МАҢЗЫРАС КИРЕК ЧОҒЫЛ
28.05.2021
Хабарлар
Ӧӧркі Чӧп. «Хакас Республиканың 2021 чылға паза пландағы 2022-2023 чылларға республика бюджедінеңер» законзар алызығлар кирердеңер чӧп ӱзӱрілген
Хайди искірче Хакасияның Ӧӧркі Чӧбінің хабарлар пӧлии, Ӧӧркі Чӧп президиумы 26 майда теестегі чыылиин иртірген. Чыылығны Ӧӧркі Чӧп кнезі Владимир Штыгашев апарған. Ӧӧн сурығларның пірсі «Хакас Республиканың 2021 чылға паза пландағы 2022-2023 чылларға республика бюджедінеңер» законзар алызығлар кирердеңер закон проекті полған.
Закон проектінең Хакасияның финанстар министрінің тоғызын толдырчатхан Игорь Тугужеков таныстырған. Алызығлар кирері республика бюджедінің парыстығ паза хорадығлығ чардығын тӱптестірерге киректелчеткенінең палғалыстығ тіп чарытхан ол.
Аның искіриинең, 2021 чылға республика бюджедінің парыстары 842 миллион 959 муң салковайға хозылча. 642 миллион 582 муң салковайы - федеральнай бюджеттең кірӌең ахча. Ол ахчаның 357 миллион 354 муң салковайын субсидия оңдайынаң Ағбан пилтірі аймаандағы Чапаев аалда 250 орыннығ школа, Шира аймаандағы Наа чир аалда 250 орыннығ школа, Ағбанда, Пии паза Шира аймахтарында олған садтарын пӱдіреріне, тиксі ӱгредіг организацияларының тураларын иптиріне, «Кванториум» олған техно-парктарын тӧстиріне, ааллар-ны тилідеріне, ол санда Бог-рад аймаандағы Первомай-скай аалда Культура туразын пӱдіреріне паза республиканың пасха даа социальнай сурығларын пӧгеріне позыдары кӧрілче.
Бюджеттер аразындағы пасха трансферттер 285 миллион 238 муң салковайға ӧскірілче. Ол ахча хазых хайраллирына имнег оборудованиезін аларына, «Хорғыс чох паза чахсы автомобиль чоллары» нацпроект хоостыра чолларны тыхтирына паза пасха даа кӧстеглерге парар.
Аннаң пасха, коммунальнай инфраструктура системаларын чахсыландырарына позыдылчатхан хорадығлар 200 миллион 377 муң салковайға ӧскірілче. Анӌа ахчаны хазна корпорациязы - ЖКХ реформазын иртіреріне хабасчаң чыынды - пирче осхас.
Олох туста республика правительствозы хорадығларның чардығын, ол санда чал ахчазынӌа, хызырып, пос полномочиелерінӌе бюджет ассигнованиелерін 4 миллиард 506 миллион 968 муң салковайға хызырыбызарға чӧпнең айланған.
Хорадығларны хызырар чӧпнең президиумдағылар чараспааннар. Ӧӧркі Чӧп кнезі Владимир Штыгашев паза аның пастағы орынӌызы Юрий Шпигальских республика бюджедіне хоза ахча тапчаң тоғыстың оңдайларын алыстырарға чӧп пиргеннер.
- Алызығлар кирерге, чал ахчазынңа паза социальнай тӧлеглерӌе ӱзӱрлес полызиинаң хорадығларны хызырарға маңзырабаңар, - салтарлар идіп, таныхтаан Владимир Штыгашев. - Федеральнай финанстар министерствозынаң ӧткін арах тоғыныңар, республика бюджедіне хоза ахча хайди даа киректелчеткенін таныхтаңар, аны киречілеңер.
Пу сурығ Ӧӧркі Чӧптің чағынғы сессиязында ӱзӱріге сығарылар тіп кӧрілче.
Автор :
Тимнеен Альберт ТОЛМАШОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде