"Улуғ суғ" Ағбан городсар читтi
22.05.2021
Хабарлар
22 майда 8.00 час иртенге Абаза город хыринда Ағбан суғның пöзии 388 см (пiр суткаа - 176) читкен. Суғ чайылчатхан чирлерде аның пöзии 490 см теере кöдiрiл парған. Чонның чуртазына хорғыс чох полар ӱчӱн, суғның пöзии 720 см аспасха кирек. Пӱӱнгi кӱнде ол орыннарда суғ синчеткенi таныхталча.
Пӱӱн, 22 майда, "улуғ суғ" Ағбан городсар читкен. 10.00 часта город хыринда суғ 620 см теере кöдiрiл парған. Чонға хорғыс ағылбас ӱчӱн аның пöзии 820 см аспасха кирек. Амғы туста суғ дачалар хыриндағы инiс чирлерде чайыл парған.
8.00 час иртен Райков аал хыринда суғ 1009 см ( пiр суткада + 132) чит парған. Ол орында суғ тазар тiп кöрiлбинче.
Абаза городта 20 участок (Красноармейская, Береговая, Олтырых, Кировтың, Родниковая, Октябрьның 70 чылына орамаларда) суға кiр парған. Iдöк суғ 82 дача участогынзар кiр парған.
Асхыс аймаанда 101 (+70) участок, Асхыста (64), Пӱктiг аалда (20), Сарығларда (8), Таштып пилтiрiнде (3), Перевоз аалда (1), Катановта (5). Пу аалларда тураларзар суғ читпеен.
Пии аймаандағы Маткичiг аалда 36 (+9) чир участогы паза 32 тура (+17) суға кiр парған. Аалдағы чонның хазиина хорғыс чоғыл, аннаңар чуртағӌыларны эвакуация иртiрерге кирек чоғыл.
Алтай аймааның Аршаннар аалында 3 участок паза Сартых аалда 6 участок суға кiр парған. Ол аалларда чонның хазиина хорғыс чоғыл.
Хубачар - Аршаннар - Пии маршруттың пiр орынында суғ чол кизiре ахча. Iдöк Таштып аймаанда пiр ағас тахта, сала сайалып, изел парған. "Улуғ суғ" ағылған саайдаң тоғыр 359 кiзi кӱресче паза 163 техника.
Автор :
Тимнеен Ольга Томочакова
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде