Алнынзар ла хаалирға
16.05.2021
Хабарлар
Ана мындағ кöстеге тудынча Россияның актеры, режиссеры паза продюсеры Кирилл Зайцев. Аны амғы тöл "Движение вверх" хоос фильм хоостыра пiлче. Ол анда саблығ баскетболист Сергей Беловтың омазын чайапча. Таныхтирға кирек, Кирилл Зайцев пу роль ӱчӱн "Золотой орел" кинопремиязына турысхан!
Хакасиязар чайаачы усты Сибирьдегi чииттер кинофорумының экспертi поларға хығырғаннар. Пуох форум хоостыра Ағбандағы "Наутилус" кинотеатрда аның "Сашка. Дневник солдата" хысхаӌах хоос фильмi кöзiдiлген. Ол Илбек Ада чаада Сашка аттығ чааӌы немецтi ат полбаанынаңар хоос фильм. Ол кирек Илбек Ада чаа ветераны дневнигiн хатап хығырчатханы хоостыра кöзiдiлче. Кирилл Зайцев, анда комбаттың рольын толдырарынаң пасха, пу киноның режиссеры, монтажеры, продюсеры полча. Кöзiдiг соонда, "Диалог на равных" федеральнай проект хоостыра, улуғ залға толдыра чыылысхан чииттерге хазнаның ööн городынаң килген аалӌыдаң чоох алызар оңдай пирiлген. Ана андада пiстiң оол-хыстар аның чуртас чолынаң, чайаачызынаң, мыннаң мындархы кöстеглерiнең палғалыстығ сурығларына нандырығлар алып алғаннар. Че ööн чоох чон хайиина ам на сығарылған хысхаӌах хоос фильмнеңер апарылған. Авторның паза режиссерның искiриинең, "Сашка. Дневник солдата" Архангельск облазында суурылған. Ағаа тиксi 10 миллион салковай хорадылған. "Движение вверх" фильмнеңер сурығлар полғанох.
- Сынны чоохтаза, кинода суурынар опыдым пу фильмнең пасталған. Рольға кiрер ӱчӱн мин ӱр тус баскетболға чöргем. Iди пу ойынның оңдайларын чахсы пiлiп алғам. Аннаң сығара чуртазымда алнынзар ла хаалир кöстеге тудынып пастаам. Мыннаң мындархы пöгiннерiм уғаа кöп, чуртасха кирер проекттер iдöк асхынах нимес. Че сағам мин олардаңар чоохтабаспын. Тимге сых парзалар ла, искiрербiн олардаңар, - теен чайаачы ус Кирилл Зайцев.
Сибирьдегi чииттер кинофорумының программазы хоостыра Ағбан город чуртағӌыларына "Наутилус" кинотеатрда "Подольские курсанты" хоос фильм кöзiдiлген. Iдöк тикке.
Автор :
Александра Карамчакова
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде