Григорий Майнагашевнең 1 июньда анымӌохтазарлар
29.05.2021
Хабарлар
Григорий Ильич Майнагашевтi 1 июньда 09.00 частаң 10.00 часха теере халғанӌы чолына ӱдезерлер пу адресче: Ағбан г., Кожевеннай ор., 34 (улуғ зал). Григорий Ильич Майнагашев - саблығ хазна деятельi паза Хакасияның халых деятельi, ӱр ағырған соонда 28 майда сын чирзер парыбысхан.
Григорий Ильич хакас тiлiн хайраллир паза тилiдер сурығларнаң кöп чыл айғасхан, чиит тöлнi хакас кибiрлер оңдайынаң ӱгредерiне кöп хайығ айландырған, Хакасияның Халыхтар палатазын тöстирiне кöп хозым иткен, хакас чонының родтар реестрiн тимнирiнӌе Улуғлар Чöбiнiң тоғызында öткiн араласхан.
Григорий Ильич Майнагашев 1941 чылның 21 ноябрьында Хакас автоном облазының Асхыс аймаандағы Ис пилтiрi аалда тöреен. Инженер-геодезист, подполковник, СССР-ның Тирiглiг кӱстерiнiң ветераны. 1966 чылда Ленинградтағы чааӌылар-топография училищезiн тоозыбысхан, 1974 чылда - Москвадағы чааӌылар-инженер академиязын "Картография" специальностьча. 1974-1988 чылларда Туркестан Чаа округында служба апарған. 1996 чылда Британиядағы менеджмент университедiн тоозыбысхан. 1992-2000 чылларда чир ис-пайы хазна комитедiнiң устағӌызы полған, 2000-2007 чылларда - Хакасияӌа чир кадастр палатазының директоры, 2000-2003 чылларда Чон Чöбiнiң кнезi, 2003 чылның апрельiнең - Хакас чонының Улуғлар Чöбiнiң кнезiнiң орынӌызы, 2008-2010 чылларда - Хакасияның Халыхтар Палатазының кнезi.
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде