ХАКАСИЯДА КИНО ТИЛІЗІНЕ НАА КӦСТЕГЛЕР ТУРҒЫЗЫЛАР
19.05.2021
Хабарлар
Сибирьдегі чииттер кинофорумы-2021. Ағбаңда 14 - 16 майда ирткен Сибирьдегі чииттер кинофорумы кинематографияда пастағы хаалағ итчеткен чииттерге чарыдылған
Сибирьдегі чииттер кинофорумы пайрамни азылар алнында, тиксі республикадағы хабарҷыларға «Ағбан» гостиницада пресс-конференция ирткен. Анда Хакасия пазының орынҷызы Ирина Войнова, Россияның кинематографисттер пірігізінің нандырығлығ хачызы Михаил Калинин, «Тиксі Россияның чииттер кинофорумы» проекттің директоры Дмитрий Якунин, артист, режиссёр Кирилл Зайцев, продюсер, «Российская газетаның» кино паза телевидение хабарҷызы Сусанна Альперина, СТВ компанияның ӧӧн редакторы Александр Архипов, «Яндекс. Студия» продюсерлер кінінің креативнай продюсері Владислав Рубин, кинорежиссер, телерадио хабарҷызы Михаил Довженко араласханнар.
Чоохтирға кирек, Дмитрий Якунин кинода пастағы хаалағлар итчеткен чииттерге полызарға кӧстегліг форумны тиксі хазнабыстағы регионнарда читінҷі хати пӱӱл иртірче. Читі чыл аразына ол форум полызиинаң чарыхха 150 азыра кино сых парған. Паза ол илееде кізее кинода пос чолын таап аларға полыс пирген. 2021 чыл тоозылғанҷа, чииттер кинофорумы Россияның 13 регионында иртер. Хакасияда, тізең, мындағ улуғ мероприятие пастағызын на ирткен. Аннаңар республиканың правительствозы паза Хакасияның культура министерствозы аны пӧзік синде иртірібізерге кӱстенгеннер. Форумның аалҷыларын олар хакас кибірлеріне тудынып удурлааннар.
Пресс-конференцияда пастап сӧс алған «Тиксі Россияның чииттер кинофорумы» проекттің директоры Дмитрий Якунин. Ол, чыылған чонзар айланып, піс пӱӱл тиктең нимес форумны Хакасияда иртірерге чаратхабыс тіп таныхтаан. Аның кӧрізінең, пістің регионда кинематография тиліп пастапча. Паза Москвадаң килген эксперттер ӱр ниместе тӧстелген «Ветер перемен» паза пістің республикада илееде чыл тоғын париған «Хакасфильм» киностудияларның тоғыстарын пӧзік паалааннар. Ідӧк аалҷылар «Книга степей» киностудияның «Харах оды» кинозынаңар чылығ ӱндескеннер.
«КӰН СУЗЫ» ААЛҶЫЛАРНЫ ЧАПСЫТХАН
Хабарҷыларны улуғ мероприятиенің программазынаң таныстырған соонаң, нинҷе-де тус пазынаң, «Ағбан» гостиницаның конференц-залында пайрамни форум азылған. Республикадағы филармонияның «Кӱн сузы» ансамбльы уғаа сіліг теелбекнең аалҷыларны хайхатхан. Хакас кип-азахтығ абахайлар сценада, сіліг хуулар чіли, теелбек салғаннар. Оларны кӧріп, пасха регионнардаң килген кізілер пістің абахайларыбысты теле-фоннарына суурғаннар. Анаң алғысчы чонға амыр, хазых чуртас алғаан.
Хайхастығ теелбектер соонаң тиксі чыылған чонзар видео палғалыс пастыра Хакасия пазы Валентин Коновалов, Россияның кинематографисттер пірігізінің кнезі Никита Михалков айланғаннар. Валентин Олегович мындағ улуғ форум Хакасияда иртчеткені орындағы чайаачы кӧрістіг улусха наа кӧстеглер пирер тіп таныхтаан. Никита Михалковтың чооғынаң, пӱӱнгі кӱнде форумнар, фестивальлар Россия кинозының географиязын алғыдарға полысча. Паза ол чииттерге питчингті турыстығ иртібізерге алғаан.
Анаң полған на аалҷы пос регионында кинематография хайди тиліпчеткеннеңер презентация кӧзіткен. Хакас Республикадаңар искірігні республиканың культура министерствозының амғы тустағы искусство пӧлиинің ӧӧн специализі Ольга Воропаева тимнеен. Аның таниинаң, пӱӱнгі кӱнде Хакасияда прай 18 кинозал тоғынча. Олар регионның тӧрт городында орныхчалар: Ағбанда, Сорығда, Харатаста, Саяногорскта. Культура министерствозы Пииде, Асхыста кинозаллар азарынаңар сағыс тутчаттыр. Ідӧк Ольга Ивановна аалҷыларны орындағы киностудияларнаң таныстырған. Чоохтирға кирек, пӱӱнгі кӱнде пістің республикада ӱс киностудия тоғынча: «Хакасфильм», «Ветер перемен», «Книга степей». Олар чир-суғҷыларыбысха Хакасиянаң палғалыстығ кинолар суурчалар. Халғанҷы ӱс чыл аразына пістің регионда 20 азыра кино чарыхха сых парған. Ол санға социальнай роликтер, мультфильмнер дее кірчелер.
Пасха регионнардаң килген аалҷылар ідӧк пос регионында кино хайди тиліпчеткеннеңер чоохтап пиргеннер. Прайзын истіп алған соонан полған на регионның чидіглері паза ағырсымнығ сурығлары пар полтыр тіп салтар идерге чарир. Че пірее регионнар, пір орында турбин, алнынзар чахсы хаалапчалар тіп таныхтирға кирек. Андағларның санында Томск город паза Омск облазы. Оларның регионнарында пір чылда илееде кино чарыхха сыхчаттыр.
КВАНТОРИУМДА - ОЛҒАН КИНОШКОЛАЗЫ
Форумның ікінҷі кӱнінде «Кванториум. Хакасия» технопаркта республиканың кічіг чуртағҷыларына олған киношколазы азылған. Анда артист, режиссер Кирилл Зайцев Кванториумдағы кино суурарына чарыдылған кружоктың араласчыларынаң тоғасхан. Пастап, улуғ аалҷыны чылығ удурлап, «Кванториум» технопарктың ӱгретчілері ағаа ӱгредіг кирее хайдағ кабинеттерде апарылчатханын кӧзіт пиргеннер. Артист андар кіргенде, олғаннар, компьютер кистінде одырып, аймах программаларда хайдағ-да тоғыстар толдырчатханнар. Кабинеттің пір пулиинда кино суурарға киректелчеткен оборудование турған. Режиссер, аны кӧріп, пӱӱнгі кӱнде олғаннарның талантын кічігдӧк тилідерге оңдай пар тіп таныхтаан. Минің олған тузымда андағ оңдайлар чох полған тіп чоохтаан ол. Пістің республиканың олғаннары, тізең, амды кинонаң палғалыстығ профессияларның тоғыстарынаң тирең танызарлар. Ідӧк оолах-хызыҷахтарға кино даа суур кӧрерге оңдай пирілер.
Класстарны кӧріп алған соонаң артист олғаннарнаң тоғасхан. Республиканың кічіг чуртағҷылары ағаа кӧп аймах сурығ пиргеннер. Ол сурығлар артисттің чуртазына, тоғызына теелгеннер. Кирилл Зайцев олғаннарға хайди артист полыбысханынаңар чоохтап пирген. Ідӧк ол кинонаң айғазарға сағынчатхан оол-хыстарға тузалығ чӧптер пирген:
- Кино - ӧменең суурылчатхан тоғыс. Анда артисттер, режиссерлар, сценаристтер, гримерлар, каскадерлар, звукооператорлар паза аннаң даа пасхазы араласча. Анзын ундударға чарабас. Кино суурарға сағыныбыссар, кӧңнiңерге кірчеткен темаа хайығ айландырыңар. Андада сірер пӧзік чидіглерге чидерзер. Паза мин сірерге кӧп книга хығырарға, кино кӧрерге, аймах кӧзідіглерге чӧр турарға чӧп пирерҷікпін.
Сизінгенде, олғаннар аалҷының алнында пір дее туртухпааннар. Тоғазығ тоозылғанда, прайзы режиссернаң хада сомға суурынған. Піреезі, блокноттар тудынып, аннаң автограф алған.
НИМЕ СУУРЧАЛАР ЧИИТТЕР?
Хакасияда ирткен кинофорумда Сибирьдегі чайаачы оол-хыстар суурчатхан киноларның ӱзіктері кӧзіділген. Амғы туста фильмнерні садыға сығарҷаң оңдай «скрининг-кӧзідіг» тіп адалча. Орта чоохтаза, режиссерлар сағыста ал чӧрчеткен проекттерін чон ӱзӱриине сығарчалар. Анаң, прай чӧптерні санға алып, ахчалығ хабазығ пирҷең кізілер-пірігістерні таап, кино суурарын аннаң андар узаратчалар...
*****************
Толдыразынаң пу материалларнаң танызып аларға сағынчатсаңар, "Хакас чирi" газетаның электроннай кӧрiмiне пазын саларға чӧптепчебiс. Чол мында - http://khakaschiry.ru/gazetaa-pazynys.php
Автор :
Ольга ТОМОЧАКОВА, Александра КАРАМЧАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде