«КАЛИНКА» -ӀҶЕ-ПАБАЛАРНЫҢ ӦРІНІЗІ
28.05.2021
Хабарлар
«Демография» нацпроект. Чиит паба-іҷелернің ӧрінізіне Ағбан пилтірі аимаандағы Тазоба пилтірі аалда ӱр сағаан олған сады азылды. «Калинка» Белые облака орамада орныхча
АҒБАН ГОРОДТАҢ ЫРАХ НИМЕС ОРНЫХЧАТХАНДА, ЧИИТ СӦБІРЕЛЕР ТАЗОБА ПИЛТІРІ ААЛДА ЧИР УЧАСТОКТАРЫН ХЫНЫП АЛЧАЛАР ПАЗА АНДА ЧУРТ ПӰДІРІНЧЕЛЕР.
«Калинка» олған сады ибіре чазы чирлер, че, хайди чоохтапча Ағбан пилтірі аймаа пазы Елена Егорова, тӱрчедең пу орын аалның кіні пол парар, пуох орында хаҷан полза наа школа пӱдірілері кӧрілче. Че амды чиит сӧбірелер наа олған садына даа ӧрінчелер. Анзы пілдістіг, амға теере оларға иркечектерін Ағбанзар ал чӧрерге килісчең нооза.
- Пастағы паламны піс городтағы олған садынзар ал чӧрҷеңміс, амды мин ікінҷізінең ибде одырчам. Пӱӱл июльда ағаа пір час чарым толар. Наа олған сады пӱдіріл парғанда, «Калинказар» чӧрербіс. Ол тузында азыл парғанда, піске уғаа ӧріністіг паза хай-хай ниик полар, - чоохтапча Тазоба пилтірі аалның чуртағҷызы Валентина Тимонина.
Олған садын ізестіг пӱдірігҷі пӱдірген - «Хакасгражданстрой» ООО. «Калинка» ағаа пастағы олған сады нимес, хайзын ол тимге сығарды. Подряд организациязы тиксі республикада илееде ӱгредiг организациязын пӱдір салған. «Калинканы» ол ирткен чылдох декабрьда тоос салған. Пис ай пазынан олған сады кирек пічіктер тимнеп алды, 1 июньнаң, тізең, андар иркеҷектер чӧріп пастирлар. Пу олған сады 120 орынға кӧріл парған, че списокка амох 115 олған кирілген, оларның 17-зі - 1,5 частығ.
Олған садында алты группа тоғынар, узуҷаң паза азыранҷаң алынҷа пӧліктер кӧріл парған. Ідӧк имҷінің, логопедтің, психологтың кабинеттері, музыка, спорт заллары парох.
Ікі хадыллығ олған сады «Демография» национальнай проект хоостыра пӱдірілген. Аның пӱдіриине тиксі 150 миллионҷа салковай хорадылған, ӧӧн чардығы федеральнай бюджеттең позыдылған.
Олған сады азылғанынаң аның тоғынҷыларын, палаларны паза іҷе-пабаларны Хакасия пазы Валентин Коновалов алғыстирға килген.
- Олған садтары алай ба школалар азылзалар, чӱрекке хаӌан даа ӧріністіг. Иң пастап андар чӧрер палаӌахтар ӱчӱн. «Калинкада» кічіг палаӌахтарға тус хынығ иртірер прай оңдайлар пар. Улуғлар, тізең, оларға полыс пирерлер. Іӌе-пабаларны паза тоғынӌыларны олған сады азылғанынаң алғыстапчам, мында пала ӱні сыбыра истілзін! - таныхтаан чооғында Хакасия пазы Валентин Коновалов.
Хакасияның ӱгредіг паза наука министерствозының искіриинең, пу чағында наа олған сады Шира аймааның Ит кӧл микрорайонында (60 орын), Асхыс аймааның Пилтір аалында (120 орын) азылар. 1 сентябрьға теере ідӧк Асхыс поселокта школа алнындағы учреждение (80 орын) ізиин палаларға азарға кирек. Аннаң пасха, Харатас, Ағбан городтарда паза Пии аймааның Новокурск аалында пӱдірілчеткен олған садтарының пӱдірии тоозыларға кирек.
Автор :
Оксана СУНЧУГАШЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде