ХАКАСИЯНЫҢ ЧААӋЫ ПИСАТЕЛЬЛЕРІ
21.05.2021
Хабарлар
Презентация. Пу кӱннерде чарыхха сыххан наа хоос кинде. Ол пылтыр пайрамни таныхталған Илбек Чиңістің 75 чылына чарыдылған
Хакасияның чааӌы писательлерінің чайаачы тоғыстары пылтыр Интернет пастыра онлайн оңдайынаң чарыхха сыхханнар. Анаң оларны чаӌын киндеге тимнеп, сығарарға чаратханнар.
Амды ол сых парды. Аны Хакасияның культура министерствозының паза Чайаачылар туразының кӱзінең сығарыбысханнар. Кинденең танызып алар ӱчӱн, Чайаачылар туразынзар телевидение, радио паза газета хабарӌылары, библиотека тоғынӌылары, писательлер туғаннары чыылысханнар.
Хакасияның Чайаачылар туразының тоғынӌылары Ирина Юсупова паза Валентина Кайдаракова чыылысхан кізілерге наа сыххан киндедеңер хысхаӌахти чоохтап пиргеннер. Илбек Ада чаада Хакасиядаң 15 писатель араласхан. Оларның тӧрті орыс тілінең, пасхазы, 11 кізі, хакас тілінең пасхан. Кӧбізін піс чахсы таныпчабыс. Іди ол киндеге киріл парғаннар Тимофей Балтыжаковтың «Орис» повезінің ӱзіктері, Михаил Кильчичаковтың чаадаңар «Ікі кинек», «Тіріг хан» паза даа пасха кибелістері, Иван Костяковтың «Палығлығ хас» чооғының ӱзігі, Георгий Топановтың «Хара хус» повезінің ӱзігі, Дмитрий Чанковтың «Палиим ам даа сыстапча» повезінің ӱзігі паза даа пасхазы.
Илбек Ада чаа соонаң хакас тілліг чааӌы писательлернің кӧбізі істеніс чолын «Хызыл аал» (амды «Хакас чирі») газетада пастаан. Іди уғаа кӱстіг хабарӌылар полғаннар Илья Бурнаков, Иван Капчигашев, Сергей Чарков паза даа пасхазы. Олар постарының чоохтарын, кибелістерін паза очерктерін газетада сығар турӌаңнар. Олар ідӧк чаа тузын сағысха киргеннер, чир-суубыстаңар, істеніс матырларынаңар паза чир-чайааннаңар пасханнар.
Ідӧк киндеде піске чағын Яков Тиспирековтың паза Кирилл Кильчичаковтың тоғыстары пар. Оларның кибелістеріне сарыннар пазыл парғаннар.
Орыс тілінең пасхан чааы писательлернің аразында піске таныс Геннадий Сысолятиннің, Георгий Суворовтың паза Михаил Глазковтың кибелістері кирілгеннер. Оларны ідӧк орыс тілінең хығырарға чарир.
Анаң чоох тутхан киндені тимнеен чайаачы ус Галина Казачинова. Ол позы чаа тузында тӧреен, аннаңар аның чуртазы чааның паза чаа соондағы хатығ чылларны хыйалланып ирткен. Ол чааңы писательлерні алында чахсы танаан. Оларның чуртастарынаңар хысхаахти чоохтаан. Ағаа хозылған Иван Мартынович Костяковтың хызы Галина Костякова. Галина Ивановна пабазынаңар піс испеен чапсых нимелердеңер чоохтап пирген.
Тӱрчедең кинделер пістің республиканың библиотекаларына тарадылар. «Хакасияның чааы писательлері» кинде нименең аарлығ? Пістің ӧсчеткен тӧлібіс тӧреен чирібістің тархынын тың на чахсы пілбинче, аннаңар Илбек Ада чаадаңар пазылған чоохтарны паза кибелістерні хығырза, оларға туза полар.
Автор :
Илья ТОПОЕВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде