АҒБАН СУҒ ХОРҒЫС АҒЫЛЧА
21.05.2021
Хабарлар
Видеопалғалыс. Киҷее Хакасия пазы Валентин Коновалов город-аймахтар пастарынаң видеоселектор палғалысча чыылығ иртірген соонаң Абазада полған
Ол ӧрт сығызар паза суғ тазар тусха, чылығ пирҷең тус тоозылғанына паза килер чылда иптирге кӧрілген кӧп чон чӧрчеткен орыннарның онлайн-ӱн пирізіне чарыдылған.
Хакасияның чир-чайаан ис-пайы паза экология министрінің тоғызын толдырчатхан Владимир Лебедевтің чооғынаң, 19 майға пістің республиканың арығларында 8 ӧрт сығысхан. Пастағы сутка аразына олар ӱзірілгеннер. Амғы туста инспекторлар арығларны ӧрт сығызарына кӱннің сыныхтапчалар.
Халғанҷы кӱннерде наңмыр тың чағаннаңар, Асхыс паза Таштып аймахтарында Ағбан суғның сині кӧдірілче. 20 майда Абаза хыринда суғ дамбаны ас парыбызарына 1,5 метр халған. Суғ дамба ӧтіре ахча. 19 майда Хакасияның инженер арачыланыс управлениезінең дамбаны тыыдарына техника ызылған. Амғы туста анда пір экскаватор, пір бульдозер паза ӱс самосвал тоғынча.
Абаза город пазы Валентина Филимонованың чооғынаң, Ағбан суғның сині кӧдірілче. Абазаның Остров, Береговая, Красноармейская орамалардағы 40 тура ибіре суғ турча.
Красноармейская орамада чол чӧрізі чабыл парған. Остров орамада 10 техника тоғынча.
- Ачырғасха, Озёрная орамада суғ тас сыххан. Алынӌа тураларның чур-тағӌыларына ниме-ноозын ӧӧр кӧдірерге искіргебіс. Амды аар техниканаң дача пірігістерінзер парарбыс. Анда ідӧк суғ тасча. «Лесник» паза «Строитель» дача пірігістерінде суғ тасча тіп сағынчабыс. Суғны изеріне кӱстіг насостар кирек, - таныхтаан Валентина Филимонова.
Суғны исчең пӧзік технологиялығ насостар хара тас аныпчатхан разрезтерде пар. Валентин Коновалов орынҷызы Юрий Курлаевке андағ насостарны таап аларға чахығ пирген.
Асхыс аймаандағы Пӱктіг паза Пилтір аалларда суғ тазарынаң хорғыс пар. Пӱктіг аал хыринда Ағбан суғның сині 3.00 час хараазын кӧдіріл сыххан. Полған на час суғ 10 сантиметрге кӧдірілче. Анда суғ дамба ӧтіре ахча. Асхыс аалда ӱс чир участогында суғ турыбысхан.
Асхыс аймааның ГО паза ЧС киреенңе пӧлік пастығы Марк Тодышевтің чооғынаң, хараа инженер арачыланыс управлениезінең дамбаны тыыдарына ӱс техника килген.
Кирек хомай саринзар алысса, дамбаа сай урарына хоза пір экскаватор, пір бульдозер, тӧрт самосвал киректелер тіп таныхтаан Марк Тодышев.
Валентин Коновалов Владимир Лебедевке паза Юрий Курлаевке техника суриин пӧгібізерге чахығ пирген. Пии аймаандағы Маткичіг аалда, чир алтындағы суғ сығып, пір участокта суғ турыбысхан. 2014 чылда, чир алтындағы суғ кӧдіріліп, аалда 40 участокта суғ чайылған. Пии аймаа пазының орынҷызы Алексей Богдановтың чооғынаң, амды андағох кирек пол парарынаң хорғыс пар.
- Суғ тасса, чуртағӌыларны кӧзірерге ле халча. Піс оларға анзынаңар искіргебіс. Хараа дамбада дежурство апарғабыс. Абазадағы чіли суғ кӧдіріл парза, Маткичіг аал суғда турыбызар, -теен Алексей Богданов.
Таштып аймаандағы Хара чул аалда суғ тазарынаң хорғыс пар. Суғ дамба ӱстӱне кӧдірілеріне 1,2 метр ле халған. Амғы туста анда оперативнай ӧме дежурство апарча. Арбыт паза Чоғархы Таштып аалларзар парчатхан чолларда суғ чайыл парған, аннаңар андар чӧріс чабыл парған. Пу аалларзар Мадыр аал чӧбінің ибіркі чолларынңа чӧрчелер.
Хакасияның пӱдіріг паза ЖКХ министрі Валерий Келин чылығ пирҷен тустаңар искірген. Амғы тусха республиканың прай городтарында паза Алтай, Боград, Шира, Пии, Асхыс аймахтарының хай пірее аалларында чылығ пирері тохтадылған. Тайға хыриндағы паза алтынзархы аймахтарда чылығ пирері узарадылча.
Хакасия пазының аппарады устағҷызының орынҷызы Ирина Емельянова 2022 чылда иптирге кӧрілген орыннарны таллирынҷа онлайн-ӱн пиріске тӧстелген пірге федеральнай платформаның тоғызынаңар чоохтаан. Онлайн-ӱн пиріс 30 майға теере иртче. Анда 14 час толдыр салған чуртағҷыларның 10 % алай 52 муң кізі аралазарға кирек. Ирина Емельянова город-аймахтар пастарына онлайн-ӱн пирісче тоғыста ӧткін аралазарға чахығ пирген.
- 52 муң кізі ӱнін пирібізерге кирек. Пу кӧзідімге читпезебіс, кӧп чон чӧрчеткен чирлерні иптирге ахча пирілбес, - теен Ирина Емельянова.
Аның таниинаң, Харатас, Саяногорск городтарда илееде чуртағҷы полза даа, ӱн пирісте асхынах кізі араласты. Харатаста 52 муң чуртағҷыдаң пір муң азыра ла кізі ӱнін пирібіскен, Шира аал чӧбінде - 42_ кізі, Асхыс аал чӧбінде - 195 кізі. Ун пиріс ирт парғанға саналар ӱчӱн, 20 муң азыра ӱн чидіспинче.
Селектор чыылии соонаң Хакасия пазы Валентин Коновалов орынҷызы Юрий Курлаевнең хада Абазазар чолға сығыбысхан. Анда ол оперативнай штабтың чыылиин иртірген паза суғ тасхан орындағы чуртағҷыларнаң чоохтасхан.
Валентин Коновалов социальнай сетьтер страницазында піди пасча: «Амғы туста Ағбан суғның сині пӧзік. Суғ тасхан орында 58 участок орныхча. Суғ чайыл парған Абаза - Арбыт чолда чӧріс кизекти чабылған. Наңмырлар чаарынӌа кирек чахсы ла нимес, че профильліг ведомстволар пу киректі хайығда тутчалар. Орыннарда городтың ӧрт ӱзірҷең частьтарының, МЧС-тың, Хакасияның инженер арачыланыс управлениезінің паза полицияның оперативнай ӧмелері тоғынчалар. Абаза-зар хоза техника ызылар.
Абазаның устағ-пастаа оперативнай киректеңер город чуртағӌыларына сыбыра искірче, тураларӌа чӧрче. Абазадағы спорт школазында чонға ӱр нимеске чуртаӌаң пункт тӧстелген, ол 200 кізіні алып аларға тимде. Суғ тазып, хыйалға кірген город чуртағӌыларына хабазығ пирілер.
Таштып паза Асхыс аймахтарында суғ тазарынӌа ідӧк оой нимес кирек. Анда кирек хомайланмас ӱчӱн, хоза полызығ пирілер».
Автор :
Оксана ЧЕЛТЫГМАШЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде