ХАЗЫР ХАРБАЗЫҒ, ӦТКІН ОЛҒАННАР
30.04.2021
Хабарлар
***********************************************************************************************
Спорт.Таштыпта Андрей Матеровтың хумартхызына чарыдылған киокусинкай каратэ-доӌа марығ 8-ӌі хати иртірілді
Араласчатхан олғаннар 8 - 13 частығлар. Марыға Ағбаннаң, Саяногорсктаң, Таштыптаң, Ермаковское аалдаң спортсменнер килгеннер. Ах киптіг каратисттер, оларның іҷе-пабалары, тренерлері, олаңай кӧрігҷілер Культура туразының залына толдыра чыыл партырлар. Тынҷаа чоғыл.
- Илья, че! Кӧңнің тӱзірбе, сапла!
Минің хыримда Ильяның пабазы одырча, палазының ӱчӱн чӱрее ағырчатханы кӧрінче. 10 частығ хакас оолах чахсы пастабысты, «ыырҷыны» тохтабин саплапча. Че нинҷе-де тус пазынаң кӱзі сыхчатханға тӧӧй, аннаң тоғыр харбасчатхан каратист ідӧк халғанҷы кӱзінең тудынча. Ікізінің кӧксі сапласхан соонаң кӧгерлече, сырайлары кӧйче. Пістің оолах утыр салды, ӱзінҷі ле орында пол парды. Іҷезі Ильяны, айап-часхарып, «чаа» орнынаң оортах апарча.
Пасха кибістерде 11 - 13 частығ хыстар ооллардаң даа хазыр харбасчалар. Кӧрігҷілернің харахтары оларда ла. Марығлазар алнында палалар пастарына, азахтарына, холларына арачыланҷаң ниме-ноо кизіп алчалар. Кӧмес нымзатча даа полар ыырҷының сабыстарын.
Прай пу арға-мӧрійде 155 спортсмен араластыр. Таштыптаң ікі команда полған. Пірсін Валерий Тинников каратэға кӧніктірче, ікінҷізін - Семён Кактояков. Пу ікі чиит ӱгретчі, Таштыптағы пастағы школада физкультура уроктарын иртіріп, киокусинкай каратэ-до секциязын апарча.
Хаҷан-да оларны пуох школада Виталий Валерьевич Асочаков каратэға ӱгреткен, амды олар постары тренер полчалар.
Пӱӱл марығ иртірер сурығларны Семён Кактояков позына артып алған. Ол Андрей Матеровты чахсы пілген, нанҷылар полғаннар. Че Андрей 21 частығда ӧртте саайланған. Кирек Хызылчарда полтыр, хайдар оол іҷезінен хада кӧс парыбысхан. Аймах-пасха орындағы, чоннар аразындағы марығларда аралазып, Андрей Матеров чиит тустох ізестіг чиңістер тутчаң. Хорғыстығ хыйал аның чуртазын іди кинетін апарыбысхан.
Хайди кӧрчебіс, махачы оолның ады ундудылбинча, аның киокусинкай каратэ-доға хынызын каратист-арғыстары киректерінде узаратчалар. Олғаннарны кічігдең сығара пу спорт кӧріміне кӧніктіріп, постың ӱчӱн турызарға, чиңіске теере харбазарға ӱгретчелер. Киокусинкай каратэ-до иң хатығ кӧрімге саналча.
Таштыптағылар пу марығда чахсы салтарға читкеннер. Валерий Тинниковтың ӱгренҷілері постарының кӧдірімнерінде мындағ орыннар алғаннар: Семён Сагалаков паза Илья Тюренев - I орын, Зарина Кольчикова паза Дмитрий Кузьмин - II орын, Ангелина Мамышева, Илья Токмашов, Дина Уксекова - III орын. Семён Кактояковтың олғаннары пис сыйыхтығ орын утып алғаннар: Алексей Преснецов - I орын, Артём Лухин - II орын, Александра Арыштаева, Владимир Тартынский, Павел Амзараков - III орын. Саяногорсктағы каратисттер иң кӱстіг полтырлар.
Семён Кактояков ӱлесче:
- Ахчанаң полысхан ӱчӱн нанңыларыма, таныстарыма паза идінҷектер Д.Е.Круговыхха, А.О.Кутузовха, Д.И.Тюринге, Е.Н.Тенге, депутат Н.Л.Кутузоваа улуғ алғызым читірчем. Оларның полызиинаң андағ чахсы кирек иділ парды.
- Семён Иванович, Сірер постарың марығларда араласчазар ба?
- Чох, мин халғанҷы туста олғаннарнаң на тоғынчам, харбаспинчам.
- Нинҷе частығдаң паланы каратэға пирерге чарир?
- 5-6 частығдаң даа чарир. Пастағы класстаң ӱгрен сыхса, пала тренировкаларға табырах кӧнік парча.
Анзы чахсы, кічігдең сығара каратэ секциязына чӧр сыхса, идің «алғыс» тиир. Сыбыра істензе, ол кӱстіг, табырах пол парча.
Автор :
Тарина БУТОНАЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде