«ПАБА» ОЙЫН ТИРЕҢ САҒЫСХА ТӰЗІРЧЕ
02.03.2022
Хабарлар
Культура. А.М.Топановтың адынаң Хакас драма театрының артисттері «Паба» ойынны (14+), Москвадағы режиссер Тимур Казновнаң хада тимнеп, тынағ кӱннерінде кӧрігӌілерге кӧзіттілер
Франциядағы саблығ писатель паза драматург Флориан Зеллер «Паба» пьесаны пас салған. Аның пьесаларынӌа тиксі тилекейдегі театрларда ойыннар турғызылча. Ойында иң чағын кізілер удур-тӧдір тың киректер. Ӧӧн матырларға оой нимес таллағ идерге килісче - иң аарлығ кізіні аар туста чалғысхан артыспас ӱчӱн, посха айабасха киректелче. Палалар частан парған іӌе-паба ӱчӱн нандырығлығ нооза.
«Паба» - ол сын чуртастаң алылған сӧбіредеңер кӧзідіг. Ойын пасталғаннаң тоозылғанӌа кӧрігӌіні сағыссыраста тутча. Хакас Республиканың чон артизі Иван Салайдинов (ойында Андрэ) паза А.М.Топановтың адынаң драма театрының артизі Алиса Толмачёва (ойында Анна) аар сидіксіністі пӧгерге кӱстенчеткен пабаны паза хызын ойнапчалар.
Ӧӧн матыр Андрэге 80 час. Ол пасхаӌыл кирекке тоғас парча. Аға туған-чағыннарын таныбинча. Ол, пас ағыриинаң ирееленіп, позының чуртазында ниме полчатханын оңар полбин сыхча. Чиитте ол чечётка чахсы салӌаң таң, алай инженер полған ма?
Андрэ Парижте Анна хызынаң паза Антуан кізӧзінең хада чуртапча алай аның хызы Лондонда наа арғызы Пьернең чуртапча ба? Ноға ол ам даа пижамалығ чӧрче паза хайда аның хол чазы? Кемнер аны ибірчеткен прай кізілер?! Ниме дее полза, Андрэ позының кӱзіне ам даа ізенче. Ол сағызын чідірбеен нооза. Аның хазии ам даа пик. Андағ нимес пе?
Альцгеймер ағырыға пастырчатхан Андрэ кічіг пала осхас пол парча. Ол хызының чуртын даа таныбиныбысча. Аның хараа алнында прай ниме пызыңнапча, чылтырапча. Ағырии улғаатчатхан аға прай нимедең хорых сыхча. Ол Анна хызын даа таныбиныбысча. Андрэнің хулаана кізӧзінің «Хаӌан син пу ах чарыхтаң парыбызарзың!» тіп аахтапчатханы истілче. Иван Салайдинов нимее чарабас пол парған, кӱзі халбаан апсахты киртістіг ойнапча.
- Мин амох позым алӌаах парам, - спектакльны кӧріп, аар тыныбысхан хости одырчатхан ортын частығ ипчі. Анаң хол пладынаң харах чазын чызыныбысхан. - Позыбыс таа хайди кирирбіс ни?
Аннаны даа ойнирға оой нимес тіп таныхтирға чарир. Андағ даа полза, артист Алиса Толмачёва рольны матлама толдырыбысхан. Ол пабазына прай чӱреенең айапчатхан хыстың оңдай-хылиин кӧзіткен. Аның сағыссыразынаң полған на кӧрігӌі таныс полар, неке. Полған на кізі іӌе-пабазы ағырбазын, кирібезін, чітіг чӧрзін, чуртасха ӧрінзін тіп сағынча нооза. Кізі нинӌе дее частығ полза, аның пабазы алай іӌезі изен-хазых полза, ол пала тіп саналча.
Наа спектакльда аралазып, ідӧк чахсы ойнаан артисттер: Дарья Тачеева (ипчі), Алина Гетманова (Лора), Николай Бельтереков (хара кип-азахтығ ирен), Валентин Ульчугачев (Пьер). Режиссерға спектакльны турғызарға Юлия Чебодаева полысхан. Сценаны Влада Чаптыкова тимнеен. Артисттер костюмнарынаң Мария Максименко айғасхан. Кӧгні режиссёр Тимур Казнов позы чайаан. Сценадағы чарытхынаң Новосибирсктең килген хоосчы Андрей Зозуля айғасхан. Теелбектерні хореограф Анастасия Быдышева турғысхан.
Москвадаң килген режиссер Тимур Казновтаңар хысхаӌахти чоохтаза, ол 1987 чылда Душанбеде тӧреен. 1996 чылда Россияның ӧӧн городынзар кӧскен. 2004 чылда РАТИ-ГИТИС-тағы актёр факультедінзер ӱгренерге кіріп алған. 2006 чылда «Солдаты» кинода суурынып, сабланып пастаан. 2010 чылдаң «Булгаковский дом» музей-театрда актёр, режиссер паза сценарист полып тоғынған. Амды Тимур Тамерланович «Интеграция» культура кінінің режиссёры полча. Хакасияның чуртағӌылары аның тоғызын 2021 чылда «Чир Чайаан» фестивальда кӧргеннер. Андада ол «Ӱннер» спектакльны турғысхан. Таныхтирға кирек, «Паба» спектакль «Кічіг чир-суғның культуразы» федеральнай проект хоостыра тимнелген.
Автор :
Татьяна ТЮТЮБЕЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде