Хакасия правительствозы пӱӱлгi бюджетсер алызығлар ноға кирiлчеткенiн чарытхан
29.05.2021
Хабарлар
Республика правительствозы Ööркi Чöпсер 2021 чылның бюджет хорадығларын хызырардаңар закон проектiн кирген. Хакасия пазының орынӌызы Ирина Войнова правительствоның чарадиин чарытхан:
- Бюджеттеңер закон Бюджет кодексiне килiстiре нимес, iкi сылтағӌа. Пастағызы - дефицитче. Бюджет кодексiнӌе ол 15%-тең кöп полбасха кирек. Хакасияның бюджеттеңер законда ол 19%.
Iкiнӌi сылтағ - бюджеттеңер законда хазна алымы пос парыстардаң 100%-тi, чарыда чоохтаза 24 миллиард салковайдаң, аспасха кирек. Пу кöзiдiмӌе бюджеттеңер закон ол норманы 4,6 миллиард салковайға асча.
Пiр чылға бюджеттi мындағ ла кöрiмнiг аларға чарир полған. Прай кирек хорадығларны кöр саларға - чал ахчазын тöлирiн, пособиелернi, учреждениелерге ахча позыдарын, имнерге, ас-тамахха. Мындағ ла кöрiмнiг.
Пастап, Хакасия правительствозы Ööркi Чöпсер 9 айға кöрiлген закон проектiн кирген. Че Ööркi Чöп депутаттарынаң тӱзедiглер кiрген , мына ол 4,6 миллиард салковайға. Iди бюджет 12 айға пол парған.
Андағ оңдайнаң бюджеттеңер законны депутаттар ирткен чылның декабрьында алыбысханнар - асчатхан дефициттiг паза хазна алымылығ. Че олох туста ол 12 айға алылған.
Прокуратура, закон Бюджет кодексiнiң iкi нормазын сайбап алылғаны сылтаанда, бюджет законға килiстiре нимес полча тiп санирға искнең сыххан. Пастағы инстанцияда, пiлдiстiг, прокуратура утып алған. Амды Ööркi Чöп правительствонаң хада апелляцияа пирiбiскеннер.
Пiске бюджетсер алызығлар тимнирге килiскен, аны Бюджет кодексiне килiстiре идерге паза Ööркi Чöпсер кирерге. Хайди пос искiнде прокуратура хысча, Ööркi чарғының чарадии даа пар тиирге чарир. Теестегi инстанцияда закон тоғынминчатханға саналза, пiс пiр салковай даа хорат полбаспыс. Ол законны сайбир нооза: бюджет чоғыл, тöлирге тöстеглер чоғылох.
Чалғыс чарадығ - бюджеттi ол кöрiмнiг алары, хайдағны пiс Ööркi Чöпсер киргебiс - 9 айға. Чарыда чоохтаза, сентябрьға теере. Ол тусха читiре, тiзең, бюджетке хоза ахча табарынӌа федеральнай кiннең, улуғ налог тöлепчеткеннернең öткiн тоғынарға. 4,6 миллиард салковай - ол улуғ ахча нооза. Пiс улуғ бизнеснең хайдағ-да чöптезiглер идiп алзабыс таа, федеральнай кiн полызии чох ол 4,6 миллиард салковайны чаап полбаспыс.
Автор :
Тимнеен Альберт Толмашов
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде