КЭФ’22: Казахстан паза Хакасия палғалыстарын тыыдар
03.03.2022
Хабарлар
Хакасия пазы Валентин Коноваловтың устаанынаң республика делегациязы Хызылчардағы экономика форумында ӧткiн тоғынып пастапча. Пӱӱн, 3 мартта, Хызылчардағы экономика форумының ӧӧн кӱнi иртче тиирге чарир. Республиканың делегациязы аны Казахстан Республиканың Россиядағы полномочиелiг илҷiзi Ермек Кошербаевнең тоғазығдаң пастаан. Пастыхтар iкi республиканың хада-пiрге тоғынар оңдайларын ӱзӱргеннер.
Казахстан паза Хакасия удур-тӧдiр садығ-экономика сурығларынҷа пик палғалыс тутчалар. Пiстiң республика Казахстанзар тӧллiг малларны, ол санда герефорд паза симменталь тӧллiг, тамахтаң тимнеен ас-тамахты, ун, крахмал, сӱт, пӱдiрiг материалларын, пластмасса сатча, олар пiске – тадылығ паза пасха чиистi, тус, сера, тура iстiндегi пӱдiрiг тоғыстарына материалларны.
Мыннаң мындар Казахстаннаң палғалысты аал хониинҷа, ас-тамах промышленнозынҷа, наукаҷа, культураҷа, спортча, туризмҷе паза пасха кӧcтеглерҷе тилiдерге пӧгiн турча. Пӱӱнгi тоғазығның салтарларының пiрсi – 2022 чылда Казахстаннаң пicтiң республиказар эдильбай паза гиссар тӧллiг хойларның ӱренiн читiрерi. Пӱӱл Хакасияда аймах спорт, наука паза культура мероприятиелерiнде казахстандағы ученайларға, чайаачы ӧмелерге паза спортсменнерге аралазарға чарир.
Хакасия пазы Валентин Коновалов Ермек Беделбаевичтi «Сибирь. Притяжение» чоннар аразындағы iкiнҷi туризм форумында аралазарға хығырған, ол пӱӱл Ағбанда 27–29 апрельде иртер, iдӧк «Сибер ил» чоннар аразындағы культура-туризмнiң VIII форумына, ол пӱӱл июнь айда иртер.
Сомнар Хакасия пазы паза Хакасия правительство пресс-службазыни
Автор :
Наталья Субракова
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде