ХАКАС ЛИТЕРАТУРАЗЫНҶА ПӀЛІСТЕРӀН СЫНААННАР
02.03.2022
Хабарлар
Ӱгренҷілер олимпиадазы-2022. 25 февральда Н.Ф.Катановтың адынаң национальнай гимназияда М.И.Боргояковтың адынаң олимпиаданың хакас литературазынӌа халғанӌы чардығы ирткен
Анда муниципальнай пӱдіс синіндегі олимпиадада чиңісчі полыбысхан 9 - 11 класстардағы ӱгренӌілер араласханнар. Прай 36 пала полған. Олар пос тілінӌе пілістерінең сыназарға Таштып, Пии, Асхыс, Ағбан пилтірі аймахтарынаң килгеннер. Олимпиаданың халғанӌы чардығында ідӧк Ағбан городтағы школаларның паза Н.Ф.Катановтың адынаң национальнай гимназия-интернаттың ӱгренӌілеріне аралазарға ӱлӱс тӱскен.
- Пӱӱл хакас тілінӌе паза литературазынҷа муниципальнай синдегі олимпиадада 1600 ӱгренӌі араласхан. Иң артыхтары, чиңісчі полып, халғанӌы, республика синіндегі, чардыхсар чол азып алғаннар. Мин оларны прайзын алғыстапчам. Мында ідӧк чахсы пілістер кӧзіт пиріңер. Пу олимпиаданың ӧӧн пӧгіннері олғаннарны пос тілін аарлирға кӧніктірері, оларның чайаачы оңдайларын ілезіне сығарары, науказар тартары полча, - алғыстап, чоох тутхан Хакасияның ӱгредіг паза наука министрінің орынӌызы Юрий Сагалаков.
Хакас литературазынӌа олимпиаданың халғанӌы чардығында иң кӧп араласчы Асхыс аймаанаң паза национальнай гимназиядаң полған.
Мария Мамышева - национальнай гимназияның 11 класстағы ӱгренӌізі. Саарбах хызыӌах Асхыс аймаандағы Полтах аалдаң. Хакас литературазынӌа олимпиадада ол андох 7 класстаң сығара аралазып пастаан. Сыйыхтығ орыннарға тӧреміл турысчаң. Гимназиязар даа килгенде, ікінӌі чылы анда ӱгрен парир, ол хакас литературазынӌа олимпиадада аралазарын узаратхан.
- Олимпиада мағаа тілімні пайыдарға чахсы оңдай пирче. Аннаңар анда аралазарынаң пір дее тоғыр полбинчам. Пу чыл мин муниципальнай синдегі чардыхта чиңісчі пол парғам, аннаңар халғанӌы чардыхта араласчам. Мин пос тілін тың аарлапчам, аны пілерге, аннаң чахсы чоохтазарға кӱстенчем. Че школа соонаң мин программистке ӱгренерге парарға сағынчам, - теен Мария.
Салтарында, пу чылдағы олимпиадада 11 класстағыларның аразында Мария Мамышеванаң Сабетр Мамышев сыйыхтығ орыннар алып алғаннар. Чиңісчі, тізең, Аима Боргоякова полыбысхан. Пу ӱзӧлең прайзы национальнай гимназияда ӱгренче.
10 класстағыларның аразында чиңісті Асхыс аймааның Ӱс чул аалындағы М.Е.Кильчичаковтың адынаң школа-интернаттың ӱгренӌізі Ольга Томочакова холға кирген. Асхыстағы М.И.Чебодаевтің адынаң лицей-интернаттың ӱгренӌілері Маргарита Сербигешеванаң Ксения Сагатаева паза национальнай гимназияның ӱгренӌізі Юлия Сагалакова сыйыхтығ орыннарға турысханнар - призерлар полыбысханнар.
9 класстағыларның аразында чиңісчі ідӧк Асхыстағы лицейнің ӱгренӌізі Алтынай Боргоякова полыбысхан, Таштып аймаандағы Пыдырах аалдағы школаның ӱгренӌізі Елена Сульбирекованаң Ағбандағы 24 № школаның ӱгренӌізі Анна Карачакова ікінӌі паза ӱзінӌі орыннарны ӱлезіп алғаннар.
Хакасияның ӱгредіг министерствозы, Н.Ф.Катановтың адынаң Хакас хазна университеді, республиканың ӱгредіг тилізі паза ӱгретчілер квалификациязын кӧдірӌең институды тӧстегӌілер полчатхан хакас литературазынӌа олимпиада 25 февральда ирткен. 4 мартта, тізең, хакас тілінӌе олимпиаданың халғанӌы чардығы иртер.
Автор :
Александра КАРАМЧАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде