СЫЙЫХ МАТЫРЫНА ЧИТІРІЛДІ
21.05.2021
Хабарлар
Сыйыхтас. Пу наада «Хакас чирі» газетаның хабарӌызы, Россияның писательлер пірігізінің кізізі Анатолий Султреков Хакас Республика пазының алғыстас пічиине турысхан
Пӱӱл чыл пасталчатханда Хакасия правительствозында Хакас тілінің чарыдығлығ сӧстігінің пастағы томының авторларына паза аны чарыхха сығарарында ӧткін араласханнарға Хакасия пазы Валентин Коновалов алғыстас пічіктерін читірген. Танығлығ туста пістің арғызыбыс Анатолий Егорович, коронавирус пандемиязы тарапчатхан сылтаанда, анда аралас полбаан. Че терминология комиссиязының ӧткін араласчызына паза аны тилідерінде улуғ хозым иткен кізее алғыстас пічии, соонаң даа полза, читірілді. Аны ағаа Хакасияның ӱгредіг паза наука министерствозының наука паза национальнай ӱгредіг пӧлиинің устағӌызы Ольга Доможакова читірген.
- Анатолий Егорович 90 чыллардаң пасти терминология комиссиязының араласчызы полча. Ол анда алгым тоғыс апарған, тузалығ чӧптер пирген паза комиссияның тилізіне улуғ хозым иткен, - таныхтаан чооғында Ольга Васильевна.
Терминология комиссиязы 2003 чылда хати тӧстелгенде, анда ученайлар, ӱгретчілер, хабарӌылар, писательлер паза даа пасха хакас организацияларының кізілері араласханнар. Ол туста комиссия кнезінің орынӌызы, соонаң комиссия кнезі, Радион Сунчугашев полған.
- Анатолий Султреков ол-пу сурығларга чарыдылған чыылығларға хаӌан даа тимненіп килҷең. Ол сыбыра наа чӧптер, сағыстар искірңең, аннаңар ол мындағ сыйыхха турысхан, - теен Радион Дмитриевич.
Чыылығда ідӧк пістің арғызыбыс Анатолий Султреков «Айбыс» олғаннарға чарыдылған наа киндезінің презентациязын иртірген. Таныхтирға кирек, Хакасияда олғаннарға чарыдылған кинделер кӧп нимес, аннаңар чарыхха сығарылған кинде олғаннарға паза ӱгретчілерге улам чапсых полар.
Хада тоғынчатхан арғызыбыс Анатолий Султрековты теестегі кинде сығарыбысханынаң тиксі ӧменең алғыстапчабыс!
Автор :
Оксана СУНЧУГАШЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде