ПАБАЗЫНЫҢ ЧОЛЫН ПАСХАН
19.05.2021
Хабарлар
Наа комиссар. Пылтыр Ағбан городтың чааҷылар комиссарына Сергей Васильевич Кибирёв турғызылған, пеер ол Асхыс аймааның чааҷылар комиссары тоғызынаң килген. Наа устағҷынаң хығырығҷыларны таныстырчабыс
ОЛҒАН ТУЗЫ
Сергей Кибирёв Курск облазындағы Романовка аалда 1963 чылда олаңай сӧбіреде тӧреен. Сӧбіреде ӱс пала полған, ікі пиӌе, Сергей - очы оол. Пабазы Василий Иванович Илбек Ада чаа араласчызы полған, читі чыл, чааӌы службазында танкист полып, служба ирткен.
Романовка аалда 8 класстығ ла школа полған, Сергей, аны тоозып, 9-10 класста ӱгренерге аймах кінінзер парған. Школадағы ӱгренӌілер прайзы даа Кии-десант войсколарында служба иртерге сағынча, Сергей андағох сағыс тутхан. Прай оолахтарға десантник поларға киліспин дее парчатса, Сергей позының сағызын толдырған.
Школа тоозып, ол Украинада пір чыл комбайннаң тамах кискен. Советтер тузында школада ӱгренӌілерні трактористке, комбайнёрға, шофёрға ӱгретчеңнер. Оларға профессия алғанын киречілепчеткен пічіктер пирӌеңнер. Ағаа хоза, Серёжа 4 класста ӱгренчеткендӧк, тайызы аны комбайнның рульы кистіне одыртчаң, іди ол тоғысха кічігдең кӧнік парған. Армияа парар алнында орындағы военкомат Сергейні ДОСААФ-сар ӱгренерге ысхан. Анда аны парашютист киреене ӱгреткеннер. Іди ӱгредіг тузында ол парашюттығ Ан-2 самолёттаң ӱс хати сегірерге маңнанған. Десантник полар сағызын ол пу тустаң сығара чуртасха кирерге кӱстенген.
ЧААҶЫ СЛУЖБАЗЫ
1981 чылда кӱскӱде Сергей чааӌы службазына хығыртылған. Сағынған сағызы хоостыра ол Кии-десант войсколарында пол парған. Срочнай службаны Прибалтикада Литвадағы Каунас городта ирткен. Ӱгредіг кінін ирткен соонда, чапчаң оолны разведка ротазынзар алғаннар. Пір чыл служба иртіп, Сергей прапорщиктер школазынзар кіріп алча. Іди ол позының чуртазын чааӌы службазынаң саңай палғалыстыр салған.
- Прапорщиктер школазында 10,5 ай ӱгренерге киліскен, - чоохтапча Сергей Васильевич. - Аны тоозып, позымның полкынзар служба узарадарға айланғам. Анда ротаның улуғ технигі полғам. Ӱгредиимні узарадарға рапорт пас салғанымда, чааӌылар комиссары мині Челябинсктегі пӧзік танковай команднай училищезер кірерге чӧптеен. «Синің пабаң танкист полған, аның чолын пас», - теен. Іди танкист-офицер поларға ӱгренерге кірібіскем, мині тың кӱстебееннер, позым, ибіре сағынып, андағ чарадығ алғам.
Танкисттер тимнепчеткен училищені Сергей маңнаныстығ тоозыбысхан, ағаа «лейтенант» офицер званиезін пиргеннер. Чааӌы службазын иртерге аны Чехословакиядағы войсколарның центральнай группазынзар ысханнар, анда ол танктар взводының командиріне турғызылған. Ікі чыл пу хазнада служба ирткен соонда, андағы войсколарны, сығарып, пасха частьтарзар ысхлап сыхханнар.
Іди 1988 чылда Сергей Кемеров облазындағы Юрга городта турчатхан танктар частьында пол парған. Сибирьзер килгенін ол пір дее ундутпинча.
- Юргазар килгенде, анда хар уғаа кӧп чаап партыр, - таныхтапча Сергей Васильевич. - Прай танктар хар алтында полғаннар, оларның башнялары ла кӧрінчеткен. Мағаа анда илееде тус служба иртерге киліскен. Пастап танктар ротазының командирiне турғысханнар, анаң - батальон командирінің орынӌызына, аннаң андар - батальон командиріне.
Службаны Кемеров облазында иптеп ле иртчеткен туста, 1995 чылда, танктар бригадазына Чечнязар парарға чахығ килген. Іди Сергей Васильевич бригаданаң хада Чечнядағы чаалазығның пастағы кампаниязында араласхан. Анда 1,5 ай полып, бригада Юргазар айланған. Че мыннаң чаалазығ кирее тоозылбаан. 1999 чылда Басаевтің паза Хаттабтын террористтері Дагестаннаң Чечнязар чаанаң кірібіскеннер. Танктар бригадазына пазох Чечнязар террористтерні чох идерге чорых тударға киліскен. Іди Сергей Васильевич, Сибирьде служба иртіп, ікі чаалазығда араласхан. Террористтерні чох идерінде аның хозымы ідӧк улуғ полған, че позы ноға-да аннаңар чоохтирға пір дее хыныхсыбинчатхан.
Юргазар айланған соонда, 2001 чылда, Сергей Васильевичті Ағбанзар службазын узарадарға ысханнар. Ағбанда ол туста резервисттердең тӧстелчеткен часть турған, аны «кадрированнай» адапчалар. Сергей Васильевич тиріглер паза техника хайраллапчатхан базаның танктар пӧлиинің пастығына турғызылған. Аның званиезі подполковник полған, мында ол чааӌы службазынаң парғанӌа служба ирткен.
2011 чылда ол Тирігліг кӱстерінең запасха парыбысхан.
ВОЕНКОМАТТАҒЫ ТОҒЫС
Чааӌы службазын тоосханда, Сергей Васильевичті Асхыс паза Таштып аймахтарының чааӌылар комиссарына турғыс салғаннар. Пу тоғыста ол 9,5 чыл полған. Пылтыр аны Ағбан городтың чааӌылар комиссарына турғысханнар, анзын пу тоғыстағы ӧзіске санирға кирек.
- Военкоматтың алнында пастағы теесте хығыртығ кампаниязын чахсы иртірібізер пӧгін турча, - чоохтапча Сергей Васильевич. - Часхыдағы хығыртығда Тирігліг кӱстерзер 170 кізі ызыбызар план пирілген. Пу тусха 11 оолны чааӌы службазына ызыбысхабыс, олар Ағбандағы тимір чол бригадазында служба иртерлер. Анаң, пандемияны санға алып, призывниктер пасха войсколарзар ызыларлар. Мында ӧӧні - чуғынӌах ағырыға хаптырған кізіні армияа ызыбыспасха.
Чоохтирға кирек, военкоматта коронавирус ағырығны позытпас хатығ режим тудылча, прайзы маскалығ чӧрче, антисептиктер прай орыннарда турча. Хығыртығ пунктынзар кізілер сыныхтағ ирткен соонда ла позыдылчалар. Комиссар, военкоматта пӧзік класстығ специалисттер тоғынчатханын таныхтап, мындағ тоғынӌыларның ады-солаларын адаан: Инна Марковна Ахпашева, Светлана Алексеевна Топоева, Светлана Михайловна Бытотова, Татьяна Ананьевна Черпакова паза даа пасхазы. Олар Асхыс аймаанаң килген специалисттер, тоғысты чалтырама апарчалар.
Ідӧк военкомат чыл сай Россияның арачыланыс министерствозының, МЧС-тың паза Росгвардияның ӱгредіг заведениелерінзер кірерге сағынчатханнарны таллир тоғыс апарча. Пӱӱл пу тоғысты 83,7 процентке толдыр салғаннар. Хакасиядағы военкоматтар аразында Ағбан городтың военкомады пу тоғысты толдырарынӌа иң алнында парча. 20 майға теере кандидаттарның пічіктері тимнел парар.
Пу тоғысча военкомат СМИ-лар (ТВ, радио, газеталар) пастыра агитация чапчаң апарча. Ӱгренӌілернең тоғазығлар иртірілче. Школа соонда прай ла ӱгренӌілер хайдағ профессия таллап аларын чахсы оңарбинчалар, аннаңар чааӌы службазын чахсы чарыт пирерге киректелче.
Военкомат армияа парарға тимненчеткен оолларны ДОСААФ-сар ӱгренерге ысча. Анда оларны тикке связист, «С» категориялығ водитель профессиязына ӱгретчелер. Андар хазии хоостыра армияда служба иртерге чарапчатханын сыныхтап ысчалар. Олар, ӱгредиин тооссалар, чааӌы службазына хығыртылчалар.
СӦБІРЕДЕ
1985 чылда Челябинскте Сергей Васильевич паза Татьяна Александровна сӧбіре тӧстееннер, хызы Иринаа 34 час. Оларны хызыӌах пархаӌаа ӧріндірче, ағаа майда 4 час толар. Сергей Васильевич пос туста палыхтирға, аңнирға хынча.
Аның кӧксін аймах сыйыхтар чазапча: Мужество ордені, 7 медаль, «М» класстығ танығ, «Парашютист-инструктор» танығ. Ол аймах самолёттардаң парашюттығ 50 азыра хати сегірген.
СӦС СОО: Сергей Кибирёв Юргада Россиянин Матыры Игорь Ахпашевиең хада служба ирткен. Игорь анда Кибирёвтын холында полтыр. Сергей Васильевич аны тың махтапча, пӧзік дисциплиналығ, чапчаң, прай техникаа табырах ӱгреніп алчатхан офицер полған тіпче.
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде