Орғаннар саны 400-ке хызырылар
05.03.2022
Хабарлар
Пӱӱн Хакасия правительствозындағы коронавирустаң тоғыр кӱрезерінҷе оперштабтың теестегі чыылии ирткен. Республикада халғанӌы суткада наа чуғынӌахтаң 5 кізі ӱреен, 326 кiзi ағырыбысхан. 739 кiзi хазыхтанып алған. Стационарзар чатырылғаннарның саны - 42, че аннаң ибзер 95 пациент позыдылған. Пӱӱл пу ағырығдаң тиксi 39510 кiзi хазыхтанып алған, 248 чуртағҷы ӱреен.
Ибде 1849 чуртағҷы имненче. Имнег тураларында ковиднең ирееленчеткеннернi имнирiне тиксi 1115 орын пар. Оларның 612-нзер кiзiлер имненерге чатырылған, 503 орған (45%) пос турча. 724 орғанда кислород пар, оларның 440-ы (61%) сағам пос турча. Кислород суткада ортымахти 3,7 тонна хорадылча, ол регионда читкіҷе. Кислород полызиинаң имненчеткен пациенттер саны асхынах арах полза даа, че реанимация пӧліктерінде чатчатханнарның саны ам даа пір синде тудылча.
Орғаннар саны пӱӱн 400-ке хызырылар, ӱлӱкӱннерге 700 азыра орын артызылар. Ам орыннар санын хызырарлар Алтай, Асхыс аймахтарның ӧӧн имнег тураларындағы, республиканың офтальмология паза теер-чуғынҷах ағырығлары имнег тураларындағы ковид-пӧлiктерде.
Хайди чоохталған чыылығда, Хакасияда пу кӱнде ковиднең, пневмониянаң ағырчатханнарның, кискектепчеткеннернің саны кӧӧлҷе синче.
Республикада коронавирустаң тоғыр имнер паза вакцина читкiӌе. Наа чуғынӌахтаң тоғыр прививканың пастағы чардығы прай 297998 чуртағҷаа турғызылған. 205092 кiзi вакцинаның iкi дозазын турғыстырып алған. Ревакцинацияны амды ідӧк "Спутник V" вакцинаның пастағы компонентін турғызып иртірчелер. Саарбахтарға сағам ковидтең тоғыр вакцина турғызылбинча.
Хакасияның хазых хайраллаӌаң министерствозы чӧпнең сыхча, 60 частаң улуғларға коронавирустаң тоғыр вакцинацияны хайди даа иртірерге кирек. Хайди анда санапчалар, улуғ тӧлнің аразында ӱрееннернің ортымах чазы 79-ха тиңнелче, оларның 75%-і вакцинаны хати турғыстырбаан сылтаанда тігі чирзер парыбысхан.
Республикада 60 частаң улуғ 102939 кізі чуртапча. Пӱӱн оларның 63,5%-іне (58817 кізі) ковидтең тоғыр вакцинаның пастағы чардығы турғызыл парған. Вакцина ам даа 45 муң кізее турғызыларға кирек. Вакцинация улуғ тӧлге социальнай учреждениелерде иртірілче, анда 1348 чуртағҷаа пу прививка турғызылған, ікінҷізі - 378 кізее. Улуғ тӧлнең вакцинациядаңар чарыдығлығ тоғысты ідӧк диспансеризация тузында ӧткін апарарға чӧп пирілген.
Автор :
Инора Боргоякова
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде