КЭФ’22: Чӧптезiглерде хол салылды
03.03.2022
Хабарлар
Пӱӱн Хызылчардағы экономика форумында Хакасия пазы паза правительство кiзiлерi республиканың чуртас-экономиказының тилiзiне тузалығ нинҷе-де чӧптезiгде хол салдылар.
Хакасия пазы Валентин Коновалов паза РУСАЛ-ның ӧӧн директоры Евгений Никитин республиканың чуртас-экономика тилiзiнҷе хада-пiрге тоғынардаңар чӧптезiге хоза чӧптезiгде хол салдылар. Аны хоостыра 2022 чылда алюминий сығарчатхан компания республиканың чонға кирек программаларына 118 миллион салковай позыдары кӧрiл парды. Валентин Олеговичтiң искiриинең, чылдаң чылға компанияның республика бюджедiне тӧлепчеткен налог синi ӧсче, iдӧк cоциальнай сурығларны пӧгерге хабазығ алғыдылча.
«РМ Рейл Абаканвагонмаш» АО пiстiң республикада наа инвестиция проекттерiн чуртасха кирерге пӧгiнче: контейнерлер сығарызын чылда 80 муң санға теере ӧскiрерге паза вагоннар тыхтаҷаң депо азарға. Ӏкi проект 2024 чылға теере чуртасха кирiлерге кирек. Проекттернiң паазы – 500 миллионҷа салковай. Салтарында республикада 500 азыра наа тоғыс орны тӧстелер, хайдар пӧзiк квалификациялығ специалисттер киректелер. Компания устағҷызы Александр Гиричтiң таниинаң, предприятиенiң амох специалисттерге кирексiнiс пар. Аннаңар республиканың тоғынҷыларны тимнирге хабазары чӧпсiндiрче.
Хайзы даа предприятие Хакасияның чуртас-экономиказын тилiдерiне, чуртағҷыларның чуртазын чахсыландырарына пос хозымын итче. Пӱӱнгi кӱнде чон регионнаң парбас ӱчӱн анда тоғыс орыннарын, чахсы чуртас оңдайларын тӧстирге киректелче. Ол республика правительствозының ӧӧн пӧгiннерiнiң пiрсi полча.
Кадрларны тимнирiнҷе паза пiр чӧптезiг ӱс регион аразында идiлген. Хызылчар крайының правительство кнезiнiң орынҷызы Сергей Верещагин, Хакасия пазының орынҷызы Ирина Войнова паза Тыва Республика пазының орынҷы тоғызын толдырчатхан Менги Кара-оол «Кимдегi Сибирь» килкiм инвестиция проектiне тоғынҷыларны тимнирiнҷе пiрге тоғынарға регионнар аразындағы чӧптезiгде хол салыбысханнар. Чоохтирға кирек, пу проектче ӱс регионда 70 муң наа тоғыс орны тӧстелерi кӧрiлче. Ирина Ивановнаның таниинаң, «Кимдегi Сибирьдегi» инвестиция проекттерiнҷе регионнарзар кӧп ахча тартылча, че проекттер амох кадрларнаң сидiксiнiстерге урунчалар. Менги Кара-оолның искiриинең, оларның республикада iдӧк нинҷе-де инвестиция проектi чуртасха кирiлче, ол санда пасха хан чирлерiнең инвесторлар пар. Регионның паза предприятиелернiң чӧптезiглерi хоостыра тӧстелчеткен тоғыс орыннарының 60 процентiне орындағы чуртағҷылар алыларлар, пiлдiстiг, оларны кирек специальностьтарға тимнирге киректелче.
Хакасияда регби спорт кӧрiмiне хайығ салылар. Аны республикада тилiдерiнҷе чӧптезiгде Валентин Коновалов паза Россиядағы регбинiң спорт федерациязының регион тилiзiнҷе директоры Глеб Бабкин хол салғаннар.
Мыннаң мындар Хакасия делегациязы КЭФ-тың ӧӧн чыылиинда паза пасха ӱзӱрiг чыылығларында араласхан. Толдыра искiрiгнi «Хакас чирi» газетаның теестегi сығарызында, 11 мартта, хығырыңар.
Автор :
Наталья Субракова Сомнар Хакасия пазы паза Хакасия правительство пресс-службазыни
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде