра КАРАМЧАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде