Форум пайрамни азылды
15.05.2021
Хабарлар
Киӌее "Ағбан" гостиницада Сибирьдегi кинофорум пайрамни азылған. Анда Хакасия пазының орынӌызы Ирина Войнова, Россияның кинематографисттер пiрiгiзiнiң оргсекретарьы Михаил Калинин, "Тиксi Россияның чииттер кинофорумы" проекттiң директоры Дмитрий Якунин, актер, режиссер Кирилл Зайцев араласханнар. Видео палғалыс пастыра араласчыларны Хакасия пазы Валентин Коновалов, Россияның кинематографисттер пiрiгiзiнiң кнезi Никита Михалков алғыстааннар.
Соонаң сöс алған Дмитрий Якунин. Ол, чыылған чонзар айланып, пiс пӱӱл тиктең нимес мындағ алғым мероприятиенi Хакасияда иртiрерге чаратхабыс тiп таныхтаан. Хазнабыстың ööн городының килген аалӌының чооғынаң, пiстiң регионда кинематография тилирге пастапча. Ӱр ниместе тöстелген "Ветер перемен" киностудияның "Харах оды" кинозын эксперттер пöзiк паалааннар. Аннаңар Москвадаң килген аалӌылар Хакасияда пар ниме тилiдерге санапчалар. Iдöк олар "Хакасфильм" киностудияны уғаа пöзiк паалааннар.
Хакасия пазының орынӌызы Ирина Войнова форумның сыйыхтығ чыындызы 2 миллионға тиңнелче тiп искiрген. - Iкiнӌi сыйии хакас правительствозынаң полар. Аны пiс спонсорлар полызииинаң чыып алғабыс. Чиңiс тутхан режиссерға 1 миллион пирiлер алай iкi чиңiсчее - 500-ер муң. Че ööнi прайзының алнынзар сыххан режиссерға кинозын Хакасияда суурарға кирек полар. Пiстiң ол ööн пöгiнiбiс полча, - теен ол.
Чоохтирға кирек, кинофорумның пастағы кӱнiнде пастап пресс-конференция ирткен, хайда хабарӌыларны форумның программазынаң таныстырғаннар. Форум пайрамни азыл парғанда, прай аалӌылар постың регионында кинематография хайди тилiпчеткенiнеңер презентация кöзiткеннер. Хакас Републикадаңар искiрiгнi республиканың культура министерствозының амғы тустағы искусство пöлиинiң ööн специализi Ольга Воропаева тимнеен. Аның таниинаң, пӱӱнгi кӱнде Хакасияда 18 кинозал тоғынча. Олар регионның тöрт городында орныхчалар: Ағбанда, Харатаста, Саяногорскта паза Сорығда. Iдöк министерствоның Пииде паза Асхыста кинозаллар азыбызарға пöгiн пар осхас. Iдöк Ольга Ивановна аалӌыларны орындағы киностудияларнаң таныстырған. Пӱӱнгi кӱнде пiстiң республикада ӱс киностудия пар: "Хакасфильм", "Ветер перемен" паза "Книга степей". Олар пiстiң чуртағӌыларға Хакасиянаң палғалыстығ кинолар суурчалар.
Iзенiс пар, мындағ улуғ форум кинонаң айғасчатхан улусха наа тыныс пирер паза пiстiң республикадағы чайаачы чииттернi, тöреен чирiнең улуғ городсар парбин, мындох чуртап, узын тилiдерге кöстир.
Автор :
Ольга Томочакова
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде