«ПІС - ЧОННЫҢ АРМИЯЗЫБЫС!»
28.05.2021
Хабарлар
Акция. Россия президентінің чарадиинҷа арачыланыс министерствозы «Піс - хазнаның армиязыбыс! Піс - чонның армиязыбыс!» улуғ чарыдығлығ акциязын иртірче. Аны хоостыра агитпоезд Ағбанзар читкен
Тархынның аймах темаларын чарытчатхан, чаачыларның матыр хылиин кӧзітчеткен агитация поезді Москвадаң 25 апрельде чорыхха сыххан. Поездте 17 вагон, оларда пістің саблығ тархыныбыстың матыр страницалары, Тирігліг кӱстернің наа чидіглері, «Юнармия» чӧрімнің тилізі паза чааҷы-имҷілернің пандемия тузындағы тоғызы кӧзіділче. Акция чииттерні патриотизмге ӱгредеріне кӧстелче.
Поезд тимір чолҷа прай даа хазнаҷа иртер, Москвадаң Владивостокка теере, іди ол 50 городта тохтир, ол санда Мурманскта паза Севастопольда. Тимір чол станцияларында аймах ӧмелер концерттер кӧзітчелер, кӧрігҷілер, вагоннарҷа чӧріп, кӧзідіге сығарылған аймах экспозицияларны кӧрчелер.
26 майда 9.00 часта агитпоезд Ағбанзар читкен. Тимір чол вокзалының перронында аны Ағбандағы гарнизонның чааҷылары, юнармеецтер, стройда турып, удурлааннар. Оркестр ойнаан, патриот сарыннары толдырылған. Поездтің вагоннарында «Піс - хазнаның армиязыбыс! Піс - чонның армиязыбыс!» пазылых. Ідӧк хай пірее платформаларда чаа техниказы полған: амғы танк, позы чӧрчең артиллерия установказы, бронемашиналар.
Парадха кисчең кип-азахтығ чааҷылар паза юнармеецтер перронзар Россияның паза Хакасияның хазна знамяларын ағылғаннар. Агитпоездтің устағҷызы гвардияның полковнигі Павел Олексюк поезд Ағбанзар килгеннеңер рапортнаң искірген. Ағаа хакас кип-азахтығ хыстар кибірге кір парған оңдайнаң айран читіргеннер. Олексюктың чооғынаң, поезд 64 кӱн аразына Россияның 50 азыра городынҷа иртер. Ағбанда ол пис час турар.
Перронда митинг азылған, Россияның паза Хакасияның гимннері толдырылған соонда сӧс Хакасия пазының орынҷызы Ольга Пономарёваа пирілген.
- Хакасияның аарлығ чуртағҷылары паза аалҷылары, - айланған ол чыылған чонзар. - Піске Россияның Тирігліг кӱстерінің наа чидіглерінең, техниказынаң, ідӧк хазнабыс тархынындағы матыр киректернең танызып аларға ӱлӱс тӱсті. Пістің чааҷыларыбыс Чир-суубысты тастындағы даа, істіндегі дее ыырҷылардаң, чир-чайаанның хазырланчатханынаң даа, наа коронавирус ағырығ тарапчатханынаң даа арачылапчалар. Пістің армиябыс патриоттарны ӧскірче, чонға прай киректерде чахсы хабасча. Пу піске пирілчеткен сыйых ӱчӱн арачыланыс министерствозына улуғ алғыс!
Митингте ідӧк чоох тутханнар Хакасияның Ветераннар чӧбінің кнес орынҷызы Юрий Седых паза агитпоезднең устапчатхан Павел Олексюк. Хайди таныхтаан поезд устағҷызы, вагоннардағы прай кӧзідіглер интерактивнайлар, оларны кӧрчетсе, «тіріл» парчалар. Анда наа тиріглернең танызып аларға чарир, ідӧк вагоннарда пандемия тузында «хызыл зонада» тоғынған чааҷы-имҷілер полғаннар. Прай кӧзідіглер амғы чииттерге кӧстелчелер. Позының чооғын Олексюк «Россияның Тирігліг кӱстеріне - сабланыс! Армиябысха - сабланыс!» сӧстернең тоосхан.
Перрондағы мероприятие тузында «Юнармия» чӧрімге чиит оол-хыстарны алғаннар. Пу чӧрімге Россияның президент Владимир Путин чахсы хабасча. Наа юнармеецтер Чир-суубысха пирін салғаннаңар сирт пиргеннер. «Юнармия» чӧрімнің региондағы пӧлиинің штаб пастығы Ваган Харатян Ольга Пономарёваа чӧрімге наа кізілер алылғаннаңар рапортнаң искірген. Полған на юнармеецке танығ читірілген соонда митинг чабылған, гимннер толдырылған, знамялар перроннаң сығарылғаннар.
Вагоннарда кӧзідіглер азылған, чон оларны хынып кӧрчеткен. Ідӧк перронда Самара облазында орныхчатхан 2-ҷі гвардия армиязының «Волгадағы казактар» сарын паза теелбек ансамбльы концерт кӧзіткен. Пис час пазынаң агитпоезд Ағбаннаң іскер, Братск городсар, чол тутхан.
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде