АСХЫС АЙМАА РАЗРЕЗ АЗЫЛАРЫНАҢ ТОҒЫР!
21.05.2021
Хабарлар
Кӱн сурии. Телеграм каналлар, искіріг агентстволары, ТВ, газеталар паза социальнай сетьтер - прайзы Асхыс аймааның чуртағҷылары тоғырланыс чӧрімін пастапчатханнарынаңар суулапча
Сілкер айының 3-ҷі кӱнінде Россияның хазна садығлары порталында Асхыстағы хара тастығ орында хара тас істезеріне паза анирына лицензия пирерге садығлар чарлалған. Асхыс аймааның чуртағҷыларына ол сағыбаан хабар. Пірдеезі сағыбаан, итсе, Алтай паза Пии аймахтарының «кӱресчілері» асхыстағыларға сағба пір ле хати пирбееннер. Ӧткін чуртағчылар аймахта хара тас разрезін тоғындырарынаң тоғыр полчатханнарын искіріп пастааннар. Соонаң сілкер айының 27-чі кӱнінде 14.00 часта Асхыс аймааның культура-тынағ кінінде аймах чуртағҷыларының чыылии иртірілерінеңер чарлалған.
Пілдістіг, чуртағҷыларның Асхыс аймаа устағ-пастаана даа, республика ӱлгӱлеріне дее сурығлар пар. Хакасия правительствозы Асхыс чирінде хара тас разрезін азарынаң тоғыр полчатханын искірген, аның соонаң андағох кӧрізінең Асхыс аймаа пазы Абрек Челтыгмашев ӱлескен. Алғыда пу сурығча пӱӱнгі кӱнде аймах пазының тоғызын толдырчатхан Евгений Костяковнаң хада чоохтасчабыс.
- Евгений Юрьевич, Асхыс аймааның устағ-пастаа аймах чирінде хара тас разрезін азарынҷа пӧгіннерге хайди кӧрче?
- Піс разрезтең тоғыр полчабыс. Аннаңар 27 майда аймахтағы культура кінінде чоннаң чыылығ иртірчебіс. Аның ӧӧн пӧгіні - чонға пу кирек хайди айланчатханын кӧні искір пирері. Чарыт пирербіс - ноға ол разрезті тоғындырарына аукцион чарлалғанын, ноға аймах устағ-пастаа аны азарынаң тоғыр полчатханын, ідӧк чонның кӧңнін истіп аларға сағынчабыс. Россияның чир ис-пайынаң тузаланарынҷа федеральнай агентство регион правительствозының чарадиинча чир ис-пайын анирына лицензияларға аукционнар чарлапча. Орындағы ӱлгӱ чарадии киректелбинче. Пу чыылығда чон тоғыр полза, айланыста хол салар. Піс ідӧк разрезті астырбазынча тоғысты апарарбыс.
- Кем пу чыылығны иртірер сағыснаң сыххан?
- Чуртағҷылар пу чыылығны постары апарарға хынғаннар. Че піс пу пастағны позыбыс холына алып алғабыс.
- Чыылығ хайдағ салтарлар пирерге кирек?
- Піс чонға позыбыстың сағызыбысты читірербіс: піс разрезтең тоғыр парчабыс. Килген чон пос кӧрізін читірер: ноға ол Асхыста разрез азыларынаң чараспинча алай чарасча. Чонны испин, піс чарадығ албасха кирекпіс. Кирек чонны истерге! Чонның чарадиинча Хакасия правительствозынзар паза Ӧӧркі Чӧбінзер айланыстар тимнелер паза ызылар.
- Евгений Юрьевич, паза пір сурығ - чыылығ четвергте 14.00 часта, тоғыс тузында, кӧріл парған. Ноға іди турғысхазар?
- Пу кӱннерде Асхыс аймаанда разрез азарынаң паза чарлалған аукционнаң тоғыр парчатхан кізілер айланыстарда хол салып пастабысханнар. Минің кӧрізімнең, чыылығ ӧӧнінде аал (Асхыс аалдаңар чоох парча. - Авт.) чуртағҷыларына кӧрілген, піс мында чуртапчабыс нооза. Суббота-позырахта кізілер яблах саларға, ӱӱчікнең айғазарға сағынарлар. Иирде палаларны олған садынаң апарарға кирек, кемнің-де иб аразында хайыныс пасталча. Пастыхтар тоғыр полбаза, чонны позыдарлар. Аннаңар пу тусха кізі чыылызарына ізенчебіс. Ол ӱр иртпес.
- Аймахта разрез азылбас ӱчӱн, чонның на кӧңні полызар ба? Хайди сағынчазар?
- Пос чонынаңар чоохтаза, истерге кирек, чонның кӧңнін, аның сарин аларға. Аны ас полбас. Піс полызарбыс. Піс полыспазабыс, пістің чирібіс, хайдағ ол пар - сіліг, арығ - халбас. Піске кирек аны ӧсчеткен тӧлге артыс пирерге. Піс читіре парарбыс, аймахтың чирінде разрез чох полар ӱчӱн!
Автор :
Пазып алған Наталья СУБРАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде