ЧОННАР АРАЗЫНДАҒЫ ПИК ЫНАРХАС
11.03.2022
Хабарлар
Чайаачы иир. С.П. Кадышевтің адынаң чон чайаачызының национальнай кінінде Россия чоннарының культура ис-пайы чылы «Многоликая Россия» концертнең азылған
Пайрамнығ иир В.Д.Поленовтың адынаң Россияның чон чайаачызы туразының директоры Тамара Пуртованың видео пастыра айланызынаң пасталған:
- Аарлығ нанҷылар, прайзын Россия чоннарының культура ис-пайы чылынаң алғыстапчам. Пу чылны президент чарлаан. Пістің хазнада аймах нациялығ чон чуртапча. Полғаны ла пос тілінең чоохтасча, кибірлеріне паза культуразына тудынча. Пӱӱл кӧп тоғыснаң айғазарбыс, Россия чоннарының культуразын паза кибірлерін хайраллир паза тилідер пӧгіннерні толдырарбыс.
Чуртағӌыларны ӱлӱкӱннең республиканың культура министрі Светлана Окольникова алғыстаан:
- Пӱӱл республикада мероприятиелер кӧп иртер: кӧзідіглер, форумнар, кӧглер паза хореография иирлері. Иң ӧӧн ӱлӱкӱннер поларлар - Тун пайрам паза Ӱртӱн тойы. Ідӧк ус холлығларның паза чон чайаачызынаң айғасчатханнарның аразында грант марығлары иртірілер. Ааллардағы культура тураларына хайығ айландырары ідӧк ӧӧн пӧгіннерге кірче. Пістің кӧп нациялығ Хакасиябыс пос тілін, культуразын, кибірлерін хайраллирға, сабландырарға паза мыннаң мындар тилідерге кирек.
Чайаачы иирде Хакасия паза Тыва республикаларның чон артисттері Герман Танбаев паза Альберт Кувезин «Чиріӌеем, пайзың, уғаа абахайзың» сарынны, тимір хомыснаң паза гитаранаң ойнап, ырлааннар.
Концертте Хакасияда чуртапчатхан аймах чоннарның теелбектері толдырылған. «Айас» хореография студиязы (устағӌы Хакасия культуразының саблығ тоғынӌызы Фаина Киштеева) сценазар узбек чонның «Андижанская полька», корея чонның «Веерліг», армян чонның «Арцах» теелбектерінең сыххан. «Ынархас» теелбек студиязының артисттері (устағӌы Хакасия культуразының саблығ тоғынӌызы Елена Шарай) хакас чонның «Минің Хакасиям», кавказ чонның «Тағлар яңылазы», хыдат чонның «Чааӌының хылии» паза моол чонның «Моол кӧглері» теелбектерінең кӧрігӌілерні таныстырғаннар. Алтай чонның культуразын ырӌы Аржан Туденев «Тебрен хай» сарын пастыра читірген. Анаң «Кӱн чахайағы» ансамбльның абахай хыстары (устағӌы Хакасияның саблығ артизі Анна Бурнакова) алтай чонның «Чалаң чӧрӌең хыстар» теелбегін толдырғаннар. «Час ханат» эстрада студиязының олғаннары ідӧк «Чалаң чӧрӌең хыстар» адалчатхан, че хакас теелбегінең сыхханнар. Казактарның паза орыстарның культураларын кӧзідіп, «Саяночка» паза «Шейк» ансамбльларның оол-хыстары плесет салғаннар. Концертті Аселя Давлетова паза Ирина Кулагашева «Чир-суум, часка сағаа алғапчам» сарыннаң тоосханнар.
Іди хакас чирібісте аймах чонның сіліг сарыннары чайылча, теелбектері толдырылча, кибірлері хайраллалча. Че иң ӧӧні - прайзының аразында пик ынархас ползын.
Чайаачы иир соонаң кӧрігӌілер кӧңнілерінең ӱлескеннер.
- Концерт маңат полды, - теен Ағбан городтың чуртағӌызы Клавдия Ахпашева. Аның тӧреен-ӧскен кічіг чир-суу Таштып аймаандағы Чыланнығ аал полтыр. - Пеер мині ӧӧрем хығырған. Палаӌахтар чахсы теелбектенділер. Мин позым даа сарнирға паза плесет саларға хынчам. Ӧрінчем.
- Концертке пархаӌаам хығырған. Ол «Ынархас» теелбек студиязының араласчызы полча. «Час ханат» олғаннар студиязының кӧзідиин тың сахтаам. Соонаң олар сценазар сыхханнар. Андар минің иң улуғ пархам чӧрген, ам позы хореограф полча. Кадышевтің адынаң культура кіні мағаа аарлығ пілдірче. Мин полған на концертке чӧрерге кӱстенчем, сигедек кизіп алып, ӧнетін чазан килчем, - чоохтаан Ағбан чуртағӌызы Ольга Руденок (хыс фамилиязы Сагатаева).
Автор :
Татьяна ТЮТЮБЕЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде