КІРПИС ЗАВОДЫ НАА КӰСНЕҢ ТОҒЫНЧА
26.05.2021
Хабарлар
Тоғыс чорығы. Хакасия пазы Валентин Коновалов Алтай аймааңдағы «Хакасский элемент» ООО-да пол килді. Завод кірпис сығарарын нааҷылабысты
10 кӱн не тоғын салған нааҷылалған кірпис заводы. Че амох оларның сиденнелген чирлерінде тимде кірпис чыыл парған. Килкім таарлағ машиналары оларның соонҷа соон сӱрістіре килзелер дее, кірпис саны хызырылбинчатханға тӧӧй. Пестең, аннаңар алынҷа танығлар иділерӧк, сыххан кірпис сооп парза, пір синніг поддоннарға салылча.
- Кірпис заводы кӱнде 100 муң азыра кірпис сығарча, аннаңар пу кӱннерге 1 миллион азыра кірпис сығарыл парған, ол, тізең, пір подъездтіг пис хадыллығ ікі тура, - чарытча предприятие директоры Владимир Ткаченко. - Мындағ сығарысты чуртасха кирерге полысхан хыдат технологиялары паза тиріглері. Ағаа тӧстеніп, тилекейде тоғынчатхан заводтарның 35-ҷізі пісти полча, 33-зі -Хыдат чирінде.
Хайдағ ол технологиялар? Нименең пасхалалчалар? Анзын Владимир Ткаченко Хакасия пазы Валентин Коноваловха чарыт пирген паза, заводча экскурсия иртіріп, кӧзіткен.
Кірписті идерінде той тузаланылча. «Хайдағ той алылар, андағ кірпис килізер», - тіпче устағҷы. Чоохтирға кирек, завод хара тас разрезінің чир ӱстӱн чыыпчатхан орын алнында орныхча. Че пу «тағлардағы» той кірписке чарабинчаттыр. Владимир Валериевичтің чооғынаң, ол най пай, аның сылтаанда кірпис, суға кір парзох, чарылып, оохтал сыхча. Амды кірписке тойны ӧнетін карьердең ағылчалар. Цехсар ол лентанаң кирілче. Анда, тізең, робот-тиріг сағыпча. Той суғнаң хада пораластырылча, тимде раствор аннаң андар лентаҷа позыдылча, хайда ол, пазылып, кірпистерге пӧлілче. Аннаң андар оларны пессер ысчалар, хайда 1200-1300 градуста «пысчалар».
Заводтың улуғ аалҷыларын директор пес ӱстӱнзер иртіргенӧк. Че пес ізии анда пілдіртпеен. «Мына мындағ хандыра хыдат технологиялары», - чарытхан устағҷы. Пестің ізиин пір туста ікі тоғынҷы кӧрчеттір. Оларны Хыдат чирінде пис чыл ӱгретчеттірлер. Кірписті хурудар алнында, песті ізиине читіріп алтырлар, анаң кірпис таарлалған хаңаа кирілген. Песте кірпис позы кӧйчеттір. Пір час пазынаң ол аннаң тасхар сығарылча.
Валентин Олегович республиканың кірписке кирексінізін таныхтаан, чирібісте пӱдіріг кирее айныпчатханда, ол санда нацпроекттер пастыра, ол иң кирек пӱдіріг материалы полча. Кірпис заводы Хакасияа ла нимес тоғынарын чазырбинча, анын Хызылчар крайынаң даа, Тывадаң даа чахығлар пар полтыр. Пӱӱнгі кӱнге тоғыс чарым чылға пар осхас.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде